ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំក្រុមការងារចុះប្រតិបត្តិការត្រួតពិនិត្យ និងបង្ក្រាបបទល្មើសជលផល ក្នុងស្រុកកំពង់សៀម ខេត្តកំពង់ចាម
ចេញផ្សាយ ២០ ឧសភា ២០២៥ 2143
នៅថ្ងៃទី២០ ខែឧសភា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ តាមការណែនាំពីឯកឧត្តមរដ្ឋលេខាធិការ ហាស់ សារ៉េត រដ្ឋលេខាធិការ បានអញ្ជើញដឹកនាំកម្លាំងខណ្ឌរដ្ឋបាលជលផលខេត្តកំពង់ចាម អធិការដ្ឋានរដ្ឋបាលជលផលមេគង្គ អាជ្ញាធរស្រុកកំពង់សៀម អាជ្ញាធរឃុំវិហារធំ ប៉ុស្តិ៍នគរបាលរដ្ឋបាលវិហារធំ សហគមន៍នេសាទវិហារធំ និងសហគមន៍នេសាទសាមគ្គីឃុំមៀន ក្រោមការសម្របសម្រួលពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល ក្នុងស្រុកកំពង់សៀម ខេត្តកំពង់ចាម។
ក្នុងដំណើរនេះ ក្រុមការងារបានចុះបង្ក្រាបបទល្មើសនេសាទ បានចំនួនពីរករណី រួមមាន ៖ ករណីទី១ ឧករណ៍លូស្បៃមុងចំនួន០៨មាត់របាំងស្បៃមុងប្រវែង២៤០ម៉ែត្រ បង្គោលចម្រឹងចំនួន១២០ដើម និងចាក់លែងកូនត្រីទម្ងន់ ០៥គីឡូក្រាម ចូលបឹងធម្មជាតិវិញ។
ករណីទី២ នៅចំណុចមុខកោះសំពៅ ឃុំវិហារធំ ស្រុកកំពង់សៀម ខេត្តកំពង់ចាម ក្រុមការងារបង្ក្រាបបានឧបករណ៍រ៉ាវចំនួន ០៥មាត់ របាំងរ៉ាវប្រវែង ២៥០ម៉ែត្រ បង្គោលចម្រឹងចំនួន ១១០ដើម ចាក់លែងកូនត្រីទម្ងន់ ០៣គីឡូក្រាមនៅចំណុចដីក្រហម ឃុំវិហារធំ ស្រុកកំពង់សៀម ខេត្តកំពង់ចាម។
បើតាមឯកឧត្តមអនុរដ្ឋលេខាធិការ ក្រុមការងារនឹងបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តាលស្រុកក្នុងខេត្តកំពង់ចាម និងផ្សព្វផ្សាយដល់ប្រជានេសាទ សូមបញ្ឈប់ការនេសាទដោយប្រើប្រាស់ឧបករណ៍ល្មើសច្បាប់ជាដើម៕
