ឯកឧត្តមអនុរដ្ឋលេខាធិការ ឃឹម ហ្វីណង់ អញ្ជើញដឹកនាំក្រុមការងារចុះពិនិត្យស្ថានភាពជាក់ស្តែងនៅតាមតំបន់ដែលកំពុងរងផលប៉ះពាល់ដោយសារជំនន់ទឹកភ្លៀង នៅស្រុកអូរជ្រៅ ខេត្តបន្ទាយមានជ័យ

ចេញ​ផ្សាយ​ ២៧ កញ្ញា ២០២៦ 422

នាថ្ងៃទី២៦ ខែកញ្ញា ឆ្នាំ២០២៦ ឯកឧត្តមអនុរដ្ឋលេខាធិការ ឃឹម ហ្វីណង់ ទទួលបន្ទុកជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារចុះពិនិត្យស្ថានភាពជាក់ស្តែងនៅតាមតំបន់ដែលកំពុងរងផលប៉ះពាល់ដោយសារជំនន់ទឹកភ្លៀង នៅឃុំអូរបីជាន់ និងឃុំកូប នៃស្រុកអូរជ្រៅ ខេត្តបន្ទាយមានជ័យ។
កិច្ចការចម្បងរបស់ ឯកឧត្តមអនុរដ្ឋលេខាធិការ គឺដើម្បីសម្របសម្រួលជម្លៀសបងប្អូនប្រជាពលរដ្ឋដែលរងការលិចលង់ធ្ងន់ធ្ងរ ទៅកាន់ទីទួលសុវត្ថិភាពបានទាន់ពេលវេលា ព្រមទាំងនាំយកថវិការបស់ឯកឧត្តមរដ្ឋមន្រ្តី ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ដើម្បីជួយគាំទ្របឋមដល់ពួកគាត់។
គិតត្រឹមថ្ងៃទី២៦ ខែកញ្ញា ឆ្នាំ២០២៦ មានផ្ទះបងប្អូនប្រជាពលរដ្ឋជិត ៦០០គ្រួសារ ដែលកំពុងទទួលផលប៉ះពាល់ និងមានប្រជាពលរដ្ឋនៅឃុំអូរបីជាន់ចំនួន ៦០គ្រួសារ ត្រូវបានជម្លៀសទៅកាន់ទីទួលសុវត្ថិភាព។ 
ឯកឧត្តមអនុរដ្ឋលេខាធិការ សូមថ្លែងអំណរគុណយ៉ាងជ្រាលជ្រៅចំពោះអាជ្ញាធរមូលដ្ឋាន និងក្រុមការងារ ដែលបានខិតខំប្រឹងប្រែង និងឆ្លើយតបជួយសង្គ្រោះប្រជាពលរដ្ឋយើងបានឆាប់រហ័សនិងទាន់ពេលវេលា និងសូមអំពាវនាវដល់ពុកម៉ែបងប្អូន ជាពិសេសអ្នករស់នៅតំបន់មុខទឹក សូមបង្កើនការប្រុងប្រយ័ត្នខ្ពស់។ ក្រុមការងារទាំងអស់នឹងបន្តប្រចាំការជួយគាំទ្រ ដើម្បីត្រៀមអន្តរាគមន៍ជួយសង្គ្រោះក្នុងករណីចាំបាច់បន្ទាន់៕