ឯកឧត្តមអនុរដ្ឋលេខាធិការ ឡោ រស្មី អញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលអប់រំសមត្ថភាពវិជ្ជាជីវៈដល់អាជីវករធ្វើពាណិជ្ជកម្មជី-ថ្នាំកសិកម្ម នៅខេត្តបាត់ដំបង

ចេញ​ផ្សាយ​ ៩ មិថុនា ២០២៥ 1973

នៅថ្ងៃទី៩ ខែមិថុនា ឆ្នាំ២០២៥ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលអប់រំសមត្ថភាពវិជ្ជាជីវៈដល់អាជីវករលក់ជី-ថ្នាំកសិកម្ម ដោយមានការចូលរួមពីលោក ឈឹម វជិរា ប្រធានមន្ទីរកសិកម្មខេត្តបាត់ដំបង មន្រ្តីជំនាញនៃអគ្គនាយកដ្ឋានកសិកម្មដែលជាគ្រូឧទ្ទេស លោក លឹម អ៊ីម៉េង ប្រធានអង្គភាពច្រកចេញចូលតែមួយនៃរដ្ឋបាលខេត្ត និងមានសិក្ខាកាមចូលរួមសរុប១៤០នាក់។
នាឱកាសនោះដែរ ឯកឧត្តមអនុរដ្ឋលេខាធិការ បានថ្លែងអំណរគុណដល់រដ្ឋបាលខេត្ត អង្គភាពជំនាញ និងមន្ទីរកសិកម្មខេត្តដែលបានសហការយ៉ាងល្អប្រសើរក្នុងការអភិវឌ្ឍវិស័យកសិកម្មនៅខេត្តបាត់ដំបង និងការគ្រប់គ្រងដល់អាជីវករជី-ថ្នាំកសិកម្ម ការទប់ស្កាត់ការនាំចូលជី-ថ្នាំកសិកម្មដោយខុសច្បាប់ នៅតាមច្រកព្រំដែន ដោយអនុវត្តវិធានបច្ចេកទេស និងនីតិវិធីជាធរមាន និងការជួយដោះស្រាយបញ្ហាប្រឈមដែលប្រជាកសិករជួបប្រទះ។ ទន្នឹមនឹងនោះ ឯកឧត្តមក៏បានលើកឡើងអំពីគោលនយោបាយអាទិភាពរបស់រាជរដ្ឋាភិបាល ការអភិវឌ្ឍសហគមន៍កសិកម្មទំនើប និងការដាក់ពង្រាយមន្រ្តីកសិកម្មឃុំ ដែលជាតួអង្គដ៏សំខាន់ក្នុងកិច្ចសហការជាមួយអាជីវករជី-ថ្នាំកសិកម្ម ការជួយដល់ប្រជាកសិករក្នុងការប្រើប្រាស់ជី-ថ្នាំកសិកម្មស្របតាមស្តង់ដារបច្ចេកទេសប្រកបដោយគុណភាព សុវត្ថិភាព ដើម្បីជួយរក្សាលំនឹងថ្លៃកសិផល ការកាត់បន្ថយថ្លៃដើមផលិត ឆ្លើយតបទៅនឹងគោលនយោបាយរបស់រាជរដ្ឋាភិបាល។
ជាមួយគ្នានេះដែរ ឯកឧត្តមអនុរដ្ឋលេខាធិការ បានរំលេចអំពីសមិទ្ធផលជាច្រើនដែលក្រសួងកសិកម្ម សម្រេចបាន ការគាំទ្រដល់វិស័យឯកជនក្នុងការផលិតជីកសិកម្មក្នុងស្រុក ដើម្បីកាត់បន្ថយការនាំចូល និងកិច្ចសហការក្នុងការនាំចូលជី-ថ្នាំកសិកម្មប្រកបដោយគុណភាពស្របតាមបមាណីយ និងការប្រើប្រាស់ដ្រូនបាញ់ថ្នាំកសិកម្មឱ្យបានត្រឹមត្រូវតាមបច្ចេកទេស ដើម្បីជៀសវាងផលប៉ះពាល់ដល់សុខសុវត្ថិភាពសង្គម និងបរិស្ថាន។
មុននឹងបញ្ចប់ ឯកឧត្តម ឡោ រស្មី បានណែនាំដល់សិក្ខាកាមទាំងអស់ត្រូវយកចិត្តទុកដាក់ចូលរួមវគ្គបណ្តុះបណ្តាលនេះ ឱ្យបានពេញលេញ ដើម្បីក្លាយជាអាជីវករលក់ជី-ថ្នាំកសិកម្ម ប្រកបដោយមន:សិការវិជ្ជាជីវៈ ហើយអាជីវករក៏បានបង្ហាញនូវក្តីសោមនស្សរីករាយ និងចូលរួមវគ្គបណ្តុះបណ្តាលនេះតាមកម្មវិធីដែលបានគ្រោងទុក ដើម្បីទទួលបានចំណេះដឹងថ្មីៗ និងជួយផ្សព្វផ្សាយព័ត៌មានវិជ្ជមាន ជួយដល់ប្រជាកសិករ និងការរួមចំណែកអភិវឌ្ឍវិស័យកសិកម្មនៅកម្ពុជា ជាពិសេសនៅខេត្តបាត់ដំបង៕