ព័ត៌មានផ្សេងៗទៀត
ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារចុះពិនិត្យ និងអនុវត្ដគម្រោងកែលម្អសន្តិសុខទឹកកម្ពុជា(CaWSIP) នៅខេត្តក្រចេះ
ចេញផ្សាយ ២៧ សីហា ២០២៥ 874
នៅថ្ងៃទី២៧ ខែសីហា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP បានអញ្ជើញដឹកនាំក្រុមការងារចុះពិនិត្យ និងអនុវត្តគម្រោងកែលម្អសន្តិសុខទឹកកម្ពុជា (CaWSIP) នៅខេត្តក្រចេះ។
ក្នុងដំណើរបេសកកម្ម ឯកឧត្តមរដ្ឋលេខាធិការ បានដឹកនាំក្រុមការងារជួបពិភាក្សាជាមួយតំណាងសហគមន៍កសិកម្ម និងសហគមន៍ព្រៃឈើ ដែលស្ថិតក្នុងវិសាលភាពគម្រោង ក្នុងឃុំថ្មី និងឃុំកន្ទួតនៃស្រុកចិត្របុរី។ កិច្ចពិភាក្សា ផ្ដោតលើព័ត៌មានចាំបាច់ លើការវាយតម្លៃសក្តានុពលដំណាំ ស្ថានភាពសហគមន៍កសិកម្ម និងសហគមន៍ព្រៃឈើ ដើម្បីជំរុញការអនុវត្តន៍គម្រោង លើការផ្ដល់ផ្ទះសំណាញ់ ការចិញ្ចឹមឃ្មុំ និងការជំរុញការចងក្រងបង្កើតសហគមន៍កសិកម្មទំនើប។
បើតាមឯកឧត្តមរដ្ឋលេខាធិការ កិច្ចពិភាក្សានេះ បានពិនិត្យលើបញ្ហាសំខាន់ៗពាក់ព័ន្ធ ដែលទាមទាកិច្ចសហការរវាងមន្រ្ដីបច្ចេកទេសអនុវត្តគម្រោងថ្នាក់ជាតិ-ខេត្ដ ជាមួយថ្នាក់មូលដ្ឋាន ឱ្យកាន់តែស្និទស្នាល បង្កើននូវប្រសិទ្ធភាពការងារ ការរៀបចំផែនការផលិតកម្មផ្គត់ផ្គង់ទីផ្សារប្រកបដោយនិរន្តរភាព ដើម្បីឱ្យគម្រោងទទួលបានកិច្ចដំណើរការទៅមុខប្រកបដោយប្រសិទ្ធភាព និងប្រសិទ្ធផលខ្ពស់ ស្របតាមគោលដៅគម្រោងដែលបានកំណត់។
ជាទីបញ្ចប់ ឯកឧត្ដមរដ្ឋលេខាធិការ និងក្រុមការងារ បានចុះពិនិត្យអាងស្តុកទឹក ទ្វារទឹក និងពិនិត្យស្ថានភាពផលិតកម្មកសិកម្ម ក្នុងនោះក៏បានចុះដល់ទីតាំងផលិតកម្ម ដែលនឹងជំរុញកសិកម្មឆ្លាតវៃ ទីតាំងសាងសង់ផ្ទះសំណាញ់ និងឃ្លាំងប្រមូលផ្ដុំកសិផល ក្នុងតំបន់សាលភាពគម្រោង ស្ថិតក្នុងឃុំថ្មី និងឃុំកន្ទួត ស្រុកចិត្របុរី ខេត្ដក្រចេះ ផងដែរ៕
