ឯកឧត្តមរដ្ឋមន្រ្តី វេង សាខុន បានអនុញ្ញាឲ្យលោក Ramesh Subramaniam អគ្គនាយកធនាគារអភិវឌ្ឍ ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ២៥ មេសា ២០១៨ 4016

នៅទីស្តីការក្រសួងនារសៀលថ្ងៃអង្គារ ១០កើត ខែពិសាខ សំរឹទ្ធិស័ក ព.ស ២៥៦១ ត្រូវនឹងថ្ងៃទី២៤ ខែមេសា ឆ្នាំ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទបានអនុញ្ញាឲ្យលោក Ramesh Subramaniam អគ្គនាយកធនាគារអភិវឌ្ឍអាស៊ីប្រចាំតំបន់អាស៊ីអាគ្នេយ៍ និងសហការីចូលជួបសម្តែងការគួរសម និងពិភាក្សាការងារ។ មានមតិស្វាគមន៍ឯកឧត្តមរដ្ឋមន្រ្តី ក្នុងនាម ក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណយ៉ាងជ្រាលជ្រៅជូនចំពោះធនាគារអភិវឌ្ឍអាស៊ីដែលបានជួយឧបត្ថម្ភគាំទ្រយ៉ាងច្រើន ក្នុងដំណើរការស្តារនិងអភិវឌ្ឍប្រទេសកម្ពុជា ពិសេសជួយគាំទ្រផ្តល់ហិរញ្ញប្បទានលើវិស័យកសិកម្ម និងវិស័យពាក់ព័ន្ធដ៏ទៃទៀត។ នាឱកាសនេះឯកឧត្តមរដ្ឋមន្រ្តីក៏បានជម្រាបជូនភ្ញៀវដោយសង្ខេបពីការរីកចម្រើនលើវិស័យកសិកម្មមានដូចជាផលិតកម្មស្រូវ ដំឡូងមី ស្វាយចន្ទី ផលិតកម្មបន្លែនិងវិស័យវារីវប្បកម្មដែលទទួលបានលទ្ធផលល្អប្រសើរគួរឲ្យកត់សម្គាល់។ នាឱកាសនេះលោក Ramesh Subramaniam បានសាទរចំពោះកំណើនសេដ្ឋកិច្ចដែលរាជរដ្ឋាភិបាលសម្រេចបាននាបណ្តាឆ្នាំកន្លងមកក្នុងនោះវិស័យកសិកម្មដែលបានរួមក្នុងការជំរុញកំណើនសេដ្ឋកិច្ចជាតិ ៧%។

លោក Ramesh Subramaniam បានជម្រាបជូនឯកឧត្តមរដ្ឋមន្រ្តីពីគោលបំណងរបស់លោកនាថ្ងៃនេះគឺស្នើសុំការគាំទ្រ សហការ និងអនុសាសន៍សំខាន់ៗក្នុងការរៀបចំយុទ្ធសាស្រ្តភាពជាដៃគូថ្មីជាមួយប្រទេសកម្ពុជាដើម្បីអនុវត្តគម្រោងនានាដែលទាក់ទងនឹងវិស័យកសិកម្ម ជាពិសេសទាក់ទងទៅនឹងការបម្រែបម្រួលអាកាសធាតុ ការកែច្នៃវិចខ្ចប់ និងបង្កើនតម្លៃលើខ្សែសង្វាក់ផលិតកម្មកសិកម្ម។ ទាក់ទងនិងផែនការយុទ្ធសាស្រ្តដែលបានលើកឡើងខាងលើ ឯកឧត្តមរដ្ឋមន្រ្តីបានស្នើសុំឲ្យលោក Ramesh Subramaniam គិតគូពិចារណាលើចំណុចសំខាន់ៗមួយចំនួនដូចជា៖

