ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារជំនាញ ចុះពិនិត្យនិងវាយតម្លៃពីការប្រមូលផលដំណាំស្វាយចន្ទី នៅក្នុងខេត្តក្រចេះ

ចេញ​ផ្សាយ​ ២ ឧសភា ២០២៥ 2300

នៅថ្ងៃទី២ ខែឧសភា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  បានអញ្ជើញដឹកនាំក្រុមការងារចុះពិនិត្យនិងវាយតម្លៃពីការប្រមូលផលគ្រាប់ស្វាយចន្ទីនៅសហគមន៍កសិកម្មសម្បទានចំបក់ និងសហគមន៍កសិកម្មឫស្សីកែវ នៅស្រុកព្រែកប្រសព្វ ខេត្តក្រចេះ។

ក្នុងដំណើរនេះ ក៏មានការចូលរួមពីលោក ធីវ វណ្ណធីរ ប្រធាននាយកដ្ឋានដំណាំឧស្សាហកម្ម នៃអគ្គនាយកដ្ឋានកសិកម្ម  លោក ង៉ែត សុគន្ធា ប្រធានការិយាល័យអភិវឌ្ឍន៍សហគមន៍កសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ និងលោក អ៊ុំ សុខចំរើន ទីប្រឹក្សាកម្មវិធីASPIRE-AT ខេត្តក្រចេះ និងលោកមេឃុំចំបក់ និងលោក ប៉ែន បាន ប្រធានសហគមន៍កសិកម្មសម្បទានចំបក់ និងបានជួបសំណេះសំណាលជាមួយបងប្អូនសមាជិកសហគមន៍តំណាងសហគមន៍ទាំងពីរខាងលើនេះ។

ជាមួយគ្នានេះ ឯកឧត្តមរដ្ឋលេខាធិការគូសបញ្ជាក់ថា ការប្រមូលផលគ្រាប់ស្វាយចន្ទីនៅសហគមន៍កសិកម្មសម្បទានចំបក់ បានប្រមាណជាង៧០ភាគរយ ហើយអាចបញ្ចប់ការប្រមូលផលនៅចុងខែឧសភា បើទោះបីមានបញ្ហាអាកាសត្រជាក់អូសបន្លាយយូរមែន តែគ្រាប់គុណភាពល្អ ក្នុង១គីឡូក្រាម ចន្លោះពី៩៥ ទៅ ១០០គ្រាប់ ជាទូទៅ១គីឡូក្រាម មានចំនួនចន្លោះពី១១០ ទៅ១២០គ្រាប់។  នៅឆ្នាំនេះ គ្រាប់ស្វាយចន្ទីសើមមានតម្លៃ នៅដើមរដូវប្រមូលផល៦៥០០រៀល ហើយបច្ចុប្បន្ននេះ មានតម្លៃចន្លោះពី ៥០០០- ៥៥០០រៀលក្នុង១គីឡូក្រាម ទៅតាមតំបន់ និងគុណភាពគ្រាប់ បើប្រៀបធៀបរយៈពេល៥ឆ្នាំ ចាប់ពីឆ្នាំ២០២១-២០២៥ យើងសង្កេតឃើញថា តម្លៃគ្រាប់ស្វាយចន្ទីឆ្នាំ២០២៥នេះ មានតម្លៃខ្ពស់ជាងគេ។

បើតាមឯកឧត្តម បញ្ហាប្រឈម មានភ្លៀងកក់ខែច្រើននៅក្នុងខែចេត្រ ធ្វើឱ្យប៉ះពាល់ និងខូចជ្រុះក្តឹបនិងផ្កាចន្ទីដែលទើបនឹងចេញវគ្គចុងក្រោយនេះ និងខ្វះកម្លាំងពលកម្ម។ ដោយឡែកតំបន់ដែលមានភ្លៀងតិចតួច ទិន្នផលអាចកើនឡើង។ ហើយការប្រមូលផលឆ្នាំនេះអាចបញ្ចប់យឺតជាងឆ្នាំកន្លងមក។
ឆ្លៀតក្នុងឱកាសនេះ ឯកឧត្តមរដ្ឋលេខាធិការ បានណែនាំដល់កសិករ ត្រូវត្រៀមការងារតាក់តែងមែក ដាក់ជីបំប៉ននៅពេលបញ្ចប់ការប្រមូលផលភ្លាម ព្រោះតាមការព្យាករណ៍របស់ក្រសួងធនធានទឹក និងឧតុនិយម ឆ្នាំនេះមានភ្លៀងចាប់ពីចុងខែមេសា រហូតដល់ខែតុលា។ បើការរៀបចំតាក់តែងមែក និងជីបំប៉ន មានការយឺតយ៉ាវអាចប៉ះពាល់ដល់ការលូតលាស់របស់ស្វាយចន្ទី៕