ថ្នាក់ដឹកនាំក្រសួងកសិកម្ម អញ្ជើញចុះត្រួតពិនិត្យនិងបង្រ្កាបបទល្មើសនេសាទ ស្ថិតក្នុងខេត្តចំនួន២

ចេញ​ផ្សាយ​ ២៩ តុលា ២០២៦ 198

នៅថ្ងៃទី២៨ ខែតុលា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារជំនាញចុះត្រួតពិនិត្យនិងបង្រ្កាបបទល្មើស ដោយចាប់ផ្តើមចេញដំណើរពីចំណុចមាត់ពាមចុងឃ្នៀស (សង្កាត់ចុងឃ្នៀស ក្រុងសៀមរាប ខេត្តសៀមរាប) រហូតដល់ចំណុចកោះក្អែក ពាក់កន្ទេល (ភូមិព្រែកទាល់ ស្រុកឯកភ្នំ ខេត្តបាត់ដំបង)។
ប្រតិបត្តិការនេះមានការអញ្ជើញចូលរួមពីលោក ខូវ គួង អគ្គនាយករងទទួលបន្ទុករួម អគ្គនាយកដ្ឋានជលផល មេបញ្ជាការរងយោធភូមិភាគទី៤ និងសហការី ប្រធាននាយកដ្ឋានអធិការកិច្ចជលផល  ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នាយអធិការដ្ឋានរដ្ឋបាលជលផលខាងត្បូងបឹងទន្លេសាប ក្រុមអន្តរាគមន៍បង្ក្រាបបទល្មើសជលផលបឹងទន្លេសាបប្រចាំស្នាក់ការកំពង់ភ្លុក នាយរងអធិការដ្ឋានរដ្ឋបាលជលផលខាងជើងបឹងទន្លេសាប កម្លាំងចម្រុះខណ្ឌរដ្ឋបាលជលផលសៀមរាប រួមជាមួយសហគមន៍នេសាទចុងឃ្នៀស និងសហគមន៍នេសាទកែវពណ៌ អភិបាលរងក្រុង តំណាងរដ្ឋបាលស្រុកពួក ព្រមទាំងកម្លាំងខណ្ឌរដ្ឋបាលជលផលបាត់ដំបង។
ក្នុងប្រតិបត្តិការនេះ ក្រុមការងារជំនាញចុះពិនិត្យមើលការធ្វើនេសាទដោយឧបករណ៍ លបណរ ឬរ៉ាវ ចំនួន ១២០ របាំង បានអនុវត្តត្រឹមត្រូវតាមច្បាប់ស្តីពីជលផល។
នាឱកាសនោះដែរ ឯកឧត្តមអនុរដ្ឋលេខាធិការ បានជួបសំណេះសំណាល និងពាំនាំនូវការផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅពីសំណាក់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជូនដល់កម្លាំងមន្ត្រីជលផល ព្រមទាំងកងកម្លាំងប្រដាប់អាវុធទាំងបីប្រភេទ ដែលបានខិតខំប្រឹងប្រែងចូលរួមយ៉ាងសកម្មក្នុងការការពារ និងអភិរក្សធនធានជលផល ទទួលបានលទ្ធផលល្អប្រសើរកន្លងមក។
ជាមួយគ្នានេះ ឯកឧត្តមក៏បានផ្តល់នូវអនុសាសន៍ណែនាំមួយចំនួនដល់មន្ត្រីជលផល និងកងកម្លាំងទាំងអស់ ដើម្បីបន្តបង្កើនប្រសិទ្ធភាពក្នុងការទប់ស្កាត់ និងបង្ក្រាបបទល្មើសជលផល ព្រមទាំងអភិរក្សធនធានជលផលឱ្យបានគង់វង្ស និងប្រកបដោយចីរភាពតទៅមុខទៀត៕