ព័ត៌មានផ្សេងៗទៀត
ឯកឧត្តមរដ្ឋមន្ត្រីចុះពិនិត្យមើលស្រូវ ប.វ.ស ដែលប្រើប្រាស់កាកសំណល់ឡជីវឧស្ម័ន របស់កសិករ អ៊ុក អ៊ា
ចេញផ្សាយ ២២ មករា ២០១៨ 3597
កាលពីថ្ងៃទី ១២ ខែ វិច្ឆិកា ឆ្នាំ ២០១២ នេះ ឯកឧត្តម ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំប្រតិភូក្រសួងរួមមាន ឯ.ឧអនុរដ្ឋលេខា ឯ.ឧទីប្រឹក្សាក្រសួង ឯ.ឧប្រតិភូរាជរដ្ឋាភិបាលទទួលបន្ទុក អគ្គនាយកនៃអគ្គនាយដ្ឋានកសិកម្ម ថ្នាក់ដឹកនាំអង្គភាព និងមន្ត្រីជំនាញចុះពិនិត្យមើលស្រូវប្រដេញទឹកនៅភូមិ គោកឬស្សី កំភេម ថ្មី គោគពោ ព្រៃដង្ហើម និងភូមិស្វាយចេក ឃុំកែបពណ៌ ស្រុកពួក និងបានចុះពិនិត្យដំណាំស្រូវ របស់កសិករ អ៊ុក អ៊ា ដែលអនុវត្តតាមប្រព័ន្ធប្រពលវប្បកម្មដំណាំស្រូវតាមគោលការណ៍ធម្មជាតិ (ប.វ.ស) ដោយ ប្រើប្រាស់កាកសំណល់ឡជីវឧស្ម័ន និងជួបសំណេះសំណាលជាមួយកសិករប្រមាណ៥០គ្រួសារ នៅភូមិយាងទេស ឃុំខ្ចាស់ ស្រុកសូត្រនិគម ខេត្តសៀមរាប ក្នុងនោះក៏មានការចូលរួមពីអាជ្ញាធរ ស្រុក ឃុំ ភូមិផងដែរ។
លោកស្រីប្រធានការិយាល័យកសិកម្មស្រុកបានឲ្យដឹងថា ស្ថានភាពការងារបង្កបង្កើនផលក្នុងឆ្នាំ២០១២សំរេចបាន ២០.៩០០ហិកតាស្មើនឹង១០០%នៃផែនការ ហើយកសិករធ្វើស្រូវពង្រោះច្រើនជាងឆ្នាំមុនដោយមូលហេតុការរាំងស្ងួត បានអូសបន្លាយ។
ដោយមានការជម្រុញពីមន្ទីរកសិកម្មខេត្ត និងអង្កការនានាប្រជាជននៅក្នុងស្រុកសូត្រនិគមបាន អនុវត្តបច្ចេកទេសប្រព័ន្ធប្រពលវប្បកម្មដំណាំស្រូវតាមគោលការណ៍ធម្មជាតិបាន ២.៣៥០គ្រួសារ លើផ្ទៃដី ៨៦០ ហិកតា និងបានបង្កើតជាក្រុមបន្សុតពូជស្រូវតូចៗជាង២០ក្រុមលើពូជ១០ប្រភេទដែលរដ្ឋាភិបាលបានដាក់ចេញ។
តាមរបាយការណ៍លោកប្រធានមន្ទីរកសិកម្មបង្ហាញឲ្យដឹងថា គិតមកត្រឹមថ្ងៃទី០៥ ខែវិច្ឆិកា ឆ្នាំ២០១២ ការងារបង្ក បង្កើនស្រូវវស្សានៅទូទាំងខេត្តសំរេចបាន ១៨០.៨៥៥ហិកតា លើផែនការ ១៧៩.០៩០ហិកតា ក្នុងនោះផ្ទៃដីខូចខាត ដោយគ្រោះរាំងស្ងួត និងជំនន់ទឹកភ្លៀងចំនួន៣៦៥ហិកតា ស្តារបាន៥០ហិកតា ឡជីវឧស្ម័ននៅក្នុងស្រុកមាន ២៩ឡ នៃឡសរុបក្នុងខេត្តចំនួន ៨៩ឡ។
