ឯកឧត្តមរដ្ឋលេខាធិការ តូច ប៊ុនហួរ អញ្ជើញជួបពិភាក្សាការងារជាមួយសមាគមសហព័ន្ធម្រេច និងគ្រឿងទេសកម្ពុជា (CPSF) នៅទីស្តីការក្រសួងកសិកម្ម រុក្ខាប្រមាញ់ និងនេសាទ

ចេញ​ផ្សាយ​ ២០ សីហា ២០២៥ 317

នៅថ្ងៃទី១៩ ខែសីហា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពីឯកឧត្តម ឈុំ ឆុនលី ឯកឧត្តម សុខ វិសាល អនុរដ្ឋលេខាធិការនៃក្រសួងកសិកម្ម  លោក យិន ច័ន្ទសុធី អគ្គនាយករង និងជាប្រធានស្តីទីនាយកដ្ឋានដំណាំឧស្សាហកម្ម  លោក កែ មុន្ធីវុធ ប្រធាននាយកដ្ឋានការពារដំណាំអនាម័យ និងភូតគាមអនាម័យ ព្រមទាំសហការី នៃនាយកដ្ឋានដំណាំឧស្សាហកម្ម នៃអគ្គនាយកដ្ឋានកសិកម្ម ដើម្បីប្រជុំពិភាក្សាការងារជាមួយសមាគមសហព័ន្ធម្រេច និងគ្រឿងទេសកម្ពុជា (CPSF) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ឯកឧត្តមរដ្ឋលេខាធិការ បានគូសបញ្ជាក់ថា  ជំនួបពិភាក្សានេះ CPSF បានរាយការណ៍ពីវឌ្ឍនភាពការងារ និងលើកសំណូមពរមួយចំនួន ដូចជា តម្លៃ និងទិន្នផល តម្លៃម្រេចបានកើនឡើងគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ដែលនេះជាសញ្ញាល្អ។ ប៉ុន្តែទិន្នផលម្រេចមានការធ្លាក់ចុះ ដោយសារបញ្ហាប្រែប្រួលអាកាសធាតុ។ ការធ្លាក់ចុះទិន្នផលនេះបានធ្វើឱ្យកសិករមួយចំនួនខាតបង់ ទោះបីជាតម្លៃលក់បានខ្ពស់ក៏ដោយ។  ចំណែក ទីផ្សារនាំចេញ  កម្ពុជានៅតែពឹងផ្អែកខ្លាំងលើទីផ្សារវៀតណាម សម្រាប់ការនាំចេញម្រេច។ ប៉ុន្តែសហព័ន្ធកំពុងខិតខំប្រឹងប្រែងពង្រីកទីផ្សារថ្មីៗ ជាពិសេសទីផ្សារចិន និងអឺរ៉ុប ដើម្បីកាត់បន្ថយការពឹងផ្អែកលើប្រទេសតែមួយ។

ជាមួយគ្នានេះ ក៏មានសំណូមពរ ស្នើសុំឱ្យក្រសួងកសិកម្ម រុក្ខាប្រមាញ់ និងនេសាទ ចុះបញ្ជីកសិដ្ឋាន ឬសមាគមន៍មានលក្ខណៈប្រមូលផ្តុំស្ថិតក្រោមការគ្រប់គ្រងរបស់ CPSF ដើម្បីបង្កើនភាពងាយស្រួលក្នុងការនាំចេញ ព្រមទាំងបង្កើនការងារចុះបញ្ជីចម្ការម្រេចឱ្យបានច្រើនជាងមុន បន្ធូរបន្ថយថ្លៃចំណាយ និងជួយផ្ទៀងផ្ទាត់ទិន្នន័យស្ថិតិផ្ទៃដីផលិកម្ម និងបរិមាណផលម្រេចនៅទូទាំងប្រទេស ដើម្បីទទួលបាននូវទិន្នន័យពិតប្រាកដសម្រាប់ការចរចារទីផ្សារជាមួយអ្នកវិនិយោគបរទេស។

ជាចុងបញ្ចប់ តាមការបញ្ជាក់ពីនាយកដ្ឋានការពារដំណាំ អនាម័យ និងភូតគាមអនាម័យ លទ្ធផលអង្គប្រជុំបានឱ្យដឹងថា បច្ចុប្បន្ននេះចម្ការម្រេចចំនួន១២៦ បានចុះបញ្ជីជាចម្ការការអនុវត្តកសិកម្មល្អ និងបន្តជំរុញការចុះបញ្ជីចម្ការថ្មីៗបន្ថែមទៀត។ ការចុះបញ្ជីនេះមានការចូលរួមគាំទ្រពីគម្រោងដៃគូរអភិវឌ្ឍន៍ភាពជាដៃគូរវាងសហភាពអឺរ៉ុប អាល្លឺម៉ង់ កម្ពុជាសម្រាប់វិស័យកសិកម្ម និងប្រព័ន្ធស្បៀងអាហារប្រកបដោយចីរភាព (EU-German CAPSAFE) ម្ចាស់ចម្ការ គឺមិនត្រូវបានបង់ប្រាក់ទេ ក្រសួងបានចូលរួមដោះស្រាយបន្ទុកចំណាយដល់កសិករគំរូបានមួយចំនួន បង្កើតចលនាជំរុញ និងពន្យល់ដល់ម្ចាស់ចម្ការស្ម័គ្រចិត្តចុះបញ្ជីតាមស្តង់ដារកសិកម្មល្អ និងកសិកម្មសរីរាង្គឱ្យកាន់តែច្រើន ពង្រឹងកិច្ចសហប្រតិបត្តិការជាមួយក្រសួងពាក់ព័ន្ធ និងដៃគូអភិវឌ្ឍន៍ ដើម្បីលើកកម្ពស់វិស័យម្រេច សហការជាមួយក្រសួងស្ថាប័នពាក់ព័ន្ធ ដើម្បីពង្រីកទីផ្សារនាំចេញ ព្រមទាំងពង្រឹងរចនាសម្ព័ន្ធផ្ទៃក្នុងរបស់ខ្លួន៕