ព័ត៌មានផ្សេងៗទៀត
មានដីមានស្រែគឺមានលុយ, កុំលក់ឆ្នាំងបាយ
ចេញផ្សាយ ១៧ មករា ២០១៨ 4601
ឯកឩត្តម បណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវ សុំឪ្យកសិករប្រើប្រាស់ដីស្រែដែលមាន ឱ្យអស់ពីលទ្ធភាព។ ជាប្រការល្អ គឺកុំលក់ដីស្រែ ព្រោះវាជាឆ្នាំងបាយរបស់យើង ។
ឯកឩត្តមរដ្ឋមន្ត្រី បានអញ្ជើញចុះពិនិត្យការធ្វើស្រែប្រពលវប្បកម្ម តាមគោលការណ៍ធម្មជាតិ ហៅកាត់ថា ប.វ.ស និងជួបកសិករចំនួន ១៥០ គ្រួសារ នៅភូមិភ្នំកុយ ឃុំសាលាក្រៅ ស្រុកសាលាក្រៅ កាលពីដើមសប្តាហ៏នេះ។ មន្ត្រីខុទ្ទកាល័យ ឯកឧត្តមរដ្ឋមន្ត្រី បានអោយដឹង កាលពីរសៀលថ្ងៃទី ១៦ នេះថា នៅទីនោះឯកឩត្តមរដ្ឋមន្ត្រី បានរំលឹកដល់កសិករថា កសិករក្នុងខេត្តប៉ៃលិន ជារួមមានដីស្រែតូចៗ ដូច្នេះសូមកុំលក់ដីស្រែនេះ ។
លក់ដីស្រែមានន័យថា យើងលក់ឆ្នាំងបាយហើយ ។ លក់ដីស្រែ គ្មានការងារធ្វើ តែទៅធ្វើជាកម្មករបានកំរៃតិចតួច ។ ខ្លះធ្វើចំណាកស្រុកចោលកូនប្រពន្ធ បែកគ្រួសារ ផ្ទុយទៅវិញ យើងគួរតែប្រើប្រាស់ដី ដែលមានស្រាប់នេះ អោយអស់លទ្ធភាព ។
ដីស្រែតូច សមាជិកគ្រួសារកើនឡើង កសិផលមិនត្រូវបានធានាចំពោះតំរូវការ ធ្វើអោយមានអសន្តិសុខស្បៀងក្នុងគ្រួសារ ដូច្នេះមានតែបង្កើនសមត្ថភាពផលិតក្នុងដីដែលមានស្រាប់។ ក្រោយពេលច្រូតកាត់រួច ត្រូវប្រើប្រាស់ដីស្រែនេះ ទៅជាដីចំការវិញ (ល្ពៅ ត្រសក់ ឪឡឹក បន្លែស្ពៃ សាឡាត់ ) ដើម្បីបំរើអោយសេចក្តីត្រូវការក្នុងគ្រួសារ និងផ្គត់ផ្គងអោយទីផ្សា និងសណ្ឋាគារ ។ ជាមួយគ្នានេះ ត្រូវយកចិត្តទុកដាក់ក្នុងការចិញ្ចឹមសត្វ ត្រី ពិសេសសត្វគោ ព្រោះតំបន់នេះសំបូរស្មៅល្អ ។
មន្ទីកសិកម្មត្រូវ ឩស្សាហ៏ចុះមូលដ្ឋាន ដើម្បីតាមដានការងារបង្ករបង្កើនផល របស់បងប្អូនប្រជាកសិករ ។ ទទួលយកនិងដោះស្រាយបញ្ហា ដែលពួកគាត់ជួបប្រទះ ។ ចុះផ្សព្វផ្សាយបច្ចេកទេស រៀបចំប្រជុំធ្វើសិក្ខាសាលា កៀងគរក្រុមហ៊ុនឯកជន និងដៃគូរអភិវឌ្ឍន៏នានា អោយគេជួយលើការងារបច្ចេកទេស ផ្សព្វផ្សាយឥណទាន ធ្វើយ៉ាងណាអោយការងារកសិកម្មក្នុងមូលដ្ឋានរបស់យើងមានការរីកចំរើន ។
ឯកឩត្តមរដ្ឋមន្ត្រី ក៏បានស្នើថា ការប្រើប្រាស់ថ្នាំកំចាត់ស្មៅ គឺមិនគួរប្រើទេ ព្រោះវាធ្វើអោយប៉ះពាល់ដល់សុខភាពមនុស្ស បំផ្លាញសត្វល្អិតមានប្រយោជន៏ ប៉ះពាល់ដល់បរិស្ថាន ៕