ទី១- គួរបង្កើតក្រុមការងារមួយដែលមានសមាសភាពចូលរួមពីរាជរដ្ឋាភិបាល និងវិស័យឯកជន ដើម្បីធ្វើការសិក្សាស្វែងយល់ពីគោលនយោបាយគាំទ្ររបស់រដ្ឋាភិបាលនៃ បណ្តាប្រទេសនានាជាសមាជិក GMS លើការគ្រប់គ្រងផលិតផលកសិកម្ម ការកែច្នៃ ការវិចខ្ចប់ ការស្តុកទុក និងការដឹកជញ្ជូន ឆ្លើយតបទៅនឹងសេចក្តីត្រូវការទីផ្សារអន្តរជាតិ

ទី២-សិក្សាពីលទ្ធភាពលើការផ្តល់ឥណទានដែលមានការប្រាក់ទាបដល់ប្រជាកសិករ និងវិស័យឯកជនដែលលទ្ធភាពធ្វើការកែច្នៃកសិផល និងជំរុញការអនុវត្តការធ្វើអនាម័យនិងភូតគាមអនាម័យជាអាទិភាព

ទី៣-ពិនិត្យលទ្ធភាពលើការកសាងហេដ្ឋារចនាសម្ព័ន្ធនានាដែលទាក់ទងនឹងការកែច្នៃវិចខ្ចប់

ទី៤-ជួយជំរុញការធ្វើទំទើបកម្មកសិកម្ម ពិសេសការប្រើប្រាស់គ្រឿងយន្តកសិកម្មសមស្របទៅតាមលទ្ធភាព ក្នុងខណៈដែលកម្លាំងពលកម្មក្នុងវិស័យកសិកម្មបាននិងកំពុងមានការធ្លាក់ចុះជាបន្តបន្ទាប់

ទី៥-ជួយជំរុញការងាររៀបចំផែនទីកំណត់តំបន់ដាំដុះឲ្យបានត្រឹមត្រូវ ដើម្បីជាប្រយោជន៍ក្នុងការបង្កើនផលិតភាពផលិតកម្មដោយការបង្កើនរដូវដំាដុះ ការបង្កើនទិន្នផលតាមរយៈការជ្រើសរើសពូជឲ្យសមស្របតាមស្ថានភាពដី និងគុណភាពដី។

សំណើរខាងលើដែលឯកឧត្តមរដ្ឋមន្រ្តីបានលើកឡើង លោក Ramesh Subramaniam បានឯកភាពនិងគាំទ្រ ហើយ ខ្លួនលោកផ្ទាល់និងសហការីនឹងយកទៅពិនិត្យពិចារណាបញ្ចូលក្នុងផែនការយុទ្ធសាស្រ្តភាពជាដៃគូថ្មី ក៏ដូចជាគម្រោងអភិវឌ្ឍ វិស័យកសិកម្មផ្សេងៗទៀតផងដែរ។ ចុងបញ្ចប់នៃជំនួបពិភាក្សានេះ ឯកឧត្តមរដ្ឋមន្រ្តីសង្ឃឹមនិងជឿជាក់ថាធនាគារអភិវឌ្ឍអាស៊ីនឹងបន្តជួយគាំទ្រដល់រាជរដ្ឋាភិបាលកម្ពុជាក្នុងការអភិវឌ្ឍលើគ្រប់វិស័យ ពិសេសវិស័យកសិកម្មឲ្យកាន់តែរីកចម្រើននាពេលអនាគតស្របតាមប្រាថ្នាចង់បានរបស់ប្រមុខរាជរដ្ឋាភិបាល និងប្រជាជនកម្ពុជា។

កិច្ចពិភាក្សាត្រូវបានបញ្ចប់ក្នុងបរិយាកាស ស្និតស្នាល និងសហប្រតិបត្តិការយ៉ាងល្អប្រសើរដោយឈរលើគោលការណ៍រួមគ្នាក្នុងការអភិវឌ្ឍវិស័យកសិកម្មកម្ពុជានាពេលអនាគត់។