ពីធីចុះកិច្ចសន្យាផលិតកម្មកសិកម្មស្តីពី "ការទិញ-លក់ ផលិតផលគ្រាប់ស្វាយចន្ទីកែច្នៃ និងចុះអនុស្សរណៈយោគយល់រវាងវិស័យសាធារណៈ ឯកជន ដៃគូអភិវឌ្ឍន៍ និងអ្នកផលិត"

ចេញ​ផ្សាយ​ ២១ កក្កដា ២០២០ 19424

ថ្ងៃសុក្រ ១២រោច ខែអាសាឍ ឆ្នាំជូត ទោស័កព.ស២៥៦៤ ត្រូវនឹងថ្ងៃទី១៧ ខែកក្កដា ឆ្នាំ២០២០ នាយកដ្ឋានកសិ ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានសហការជាមួយក្រុមហ៊ុន Top Planning Japan ដើម្បីរៀបចំពីធីចុះកិច្ចសន្យាផលិតកម្មកសិកម្មស្តីពី "ការទិញ-លក់ ផលិតផលគ្រាប់ស្វាយចន្ទីកែច្នៃ និងចុះអនុស្សរណៈយោគយល់រវាងវិស័យសាធារណៈ ឯកជន ដៃគូអភិវឌ្ឍន៍ និងអ្នកផលិត" ក្រោមអធិបតីភាពដ៏ខ្ពង់ខ្ពស់ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។
ការអនុវត្តផលិតកម្មកសិកម្មតាមកិច្ចសន្យាជាសក្ខីភាពមួយដែលធានាបាននូវការផ្គត់ផ្គង់មួយច្បាស់ (Traceability) គុណភាព បិរមាណ និងតម្លៃច្បាស់លាស់។ ក្រោមកិច្ចគាំទ្រយ៉ាងពេញទំហឹងរបស់នាយកដ្ឋានកសិ-ឧស្សាហកម្ម បានសម្របសម្រួលឱ្យសិប្បកម្មកែច្នៃគ្រាប់ស្វាយចន្ទីជ័យសំបូរ (លោកស្រី អ៊ិន ឡៃហួត) ដែលជាដៃគូពាណិជ្ជកម្មក្នុងស្រុកមួយរបស់ក្រុមហ៊ុន Top Planning Japan បានចុះកិច្ចសន្យាផលិតកម្មកសិកម្ម ជាមួយសហករណ៍សរីរាង្គខ្មែរ (KOC)។ ស្របជាមួយគ្នានេះដែរ ការចូលរួមរបស់ដៃគូអភិឌ្ឍន៍នឹងក្លាយជាកត្តាលីករមួយក្នុងការចូលរួមអភិវឌ្ឍន៍វិស័យកសិកម្មកម្ពុជាឈានឆ្ពោះទៅមុខជាលំដាប់ ដែលក្នុងពិធីមានចុះអនុស្សរណៈយោគយល់រវាងនាយកដ្ឋានកសិឧស្សាហកម្ម និងសិប្បកម្មកែច្នៃគ្រាប់ស្វាយចន្ទីជ័យសំបូរ ជាមួយនឹងអង្គការ HEKS លើការលើកកម្ពស់គុណភាពគ្រាប់ស្វាយចន្ទី បច្ចេកទេសកែច្នៃ ផលិតផលគ្រាប់ស្វាយចន្ទីសរីរាង្គ ជម្រុញនិងលើកកម្ពស់ទីផ្សារសម្រាប់គ្រាប់ស្វាយចន្ទី និងគាំទ្រការកសាងផែនការមេសម្រាប់អភិវឌ្ឍន៍អនុវិស័យស្វាយចន្ទីកម្ពុជា។
ពិធីថ្ងៃនេះពិតជាបានបង្ហាញយ៉ាងច្បាស់ និងជាគំរូមួយក្នុងការជម្រុញ និងធ្វើឳ្យប្រសើរឡើងនូវខ្សែច្រវ៉ាក់តម្លៃស្វាយចន្ទីកម្ពុជា។
“យើងរួមគ្នាធ្វើឳ្យស្វាយចន្ទីកម្ពុជាកាន់តែប្រសើរឡើង (We Make Cambodia Cashew Nut Great)”