នាឱកាសនោះប្រជាកសិករឡើងមានយោបល់អំពីបញ្ហាដែលជួបប្រទះកន្លងមក ក្នុងការងារបង្កបង្កើនផលជូនដល់ ឯ.ឧរដ្ឋមន្ត្រីដើម្បីជ្រាប។ មានមតិឆ្លើយតប ឯ.ឧរដ្ឋមន្ត្រីបានណែនាំឲ្យមន្ទីរកសិកម្ម និងអង្គភាពជំនាញពាក់ព័ន្ធបន្ត ចុះអប់រំផ្សព្វផ្សាយ និងជំរុញឲ្យកសិករចងក្រងជាសហគមន៍ផលិតពូជស្រូវឲ្យកាន់តែច្រើនដើម្បីធានាតម្លៃទីផ្សារស្រូវ ពូជឲ្យបានខ្ពស់ និងបង្កើនមុខរបរតាមរយៈការលក់ស្រូវពូជផង និងបច្ចេកទេសផង។ ការប្រើប្រាស់ពូជតិច សុទ្ធ និងតាមបច្ចេកទេសនោះកសិករនឹងកាន់តែចំណេញ ហើយជីវភាពនឹងកែប្រែ។ លោកក៏បានបន្ថែមទៀតថា ចំពោះ ពូជស្រូវអ៊ីអ៊ែ៥០៤ ដែលជាពូជមកពីប្រទេសវៀតណាមបច្ចុប្បន្នត្រូវបានរាជរដ្ឋាភិបាលនៃប្រទេសវៀតណាមអនុញ្ញាត ឲ្យផលិតតែ១០%ក្នុងមួយខេត្តប៉ុណ្ណោះព្រោះពូជនេះជាពូជដែលមិនធន់នឹងជំងឺ និងជាពូជដែលបង្កជំងឺពីសត្វល្អិត ចង្រៃជាច្រើន។ ដើម្បីចូលរួមប្រកួតប្រជែងក្នុងទីផ្សារកសិករចាំបាច់ត្រូវតែពង្រឹងគុណភាពស្រូវអង្កររបស់ខ្លួន ដែល បច្ចុប្បន្នយើងមានការប្រកួត ប្រជែងទីផ្សារអង្ករជាមួយប្រទេសវៀតណាម ថៃ មីយ៉ាន់ម៉ា ឥណ្ឌា ប៉ាគីស្ថាន ជាដើម។ ហើយលោកក៏បានស្នើឲ្យមន្ទីរកសិកម្ម ការិយាល័យកសិកម្មស្រុកត្រូវជួយគិតគូរ និងដោះស្រាយពីបញ្ហាទឹក និងស្នើសុំ កិច្ចសហការពីមន្ទីរ ធនធានទឹក និងឧតុនិយម ដើម្បីកំណត់ផែនទីរកតំបន់ប្រព័ន្ធធារាសាស្ត្រ ដូចជា អូរ ប្រឡាយ ស្ទឹង ព្រែក បឹងបួរ ណាដែលអាចស្រោចស្រពដំណាំ និងស្រូវរបស់កសិករ។
តាមការលើកឡើងរបស់លោកបណ្ឌិត អ៊ុក ម៉ាការ៉ា នាយកវិទ្យាស្ថានអភិវឌ្ឍន៍ពូជកសិកម្មនៅកម្ពុជា ទាក់ទងទៅនឹង បញ្ហាពូជ ក៏សូមឲ្យប្រជាជនចេះជ្រើសរើសពូជសុទ្ធ និងអនុវត្តបច្ចេកទេសប.វ.សឲ្យបានត្រឹមត្រូវដើម្បីទិន្នផលកាន់តែ ខ្ពស់ និងមានគុណភាព ហើយការប្រើប្រាស់ពូជសុទ្ធមានរយៈពេលតែ៣ឆ្នាំ។
