ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំប្រជុំក្រុមការងារអន្តរក្រសួង (ត្រី-វិស័យ) សម្របសម្រួលការអនុវត្តកម្មវិធីនយោបាយ និងសកម្មភាពដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ

ចេញ​ផ្សាយ​ ៧ ឧសភា ២០២៥ 2835

នៅថ្ងៃទី០៧ ខែឧសភា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាសហប្រធាន បានអញ្ជើញដឹកនាំក្រុមការងារត្រី-វិស័យ កសិកម្ម-ទឹក-ជនបទ  សម្របសម្រួលការអនុវត្តកម្មវិធីនយោបាយ និងសកម្មភាព ពាក់ព័ន្ធនឹងសហគមន៍កសិកម្មទំនើប (ស.ក.ទ / MAC) សហគមន៍កសិករប្រើប្រាស់ទឹក (ស.ក.ប.ទ / FWUC) និង ភូមិគំរូ (ភ.គ / MV) បានរៀបចំកិច្ចប្រជុំបច្ចេកទេសលើកទី៨ របស់ខ្លួន នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំនេះ មានការអញ្ជើញចូលរួមពី សហប្រធាន ២រូបទៀត គឺឯកឧត្តម អាន ពេជ្រហត្ថដា  រដ្ឋលេខាធិការក្រសួងធនធានទឹក និងឧតុនិយម និងឯកឧត្តម អុិន ចន្ថា រដ្ឋលេខាធិការក្រសួងអភិវឌ្ឍន៍ជនបទ ព្រមទាំងសមាជិកក្រុមការងារត្រី-វិស័យ និងក្រុមលេខាធិការដ្ឋានអន្តរក្រសួង ដើម្បីពិនិត្យវឌ្ឍនភាពនៃការអនុវត្តសកម្មភាពការងាររបស់ក្រសួងនីមួយៗ ពិនិត្យវឌ្ឍនភាពនៃការអនុវត្តសកម្មភាពព្រមព្រៀងគ្នាក្នុងកិច្ចប្រជុំបច្ចេកទេសលើកទី៧ ដែលបានរៀបចំនៅថ្ងៃទី២៨ ខែមីនា ឆ្នាំ២០២៥។
ជាចុងបញ្ចប់ ឯកឧត្តមរដ្ឋលេខាធិការ បានគូសបញ្ជាក់ថា ក្រុមការងារអន្តរក្រសួងបានឯកភាពគ្នាលើសកម្មភាពត្រូវអនុវត្តរួមបន្ត ក្នុងនោះមាន ១.ការពិនិត្យកែសម្រួលបង្ហើយខ្លឹមសារពិស្តារផែនការសកម្មភាពរំកិល៣ឆ្នាំ និងផែនការប្រចាំឆ្នាំ២០២៥ របស់ក្រុមការងារត្រី-វិស័យ ២.ការពិនិត្យកែសម្រួលខ្លឹមសារទស្សនទានរៀបចំក្របខណ្ឌយុទ្ធសាស្ត្រត្រី-វិស័យ៥ឆ្នាំ (២០២៦-២០៣០) និងទី៣.សកម្មភាពត្រៀមរៀបចំកិច្ចប្រជុំអន្តរក្រសួងថ្នាក់រដ្ឋមន្រ្តីលើកទី៤ ដែលគ្រោងនឹងប្រព្រឹត្តិទៅ នៅទីស្ដីការក្រសួងកសិកម្ម រុក្ខាប្រមាញ់ និងនេសាទ  នាព្រឹកថ្ងៃទី២៩ ខែឧសភា ឆ្នាំ២០២៥ខាងមុខនេះ៕