មូលដ្ឋានទិន្នន័យវាយតម្លៃផលនេសាទទឹកសាប (ឆ្នាំ២០២១–២០២៣)

វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប (IFReDI) បានអនុវត្តការស្ទង់មតិវាយតម្លៃផលនេសាទ (Catch Assessment Survey – CAS) ចាប់ពីឆ្នាំ២០២១ ដល់ ២០២៣ ដោយមានជំនួយបច្ចេកទេសពីគម្រោង FAO CAPFISH ក្រោមការគាំទ្រថវិកាពីសហភាពអឺរ៉ុប (EU)។ ការស្ទង់មតិបានប្រើវិធីសាស្ត្រសម្ភាសន៍រំលឹកឡើងវិញពីផលនេសាទប្រចាំខែជាមួយគ្រួសារនេសាទ ដើម្បីប្រមូលព័ត៌មានអំពីបរិមាណផលនេសាទ និងសមត្ថភាពធ្វើនេសាទនៅតាមបណ្ដារគ្រួសារនេសាទខ្នាតតូចនៅកម្ពុជា។ ការអនុវត្ដការវាយតម្លៃផលនេសាទទឹកសាបនេះជាជំហានសំខាន់មួយសម្រាប់ការកែលម្អប្រព័ន្ធតាមដាននិងបញ្ជូនទិន្នន័យស្ថិតិជលផលតាមរយៈខណ្ឌរដ្ឋបាលជលផលនាពេលអនាគត ដោយមានការគាំទ្របច្ចេកទេសពី IFReDI។

ការស្ទង់មតិរួមមានការសម្ភាសន៍ជ្រើសរើសគ្រួសារ (Household Selection Interview – HSI) ដែលសម្ភាសគ្រួសារ ១ដង ដើម្បីជ្រើសគ្រួសារចូលរួមដោយចៃដន្យ និងប្រមូលព័ត៌មានអំពីកម្រិតការពឹងផ្អែកលើការធ្វើនេសាទ និងសមាមាត្រនៃគ្រួសារនេសាទ។ បន្ទាប់មក គឺការសម្ភាសន៍អំពីផលនេសាទតាមគ្រួសារ (Household Catch Interview – HCI) ដែលជាការសម្ភាសន៍បែបរំលឹកឡើងវិញ ប្រព្រឹត្តឡើងប្រចាំខែ ដើម្បីប្រមូលព័ត៌មានអំពីផលនេសាទតាមប្រភេទ បរិមាណ និងសមត្ថភាពធ្វើនេសាទ ការចូលរួមរបស់យេនឌ័រ និងការប្រើប្រាស់ផលនេសាទ (រួមទាំងតម្លៃផលនេសាទ)។

ទិន្នន័យទាំងនេះត្រូវបានប្រមូលនៅទីវាលតាមបែបឌីជីថលទាំងស្រុង ដែលទម្រង់សំណួរត្រូវបានអភិវឌ្ឍឡើងក្នុងកម្មវិធី Kobo Toolbox។ ដើម្បីជួយសម្រួលដល់ការចូលដំណើរការទិន្នន័យនិងការរៀបចំរបាយការណ៍ ដោយមន្រ្តីបច្ចេកទេសរបស់ IFReDI ទិន្នន័យប្រមូលបានទាំងអស់ត្រូវបានគ្រប់គ្រងនៅក្នុងមូលដ្ឋានទិន្នន័យអនឡាញ។

ការស្ទង់មតិនេះផ្ដល់ទិន្នន័យគោលអំពីស្ថានភាពនេសាទទឹកសាបនៅតាមគ្រួសារនៅក្នុងប្រទេសកម្ពុជា និងបង្ហាញពីកម្រិតការពឹងផ្អែកលើការធ្វើនេសាទក្នុងជីវភាពប្រចាំថ្ងៃ។ លទ្ធផលនៃការវាយតម្លៃនេះជាជំនួយដល់ការវាយតម្លៃនិងការប៉ាន់ប្រមាណផលនេសាទនៅថ្នាក់ខេត្ត។

របាយការណ៍ប្រចាំខែនិងប្រចាំឆ្នាំទាំងអស់ និងសៀវភៅណែនាំបច្ចេកទេស អាចទាញយកបានទាំងភាសាខ្មែរ និងភាសាអង់គ្លេស តាមតំណភ្ជាប់នៅទីនេះ