ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ខាត់ សុធី អញ្ជើញជាអធិបតីភាពក្នុងវគ្គបណ្តុះបណ្តាលស្តីពី «ការអនុវត្តន៍កសិកម្មវៃឆ្លាត ដើម្បីអាហារូបត្ថម្ភ» ដល់មន្ត្រីកសិកម្មឃុំ ខេត្តកំពង់ធំ
ចេញផ្សាយ ៨ ឧសភា ២០២៥ 3669
នៅថ្ងៃទី៧-ទី៨ ខែឧសភា ឆ្នាំ២០២៥ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ អញ្ជើញជាអធិបតីភាពក្នុងវគ្គបណ្តុះបណ្តាលស្តីពី «ការអនុវត្តន៍កសិកម្មវៃឆ្លាត ដើម្បីអាហារូបត្ថម្ភ» ដល់មន្ត្រីកសិកម្មឃុំ ខេត្តកំពង់ធំ។ ក្នុងនោះមានការចូលរួមពី លោក យឹម សារុំ ទីប្រឹក្សាក្រសួងកសិកម្ម លោក ដៀប ពិសិដ្ឋ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ លោកផាន ទូច ប្រធានការិយាល័យតំបន់ទន្លេសាប នៃនាយកដ្ឋានផ្សព្វផ្សាយ កសិកម្ម រុក្ខាប្រមាញ់ និងនេសាទ រួមជាមួយមន្ត្រីកសិកម្មឃុំ សរុបអ្នកចូលរួមប្រមាណ៧០រូប។
ថ្លែងក្នុងពិធីបើកវគ្គបណ្តុះបណ្តាល ឯកឧត្តម ខាត់ សុធី បានគូសបញ្ជាក់ថា ការបណ្តុះបណ្តាលអំពីកសិកម្មវៃឆ្លាត ដើម្បីអាហារូបត្ថម្ភ ដល់មន្ត្រីកសិកម្មឃុំនាពេលនេះ កំពុងដើរស្របនឹងយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាល ក្នុងការលើកកម្ពស់វិស័យកសិកម្ម សម្រាប់ទ្រទ្រង់កំណើនសេដ្ឋកិច្ចជាតិ ធានាសន្តិសុខស្បៀង និងជំរុញការអភិវឌ្ឍសេដ្ឋកិច្ចជនបទ។ ឯកឧត្តមបានថ្លែងអំណរគុណដល់អង្គការហេឡែន ខេលល័រ ដែលបានគាំទ្រ និងសហការជាមួយក្រសួងកសិកម្ម ជាពិសេសគាំទ្រលើគោលនយោបាយអាទិភាពទី៦ ក្នុងការដាក់ពង្រាយមន្ត្រីកសិកម្មឃុំ សង្កាត់នេះតែម្តង។
ទន្ទឹងនឹងនោះ ឯកឧត្តមអនុរដ្ឋលេខាធិការ ក៏បានជំរុញ លើកទឹកចិត្តមន្ត្រីកសិកម្មឃុំ សង្កាត់ទាំងអស់ ត្រូវប្រឹងប្រែងយកចិត្តទុកដាក់សិក្សារៀនសូត្រ ទទួលយកនូវចំណេះដឹងបទពិសោធន៍ថ្មីទាំងនេះ ដើម្បីទៅបម្រើកសិករនៅឯមូលដ្ឋានឃុំ សង្កាត់របស់ខ្លួន ឱ្យបានល្អសំដៅលើកកម្ពស់ជីវភាពកសិករនៅតាមជនបទ បង្កើនប្រាក់ចំណូលពីវិស័យកសិកម្មនេះ។
សូមបញ្ជាក់ថា វគ្គបណ្តុះបណ្តាលធ្វើឡើងរយៈពេល២ថ្ងៃ គឺថ្ងៃទី៧ និងទី៨ ខែឧសភា ក៏មានការដាក់បញ្ចូលនូវមេរៀនស្តីអំពី វិធីសាស្ត្រផ្សព្វផ្សាយ និងវិធីសាស្ត្រសម្របសម្រួល ដែលជាផ្នែកសំខាន់ និងចាំបាច់សម្រាប់មន្ត្រីកសិកម្មឃុំ សង្កាត់។ វគ្គបណ្តុះបណ្តាលនេះគាំទ្រដោយអង្គការហេឡែន ខេលល័រ អន្តរជាតិ សហការរៀបចំជាមួយនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ៕
