ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំប្រជុំក្រុមការងារផ្នែកស្រូវ អង្ករ ដើម្បីពិនិត្យ និងដោះស្រាយបញ្ហាប្រឈមដែលបាននិងកំពុងកើតមានក្នុងវិស័យស្រូវ-អង្ករ

ចេញ​ផ្សាយ​ ២០ កុម្ភៈ ២០១៨ 3409

នៅព្រឹកថ្ងៃទី៣០ ខែវិច្ឆិកា ឆ្នាំ២០១៦ នៅទីស្តីការក្រសួង ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាសហប្រធានក្រុមការងារផ្នែកស្រូវ-អង្ករ (ក្រុម"ឈ") នៃវេទិការាជរដ្ឋាភិបាល-ផ្នែកឯកជន បានអញ្ជើញដឹកនាំប្រជុំក្រុមការងារផ្នែកស្រូវ-អង្ករ ដើម្បីពិនិត្យ និងដោះស្រាយបញ្ហាប្រឈមដែលបាននិងកំពុង កើតមាន ក្នុង វិស័យស្រូវ-អង្ករ។ ចូលរួមក្នុងកិច្ចប្រជុំនោះ រួមមាន: ឯកឧត្តមសហប្រធានក្រុមការងារពីវិស័យឯកជន ឯកឧត្តម លោកជំទាវ សមាជិក សមាជិកានៃក្រុមការងារមកពីក្រសួង ស្ថាប័នរាជរដ្ឋាភិបាល និងពីវិស័យឯកជន សហព័ន្ធស្រូវអង្ករកម្ពុជា ហើយនិងឯកឧត្តម លោកជំទាវ អស់លោក លោកស្រី ជាថ្នាក់ដឹកក្រសួងនិងអង្គភាពជំនាញនៃក្រសួងកសិកម្ម រុក្ខាប្រមាញ់និងនេសាទ ផងដែរ។ អង្គប្រជុំបានពិភាក្សាគ្នាយ៉ាងផុលផុសលើរបៀបវារៈចំនួន៣៖

១-ពិនិត្យលើវឌ្ឍនភាពការអនុវត្តលទ្ធផលនៃកិច្ចប្រជុំក្រុមការងារកាលពីខែសីហា ឆ្នាំ២០១៦ ដោយផ្តោតលើការបង្កើតក្រុមការងារសម្របសម្រួលថ្នាក់តំបន់តាមខេត្ត ផលិតកម្មស្រូវសំខាន់ៗ (កំណត់តួនាទីនិងភារកិច្ច សមាសភាព) និងការបង្កើតប៉ុស្ដីត្រួតពិនិត្យអនាម័យនិងភូតគាមអនាម័យតាមច្រកនាំចេញនិងនាំចូល

២-ពិនិត្យនិងលើកវិធានការអនុវត្តលទ្ធផលប្រជុំរបស់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដែលមានសេចក្ដីសម្រេចខ្ពង់ខ្ពស់របស់ សម្ដេចអគ្គមហាសេនាបតីតេជោ នាយករដ្ឋមន្ត្រី ហើយនិងរបៀបវារៈដែលស្នើដោយសហព័ន្ធស្រូវ-អង្ករ ដោយវិធានការត្រូវបានកិច្ចប្រជុំលើកជា២ គឺ៖ -វិធានការបន្ទាន់/រយៈពេលខ្លី៖ ការប្រើប្រាស់ឥណទានពិសេសរបស់រាជរដ្ឋាភិបាលសម្រាប់ទិញស្រូវពីកសិករ ការដោះទឹកឬការផ្ដល់មធ្យោបាយជួយកសិករក្នុងការប្រមូលផលស្រូវ ការផ្តល់ក្រណាត់កៅស៊ូដល់កសិករក្នុងការហាលសម្ងួតស្រូវ ជួយទិញស្រូវពីកសិករក្នុងតម្លៃសមស្រប…។ -វិធានការរយៈពេលមធ្យម៖ ការធ្វើការរួមគ្នា៣ភាគី (រាជរដ្ឋាភិបាល វិស័យឯកជន សហគមន៍កសិកម្ម) ដោយតម្លាភាព និងប្រសិទ្ធភាព ការកំណត់តំបន់ផលិតកម្ម បញ្ហាពូជ ទំនើបកម្មប្រពន្ធ័ស្រោចស្រព ការពង្រឹងការអនុវត្តយន្តការកសិកម្មតាមកិច្ចសន្យា (Contract Farming) បញ្ហាបង្កើតឃ្លាំងនិងឡសម្ងួត ការបណ្ដុះបណ្ដាលកសិករ ការបង្កើតនិងពង្រឹងសហគមន៏កសិកម្ម…។

៣-បញ្ហាផ្សេងៗ: ដូចជាការបញ្ចូលជីវជាតិ/អាហារូបត្ថម្ភ ក្នុងអង្ករ…(ដែលលើកដោយសហព័ន្ធស្រូវអង្ករ) ការបង្កើតរោងចក្រវេចខ្ចប់ (លើកដោយសម្ព័ន្ធសហគ្រាសខ្នាតតូចនិងមធ្យម)។