ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញចុះទស្សនកិច្ច ពិនិត្យនិងស្វែងយល់កសិដ្ឋានចិញ្ចឹមត្រីចំនួន ៤ទីតាំង ស្ថិតនៅខេត្តសៀមរាប
ចេញផ្សាយ ៣ ឧសភា ២០២៥ 3094
នៅថ្ងៃទី២ ខែឧសភា ឆ្នាំ២០២៥ ឆ្លើយតបតាមការអញ្ជើញរបស់គម្រោងCAPFish Aqua-Culture IT2 ឯកឧត្ដម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះទស្សនកិច្ច ពិនិត្យ និងស្វែងយល់កសិដ្ឋានចិញ្ចឹមត្រីចំនួន៤ កសិដ្ឋាន រួមមាន៖ កសិដ្ឋានបង្កាត់ភ្ញាស់រដ្ឋាដា ស្ថិតនៅសង្កាត់ក្របី ក្រុងសៀមរាប កសិដ្ឋានចិញ្ចឹមត្រី កង សុខឡាយ និងកសិដ្ឋានចិញ្ចឹមត្រីរ៉ស់ Darren ស្ថិតនៅស្រុកប្រាសាទបាគង និងកសិដ្ឋានចិញ្ចឹមត្រីរុនតាឯក ស្ថិតនៅក្រុងរុនតាឯកតេជោសែន ខេត្តសៀមរាប។
ដំណើរចុះពិនិត្យនោះ ក៏មានការអញ្ជើញចូលរួមពីលោក នាង សាវុឌ្ឍឌី អនុប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផល លោកនាយខណ្ឌជលផលខេត្តសៀមរាប និងក្រុមការងារនៃគម្រោង CAPFish Aqua-Culture IT2 ផងដែរ។
គោលបំណងនៃទស្សនកិច្ចនេះ ដើម្បីស្វែងយល់ពីវឌ្ឍនភាព និងស្តាប់បញ្ហានានាពាក់ព័ន្ធនឹងការងារវារីវប្បកម្ម សំដៅដោះស្រាយ ជំរុញ និងគាំទ្របច្ចេកទេសដល់កសិដ្ឋានចិញ្ចឹមត្រី និងមន្ត្រីជំនាញក្នុងការអនុវត្តប្រកបដោយប្រសិទ្ធភាព និងប្រសិទ្ធផល។
ក្នុងឱកាសនោះ ឯកឧត្តមរដ្ឋលេខាធិការ បានណែនាំដល់មន្ត្រីជំនាញវារីវប្បកម្ម ត្រូវបន្តគាំទ្របច្ចេកទេស និងជួយសម្របសម្រួល ដោះស្រាយនូវរាល់បញ្ហានានារបស់ម្ចាស់កសិដ្ឋានចិញ្ចឹមត្រី ឱ្យបានទាន់ពេលវេលា និងបានណែនាំដល់ម្ចាស់កសិដ្ឋាន បង្កើនការយកចិត្តទុកដាក់បន្ថែមក្នុងការរៀបចំកសិដ្ឋានឱ្យមានរបៀបរៀបរយ រៀបចំកន្លែងទុកដាក់ចំណីត្រីឱ្យបានល្អ ធ្វើបច្ចុប្បន្នភាពកសិដ្ឋានឱ្យមានភាពទាក់ទាញដល់អតិថិជនជាដើម៕
