Other News
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំក្រុមការងារជំនាញ ចុះបង្រ្កាបបទល្មើសនិងផ្សព្វផ្សាយស្តីពីច្បាប់ជលផលនៅខេត្តចំនួន៤
ចេញផ្សាយ ២២ ធ្នូ ២០២៤ 2297
នៅថ្ងៃទី២០-២១ ខែធ្នូ ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក ឈិន តួ នាយរងអធិការដ្ឋានរដ្ឋបាលជលផលខាងត្បូងបឹងទន្លេសាប និងលោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានដឹកនាំកម្លាំងអន្តរាគមន៍ថ្នាក់ជាតិទប់ស្កាត់ និងបង្រ្កាបបទល្មើសជលផលបឹងទន្លេសាប ដោយប្រើប្រាស់កម្លាំង៣៨នាក់ និងមធ្យោបាយកាណូត៨គ្រឿង ចុះបង្ក្រាបបទល្មើសនៅខេត្តកំពង់ឆ្នាំង ពោធិ៍សាត់ បាត់ដំបង និងខេត្តកំពង់ធំ។
វត្ថុតាងដែលក្រុមការងារចម្រុះបានរុះរើកាប់បំផ្លាញឧបករណ៍នេសាទល្មើសច្បាប់នៅក្នុងខេត្តទាំងនោះ រួមមាន៖ ចំណុចឃុំកោះជីវាំង ស្រុកឯកភ្នំ ខេត្តបាត់ដំបង បានរុះរើកាប់បំផ្លាញឧបករណ៍នេសាទល្មើសច្បាប់ បាន២ករណី សាច់មង ១៥៥០ម៉ែត្រ បង្គោល២៧០ដើម ឡុកចាប់ត្រី៦គ្រឿង និងបានលែងកូនត្រីចម្រុះ៤០គីឡូក្រាមចូលក្នុងដែនបឹងធម្មជាតិវិញ។
ចំណុចគន្លងតាពត ស្ថិតក្នុងភូមិទី៥ ឃុំកំពង់លួង ស្រុកក្រគរខេត្ដពោធិ៍សាត់ ប្រទះឃើញជនសង្ស័យ០១នាក់ កំពុងធ្វើសកម្មភាពនេសាទដោយឧបករណ៍ឈ្នក់ ក្រឡាក្រោម១,៥សម រួមផ្សំនុយ សមត្ថកិច្ចចម្រុះបានឃាត់ខ្លួនជនសង្ស័យបញ្ជូនមក ស្នាក់ការសង្កាត់រដ្ឋបាលជលផលកំពង់លួង ដើម្បីកសាងសំណុំរឿងបញ្ជូនទៅតុលាការតាមនីតិវិធីច្បាប់ស្ដីពីជលផល។
រីឯចំណុច ជ្រោយវែង ចុងអូរ បឹងក្បាលព្រោះ ដងទង់ សាមពាង រហូតដល់វត្តកំពង់ចំលង ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ បង្រ្កាបបានរួមមាន៖ របាំងសាច់អួនចំនួន០៧ ខ្សែប្រវែង២៤៥០ម៉ែត្រ លបសាច់អួន ចំនួន១៤មាត់ បង្គោលចំនួន២៧០ដើម និងបានលែងត្រីចម្រុះចំនួន២៣គីឡូក្រាម ចូលក្នុងដែនបឹងធម្មជាតិវិញ។
ទន្ទឹមនឹងនេះ ប្រជានេសាទមានការសប្បាយរីករាយ និងថ្លែងអំណរគុណដល់ថ្នាក់ដឹកនាំ ឯកឧត្តមរដ្ឋមន្រ្តីក្រសួងកសិកម្ម សមត្ថកិច្ចពាក់ព័ន្ធ ជាពិសេសមត្ថកិច្ចជលផលគ្រប់ជាន់ថ្នាក់ និងក្រុមអន្តរាគមន៍ថ្នាក់ជាតិ ដែលបានខិតខំបំពេញកិច្ចការងារបង្រ្កាបបទល្មើសជាប្រចាំ៕
