ថ្នាក់ដឹកនាំក្រសួងកសិកម្ម​ អញ្ជើញចុះពិនិត្យការដំឡើងទ្រុងមាន់ និងផ្ទះសំណាញ់ ពីគម្រោងលេីកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច​ ដេីម្បីកាត់បន្ថយភាពងាយរងគ្រោះ និងពង្រឹងភាពធន់​ (EMPOWER) នៅខេត្តសៀមរាប

ចេញ​ផ្សាយ​ ២២ តុលា ២០២៦ 157

នាថ្ងៃទី២១ ខែតុលា ឆ្នាំ២០២៦ លោកជំទាវ ងិន សូនាថ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្តគម្រោង EMPOWER ប្រចាំក្រុងរុនតាឯកតេជោសែន ខេត្តសៀមរាប បានអញ្ជើញដឹកនាំក្រុមការងារអនុវត្តគម្រោងថ្នាក់ខេត្ត និងមន្ត្រីកសិកម្មឃុំ ដោយមានការចូលរួមពីលោក ម៉ៅ ឧស្សាហ៍ អភិបាលរងក្រុងរុនតាឯកតេជោសែន ព្រមទាំងសហការី ចុះពិនិត្យការដំឡើងទ្រុងមាន់ និងផ្ទះសំណាញ់ ជូនគ្រួសារក្រីក្រកម្រិត១ និងក្រីក្រកម្រិត២ សរុបចំនួន ៦៣ គ្រួសារ និងបន្តដំឡើងបន្ថែមរហូតដល់ចំនួន ១៣៩៣គ្រួសារ។
លោកជំទាវអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់អាជ្ញាធរពាក់ព័ន្ធ ដែលបានសហការសម្របសម្រួល និងបានលើកទឹកចិត្តដល់ពុកម៉ែបងប្អូនរួមគ្នាថែរក្សា និងអនុវត្តឱ្យបានជោគជ័យ ដែលអាចជួយគាំទ្រក្នុងការលើកកម្ពស់ជីវភាព និងការបង្កើនប្រាក់ចំណូលរបស់បងប្អូនប្រជាកសិករ ហើយក្រុមការងារអនុវត្តគម្រោង នឹងបន្តយកចិត្តទុកដាក់លើការងារនេះ ប្រកបដោយប្រសិទ្ធភាព និងប្រសិទ្ធផលខ្ពស់៕