ឯកឧត្តមរដ្ឋមន្រ្តី វេង សាខុន បានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលមន្រ្តីក្របខ័ណ្ឌថ្មីឆ្នាំ២០១៧

ចេញ​ផ្សាយ​ ៨ មីនា ២០១៨ 3795

នៅទីស្តីការក្រសួងកាលពីរសៀលថ្ងៃអង្គារ ៦កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២០ ខែកុម្ភៈ ឆ្នាំ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលមន្រ្តីក្របខ័ណ្ឌថ្មី២០១៧ ដោយមានការអញ្ជើញចូលរួមផងដែរពីឯកឧត្តម លោកជំទាវជារដ្ឋលេខាធិការ អនុរដ្ឋលេខាធិការ ឯកឧត្តមប្រតិភូ ថ្នាក់ដឹកនាំនិងមន្រ្តីរាជការយ៉ាងច្រើនកុះករ។ លោកទី ចាន់ណា ប្រធាននាយកដ្ឋានបុគ្គលិក និងអភិវឌ្ឍធនធានមនុស្ស បានរាយការណ៍ជូនអង្គពិធីជ្រាបថា នៅក្នុងឆ្នាំ២០១៧ មាននិស្សិតដាក់ពាក្យប្រឡងចូលក្របខ័ណ្ឌជាមន្រ្តីរាជការក្រសួងមានចំនួន២២១១ នាក់ ក្នុងនោះ ១៨៤ នាក់បានទទួលជ័យលាភីប្រឡងជាប់ ហើយដែលត្រូវបែងចែកទៅតាមអគ្គនាយកដ្ឋាន នាយកដ្ឋាន ខេត្ត ក្រុង និងវិទ្យាស្ថាននានា។ វគ្គបណ្តុះបណ្តាលនេះមានរយៈពេល ៣ ថ្ងៃដែលត្រូវសិក្សាលើប្រធានបទជាអាទិ៍ រចនាសម្ព័ន្ធគ្រប់គ្រងរបស់ ក្រសួង សហលក្ខន្តិកៈរបស់មន្រ្តីរាជការស៊ីវិលដើម្បីបង្កើនសមត្ថភាពដល់មន្រ្តីដែលទើបចូលបម្រើការងារ។ មានមតិសំណេះសំណាល នាឱកាសនេះ ឯកឧត្តមរដ្ឋមន្រ្តីបានធ្វើការកោតសរសើរនិងវាយតម្លៃខ្ពស់់ចំពោះក្មួយៗ ទទួលបានជ័យលាភីទាំង ១៨៤ រូបដែលនឹងក្លាយខ្លួនជាមន្រ្តីរាជការក្នុងក្រសួងនាពេលអនាគតឆាប់ៗនេះ។ ឯកឧត្តមរដ្ឋមន្រ្តីបានគូសបញ្ជាក់ថា បច្ចុប្បន្ននេះប្រទេសជាតិមានសុខសន្តិភាព និងការអភិវឌ្ឍលើគ្រប់វិស័យ ជាពិសេសវិស័យ កសិកម្មដែលបាននិងកំពុងប្រែក្លាយវិស័យមួយនេះពីរបៀបធ្វើកសិកម្មជាលក្ខណៈគ្រួសារ កសិកម្មតាមបែបប្រពៃណី មកធ្វើកសិកម្មតាមបែបប្រពលវប្បកម្មនិងទំនើបកម្មកសិកម្មវិញ។ នេះជារបត់មួយយ៉ាងសំខាន់ក្នុងការអភិវឌ្ឍវិស័យកសិកម្ម ក្នុងខណៈដែលកំលាំងពលកម្មកសិកម្មបាននិងកំពុងមានការធ្លាក់ចុះជាបន្តបន្ទាប់ តាមការព្យាករណ៍របស់ក្រសួងបានបង្ហាញថាកំលាំងពលកម្មនេះនឹងអាចធ្លាក់ចុះនៅត្រឹម២៩% នាឆ្នាំ២០៣០ និងឈានទៅដល់២២% នាឆ្នាំ២០៥០។ អាស្រ័យហេតុនេះ ឯកឧត្តមរដ្ឋមន្រ្តីបានផ្តាំផ្ញើដល់ក្មួយៗទាំង១៨៤ រូបឲ្យយកចិត្តទុកដាក់សិក្សារៀនសូត្រ និងស្រាវជ្រាវលើគ្រប់មុខជំនាញបច្ចេកទេស ច្បាប់ និងសហលក្ខន្តិកៈមន្រ្តីរាជការ ដើម្បីបំពេញបន្ថែមនូវរាល់ចំណុចខ្វះខាតទាំងទ្រឹស្តីនិងការអនុវត្ត ធ្វើយ៉ាងណាប្រែក្លាយខ្លួនឲ្យទៅជាមន្រ្តីមានសមត្ថភាព ឆ្លាតវៃ រស់រវើក សាកសមជាមន្រ្តីរាជការដែលមានឧត្តមភាពក្នុងការបំពេញការងារជូនក្រសួង ក៏ដូចជាជូនប្រទេស ជាតិ និងប្រជាជននាពេលអនាគត។ ក្រៅពីនេះក្មួយៗត្រូវគោរពវិន័យ ច្បាប់សហលក្ខន្តិកៈរបស់មន្រ្តីរាជការស៊ីវិល ក្រមសីលធម៌ និងត្រូវមានភាពទទួលខុសខ្ពស់សាកសមជាមន្រ្តីល្អ និងជាពលរដ្ឋល្អក្នុងសង្គម។ ត្រូវយកចិត្តទុកដាក់រៀនសូត្របន្ថែមពីរាមច្បងនូវរាល់ចំណុចខ្លាំងនិងចំណុចខ្សោយ ដោយត្រូវចេះបង្កើតជាចម្ងល់ សំណួរដើម្បីផ្លាស់ប្តូរបទពិសោធន៍ ឈានទៅរកដំណោះស្រាយត្រឹមត្រូវមួយដែលអាចអភិវឌ្ឍខ្លួនឯងនិងអភិវឌ្ឍស្ថាប័នរបស់ខ្លួនឲ្យមានការរីកចម្រើន។