ឯកឧត្តម គង់ ច័ន្ទវាសនា​ ទទួលជួបសមាគម​សម្ព័ន្ធអ្នក​សារព័ត៌មានដើម្បីសេដ្ឋកិច្ច (ស.ស.ស)​

ចេញ​ផ្សាយ​ ១២ សីហា ២០២៥ 642

នៅរសៀលថ្ងៃទី១១ ខែសីហា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដោយថ្នាក់ដឹកនាំក្រសួង​ និងមន្ត្រីជំនាញ​ បានអនុញ្ញាតឱ្យសមាគមសម្ព័ន្ធអ្នក​សាព័ត៌មានដើម្បីសេដ្ឋកិច្ច ចូលជួបពិគ្រោះយោបល់លេីការងារទប់ស្កាត់ចរាចរថ្នាំកសិកម្មហាមឃាត់នៅកម្ពុជា។

ជាកិច្ចចាប់ផ្តើម ឯកឧត្ដមរដ្ឋលេខាធិការ បានលើកឡើងអំពីកិច្ចខិតខំប្រឹងប្រែងជាច្រេីនរបស់ក្រសួងលេីការគ្រប់គ្រង និងទប់ស្កាត់​ចរាចរ​ និងអាជីវកម្មជី-ថ្នាំកសិកម្ម​ខុសច្បាប់ នៅកម្ពុជា​ ជាពិសេស ប្រភេទថ្នាំកសិកម្ម​ដែលស្ថិតក្នុងបញ្ជីហាមឃាត់​។

ឯកឧត្តមបានបញ្ជាក់ច្បាស់ៗថា ក្រសួងមិនអនុញ្ញាតឱ្យចុះបញ្ជិកា ឬនាំចូលថ្នាំកសិកម្មហាមឃាត់នោះទេ​ ​ហេីយក្រសួងតែងចុះត្រួតពិនិត្យ និងទទួលបានកិច្ចសហការល្អ​ពីរដ្ឋបាលខេត្តជាប់ព្រំដែន និងអាជ្ញាធរគ្រប់គ្រងច្រកព្រំដែនជាបន្តបន្ទាប់ ដើម្បីរួមគ្នាបង្កា​រទប់ស្កាត់ការនាំចូល​ និងចរាចរជី-ថ្នាំកសិកម្មខុសច្បាប់​ ដេីម្បីការពារផល​ប្រយោជន៍ប្រជាកសិករ​ និងក្រុមហ៊ុនស្របច្បាប់។ សូមបញ្ជាក់ជូនថា​ ថ្នាំកសិកម្មដែលស្ថិតក្នុងបញ្ជីហាមឃាត់​ គឺជាប្រភេទថ្នាំកសិកម្មដែលមានហានិភ័យ​ និងគ្រោះថ្នាក់ខ្លាំងចំពោះមនុស្ស​ សត្វ​ និងរុក្ខជាតិ​ ហេីយ​ក្រសួងយកចិត្តទុកដាក់គ្រប់គ្រង​ ក្នុងស្មារតី​ទទួលខុសត្រូវខ្ពស់បំផុត។ សូមជូនបញ្ជីថ្នាំកសិកម្មស្ថិតក្នុងបញ្ជីហាមឃាត់​ និងបញ្ជីស្ថិតក្នុងលក្ខខណ្ឌ​ ដែលក្រសួងកសិកម្ម​ រុក្ខាប្រមាញ់​ និងនេសាទ​ មិនអនុញ្ញាត​ឱ្យចុះបញ្ជិកា​ ឬនាំចូល។

ទន្ទឹមនេះ​ មន្ត្រីជំនាញរបស់ក្រសួង និងមន្ទីរកសិកម្មរាជធានី/ខេត្ត តែងចុះត្រួតពិនិត្យឃ្លាំង និងដេប៉ូជី-ថ្នាំកសិកម្មជាប់ជាប្រចាំនៅទូទាំងប្រទេស ដើម្បីពង្រឹងការអនុវត្តច្បាប់​ រួមទាំងបន្តតាមដាន​ប្រព័ន្ធបណ្តាញសង្គមដែលផ្សព្វផ្សាយ​ និងលក់ជី-ថ្នាំកសិកម្មផងដែរ ដើម្បីអប់រំណែនាំឱ្យគោរព និងអនុវត្តច្បាប់ឱ្យបានខ្ជាប់ខ្ជួន។

តំណាងសមាគមសម្ព័ន្ធអ្នកសារព័ត៌មានដើម្បីសេដ្ឋកិច្ចបានកោតសរសើរ និងថ្លែងអំណរគុណក្រសួង​ ចំពោះកិច្ចខិតខំប្រឹងប្រែង និងសកម្មភាពការងារជាច្រើន​ នាពេលកន្លងមក​ និងបានបង្ហាញពីបំណងចូលរួមសហការ ក្នុងករណីទទួលបានព័ត៌មានជាក់លាក់អំពីអាជីវកម្ម និងចរាចរថ្នាំកសិកម្មខុសច្បាប់។

ជាចុងក្រោយ ឯកឧត្តមរដ្ឋលេខាធិការបាន​ស្វាគមន៍ឆន្ទ:ចូលរួមសហការរបស់សមាគម ប្រសិនបេី​ទទួលបានព័ត៌មានជាក់លាក់ណាមួយអំពីចរាចរថ្នាំកសិកម្មហាមឃាត់​ ដេីម្បីពង្រឹងការអនុវត្តច្បាប់ និងការពារសុខមាលភាពសាធារណៈ៕