ឯកឧត្តមអនុរដ្ឋលេខាធិការ គី ច័ន្ទរំដួល និងឯកឧត្តម សៀក ឡេង អញ្ជើញទទួលជួបពិភាក្សាការងារ​ជា​មួយ អ្នកស្រី Lin YunYan ក្នុងជំនួបពិភាក្សាការងារ​ និង​ពង្រីកកិច្ចសហប្រតិបត្តិការ​លើបច្ចេកវិទ្យានៃវិស័យកសិកម្ម

ចេញ​ផ្សាយ​ ១១ សីហា ២០២៦ 268

នារសៀលថ្ងៃទី១១ ខែសីហា ឆ្នាំ២០២៦ ឯកឧត្តម គី ច័ន្ទរំដួល និងឯកឧត្តម សៀក ឡេង អនុរដ្ឋ​លេខា​​ធិការ និងជាតំណាងដ៏ខ្ពង់ខ្ពស់​ ឯកឧត្តមរដ្ឋមន្រ្តី ឌិត ទីណា បានអញ្ជេីញទទួលជួបជាមួយអ្នកស្រី Lin YunYan អគ្គនាយិកាក្រុមហ៊ុន Beijing Fenghua YunChuang Technology Co., Ltd ក្នុងជំនួបពិភាក្សា​ការងារ និងពង្រីកកិច្ច​សហប្រតិបត្តិការ​លើបច្ចេកវិទ្យានៃវិស័យកសិកម្ម​ នៅទីស្តីការក្រសួងកសិកម្ម​ រុក្ខាប្រមាញ់​ និងនេសាទ។
នាឱកាសនៃជំនួប ឯកឧត្តម គី ច័ន្ទរំដួល បានសម្តែងនូវការស្វាគមន៍យ៉ាងកក់ក្តៅ និងបានផ្តល់អនុសាសន៍ប្រកបដោយចក្ខុវិស័យនូវសំណើគន្លឹះរួមមាន៖​ ការអនុវត្តសាកល្បងបច្ចេកវិទ្យាជាប្រព័ន្ធតាមដានក្នុងការគ្រប់គ្រងគុណភាពកសិផលចាប់ពីដំណាក់កាលដាំដុះរហូតដល់ប្រមូលផល ការប្រមូលទិន្នន័យកសិកម្ម និងការប្រើប្រាស់ដ្រូនក្នុងការរួមចំណែកក្នុងការទប់ស្កាត់ និងបង្ក្រាបបទល្មើសនេសាទ បទល្មើសព្រៃឈើនិងសត្វព្រៃ។ ឯកឧត្តម​ ក៏បានជំរុញឱ្យមានការសិក្សាស្រាវជ្រាវជាមួយបណ្ឌិត្យសភាវិទ្យាសាស្ត្រកម្ពុជាលើដំណាំពូជទុរេនផងដែរ​។​ 
​ជាការឆ្លើយតប អ្នកស្រីអគ្គនាយិកា Lin YunYan បានថ្លែងអំណរគុណយ៉ាង​ជ្រាលជ្រៅចំពោះ ឯកឧត្តមអនុរដ្ឋលេខាធិការ ដែលបានផ្តល់នូវអនុ​សាសន៍ប្រកបដោយចក្ខុវិស័យ និងឯកភាពទទួល​យកនូវសំណើ ដើម្បីសិក្សា និងជំរុញកិច្ច​សហ​​ប្រតិបត្តិការឱ្យកាន់តែស៊ីជម្រៅ ដើម្បីឈានទៅ​សម្រេច​បាននូវលទ្ធផលផ្លែផ្កានាពេលខាងមុខ។ 
លោកស្រី​ បានបង្ហាញគោលជំហរគ្រោងនឹងអញ្ចើញគណៈប្រតិភូក្រសួងកសិកម្ម​ ទៅបំពេញទស្សនកិច្ចអំពីការប្រើប្រាស់បច្ចេកវិទ្យាក្នុងការគ្រប់គ្រង់គុណភាពផលិតផលកសិកម្ម និងបច្ចេកវិទ្យាដ្រូនសំដៅទប់ស្កាត់បទល្មើសនានា នៅឯប្រទេសចិន៕