ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ តំណាងក្រុមហ៊ុន Santhai Import Export CO.,LTD ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ២៤ កុម្ភៈ ២០១៨ 3636

កាលពីវេលាម៉ោង ១៥:០០នាទីរសៀល ថ្ងៃទី២៩ ខែមីនា ឆ្នាំ២០១៧ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ តំណាងក្រុមហ៊ុន Santhai Import Export CO.,LTD ចូលជួបសម្តែងការគួរសម និងពិភាក្សាការងារអំពីការរៀបចំពិធីតាំងពិពណ៌ផលិតផលកសិកម្មអន្តរជាតិលើកដំបូង ឆ្នាំ២០១៧ នៅកម្ពុជា។ សូមបញ្ជាក់ថា ក្រុមហ៊ុន Santhai Import Export CO.,LTD គ្រោងនឹងរៀបចំពិធីតាំងពិពណ៌ផលិតផលកសិកម្មអន្តរជាតិលើកដំបូង ឆ្នាំ២០១៧ នៅកម្ពុជា ដែលនឹងប្រព្រឹត្តទៅនៅថ្ងៃទី២៥ ដល់២៨ ខែមិថុនា ឆ្នាំ២០១៧ខាងមុខនេះ។ ពិពណ៌អន្តរជាតិនេះ នឹងមានការចូលរួមពីក្រុមហ៊ុនចិនចំនួន ៥០០ក្រុមហ៊ុន និងតំណាងក្រុមហ៊ុនចំនួន ៣០៤ក្រុមហ៊ុនអញ្ជើញមកពីបណ្តាប្រទេសក្នុងតំបន់អាស៊ាន ព្រមទាំងមានការអញ្ជើញចូលរួមដោយអ្នកវិនិយោគទុនក្នុងស្រុក និងថ្នាក់ដឹកនាំសំខាន់ៗក្នុងជួររាជរដ្ឋាភិបាលអញ្ជើញចូលរួមផងដែរ។

ទន្ទឹមនឹងនេះ ក្រុមហ៊ុនបានអញ្ជើញ ឯកឧត្តមរដ្ឋមន្រ្តី ចូលរួមជាវាគ្មិនក្នុងពិពណ៌ និងអញ្ជើញមន្រ្តីជំនាញរបស់ក្រសួងកសិកម្ម រុក្ខាប្រមាញ់ និងនេសាទ ចូលរួមធ្វើបទបង្ហាញអំពី បទបញ្ញតិរបស់រាជរដ្ឋាភិបាលលើការវិនិយោគវិស័យកសិកម្មនៅកម្ពុជា ដើម្បីផ្តល់ជាពត៌មានដល់ធុរជន និងអ្នកវិនិយោគិនដែលមានចំណាប់អារម្មណ៏ក្នុងការវិនិយោគនៅកម្ពុជា។

ជាការឆ្លើយតប ឯកឧត្តមរដ្ឋមន្រ្តី មានប្រសាសន៏ថា ក្រសួងកសិកម្ម រុក្ខាប្រមាញ់ និងនេសាទ សូមស្វាគមន៏ជានិច្ចចំពោះក្រុមហ៊ុនវិនិយោគនានាលើវិស័យកសិកម្ម ហើយក្រសួងក៏នឹងសហការអោយបានសកម្មនៅក្នុងការតាំងពិពណ៌ផលិតផលកសិកម្មអន្តរជាតិនេះផងដែរ។

ឯកឧត្តមរដ្ឋមន្រ្តី បានមានប្រសាសន៏បន្តថា បច្ចុប្បន្នក្រសួងកសិកម្ម រុក្ខាប្រមាញ់ និងនេសាទ កំពុងជំរុញអោយវិស័យឯកជន សហការជាមួយនឹងក្រសួង និងសហគមន៏ក្នុងការអនុវត្តផលិតកម្មតាមកិច្ចសន្យា ហើយកម្ពុជាចង់ទទួលបាននូវអ្នកវិនិយោគទុនដែលមានភាពប្រាកដប្រជា ហើយការវិនិយោគទាំងនោះនឹងចូលរួមគាំទ្រដល់ការអភិវឌ្ឍន៏ជាតិ ក៏ដូចជាផលប្រយោជន៏ប្រជាពលរដ្ឋក្នុងស្រុកផងដែរ។

ឯកឧត្តមរដ្ឋមន្រ្តី ក៏បានធ្វើការណែនាំដល់ក្រុមហ៊ុន អោយពាំនាំដល់បណ្តាក្រុមហ៊ុនវិនិយោគផ្សេងៗទៀតនូវ បញ្ហាប្រឈមនៅកម្ពុជាដូចជា តម្លៃថាមពលអគ្គិសនី និងការដឹកជញ្ជូនផ្លូវទឹក និងអាកាស ដែលមិនទាន់មានភាពប្រកួតប្រជែងទៅនឹងប្រទេសក្នុងតំបន់ ហើយ ឯកឧត្តមរដ្ឋមន្រ្តី ក៏បានស្នើអោយក្រុមហ៊ុនវិនិយោគទាំងអស់ ចូលរួមគិតគូរនូវមធ្យោបាយក្នុងការដោះស្រាយនូវបញ្ហាទាំងនេះដូចជា ការប្រើប្រាស់ថាមពលពន្លឺព្រះអាទិត្យនៅក្នុងឧស្សាហកម្មកសិកម្ម ពង្រីកទំហំការដឹកជញ្ជូនទាំងផ្លូវទឹក និងអាកាស ហើយបញ្ជូនទៅដល់គោលដៅចុងក្រោយ ដើម្បីអោយតម្លៃកសិផលកម្ពុជាអាចប្រកួតប្រជែងនៅលើទីផ្សារអន្តរជាតិបាន។