នាថ្ងៃទី១៦ ខែវិច្ឆិកា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញចុះល្បាត និងត្រួតពិនិត្យបទល្មើសនេសាទ ចាប់ពីចំណុចមាត់ពាមជ្រោយស្តី រហូតដល់ចំណុចកដប អ្នកតាជាមា ស្ថិតក្នុងឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។ បេសកកម្មនេះមានការចូលរួមពីមន្ត្រីជំនាញរដ្ឋបាលជលផល កងរាជអាវុធហត្ថខេត្ត និងកងពលតូចថ្មើរជើងលេខ៥៣ សរុបចំនួន២២នាក់ ដោយប្រើប្រាស់កាណូតចំនួន៤គ្រឿង។
ក្នុងប្រតិបត្តិការនេះ កម្លាំងចម្រុះបានរកឃើញ និងបង្ក្រាបបទល្មើសនេសាទចំនួន១ករណី ដែលប្រើប្រាស់ឧបករណ៍ខុសច្បាប់បិទច្រកផ្លូវចរាចរណ៍ត្រីនៅចំណុច «កដប» ក្នុងភូមិសាស្ត្រខេត្តកំពង់ឆ្នាំង។ ឧបករណ៍ដែលត្រូវបានរុះរើ និងបំផ្លាញចោល រួមមាន របាំងលបណឬរ៉ាវចំនួន៤របាំង លប/លូចំនួន៤មាត់ របាំងព្រួលប្រវែងប្រមាណ៨៧០ម៉ែត្រ និងបង្គោលឫស្សីចំនួន១២២ដើម ព្រមទាំងបានលែងត្រីចំនួន១៥គីឡូក្រាមចូលក្នុងដែនទឹកធម្មជាតិវិញ។
ក្នុងឱកាសនោះ ឯកឧត្តម ប៉ែន ផល្លីកា បានអំពាវនាវដល់ប្រជានេសាទទាំងអស់ឱ្យចូលរួមគោរព និងអនុវត្តច្បាប់ស្តីពីជលផល ជៀសវាងការប្រើប្រាស់ឧបករណ៍នេសាទខុសច្បាប់ ដែលអាចបង្កការខាតបង់ថវិកា និងប្រឈមនឹងវិធានការផាកពិន័យតាមច្បាប់ជាធរមាន។ ជាមួយគ្នានេះ ឯកឧត្តមបានថ្លែងអំណរគុណ និងកោតសរសើរចំពោះកម្លាំងចម្រុះទាំងអស់ ដែលបានលះបង់កម្លាំងកាយចិត្ត និងពេលវេលា ក្នុងការបំពេញភារកិច្ចការពារធនធានជលផលទាំងថ្ងៃទាំងយប់។
ជាចុងក្រោយ ឯកឧត្តមបានណែនាំឱ្យអាជ្ញាធរ និងស្ថាប័នពាក់ព័ន្ធរៀបចំកាលវិភាគប្រតិបត្តិការល្បាតឱ្យបានច្បាស់លាស់ ដើម្បីធានាបាននូវការបែងចែកភារកិច្ចប្រកបដោយតុល្យភាព និងបង្កើនប្រសិទ្ធភាពនៃការអនុវត្តការងារ។ ទន្ទឹមនឹងនេះ ក៏បានស្នើឱ្យយកចិត្តទុកដាក់ត្រួតពិនិត្យសកម្មភាពនេសាទលៀស ការទិញលក់ និងការដឹកជញ្ជូន ដើម្បីទប់ស្កាត់ការនាំចេញលៀសទៅក្រៅប្រទេសដោយខុសច្បាប់ និងចូលរួមថែរក្សាធនធានជលផលឱ្យបានគង់វង្ស៕