ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា និង ឯកឧត្តម វ៉ា ពិសី ដឹកនាំក្រុមការងារជំនាញចុះពិនិត្យស្ថានភាពបទល្មើសនេសាទ ក្នុងខេត្តបាត់ដំបង និងខេត្តសៀមរាប
ចេញផ្សាយ ២១ សីហា ២០២៥ 435
នៅក្នុងរយៈពេល២ថ្ងៃ ទី២០-២១ ខែសីហា ឆ្នាំ២០២៥ ឯកឧត្តម ប៉ែន ផល្លីកា និង ឯកឧត្តម វ៉ា ពិសី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានដឹកនាំក្រុមការងារជំនាញ ដែលមាន លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ខា អ៊ីត អនុប្រធានការិយាល័យវិវាទកម្ម លោក ធានី សុទ្ធី នាយខណ្ឌរដ្ឋបាលជលផលសៀមរាប លោកនាយផ្នែកក្រឡាញ់ លោកនាយផ្នែកចុងឃ្នៀស និងនាយរងផ្នែករដ្ឋបាលជលផលព្រែកទាល់ សហគមន៍នេសាទពាក់ព័ន្ធ ឧត្តមសេនីយ៍ត្រី អាន ប៊ុនទិ មេបញ្ជារងយោធភូមិភាគទី៤ បានចុះត្រួតពិនិត្យស្ថានភាពបទល្មើសនេសាទ នៅក្នុងភូមិសាស្រ្តឃុំកោះជីវាំង ស្រុកឯកភ្នំ ខេត្តបាត់ដំបង និងភូមិសាស្រ្តឃុំកែវពណ៌ ស្រុកពួក ខេត្តសៀមរាប។
នាដំណើរបេសកកម្មនេះ ក្រុមការងារពុំបានជួបសកម្មភាពបទល្មើសជលផលនោះទេ ក្នុងតំបន់អតីតឡូត៍នេសាទលេខ៣ ជាពិសេសចុះត្រួតពិនិត្យការដាក់ឧបករណ៍នេសាទ លបណរ៉ាវ របស់ប្រជានេសាទ ដោយពួកគាត់ បានគោរពអនុវត្តតាមគោលការណ៍ របស់សមត្ថកិច្ចជំនាញនៅខេត្តបាត់ដំបង។ ដោយឡែកនៅភូមិសាស្រ្តឃុំកែវពណ៌ ស្រុកពួក ខេត្តសៀមរាប បង្រ្កាបបាន០១ករណី និងរឹបអូសបាន៖ របាំងស្បៃមុង១២របាំង ប្រវែង៦០០ម៉ែត្រ, ក្បាលស្បៃមុខ១៤គ្រឿង, ចម្រឹង២៥០ដើម និងបានលែងត្រីចម្រុះប្រមាណ៣០គីឡូក្រាម ចូលក្នុងបឹងទន្លេសាបវិញ ។
ឯកឧត្តម ប៉ែន ផល្លីកា ក៏បានផ្ដល់អនុសាសន៍ជូនក្រុមការងារ បន្តប្រឹងប្រែងបង្រ្កាបបទល្មើសនេសាទឆក់ចល័ត និងការពារកន្លែងអភិរក្សជលផល ចែកវេនចេញល្បាតទាំងយប់-ថ្ងៃ។ ទន្ទឹមនោះដែរ ឯកឧត្តមបានកោតសរសើរ និងថ្លែងអំណរគុណយ៉ាងជ្រាលជ្រៅ ដល់ក្រុមការងារចម្រុះដែលឈរជើងនៅតាមភូមិសាស្រ្តរបស់ខ្លួន សហការជាមួយក្រុមការងារកងយោធពលខេមរភូមិន្ទ ទទួលបន្ទុកការងារទប់ស្កាត់ និងបង្ក្រាបបទល្មើសធនធានធម្មជាតិក្នុងបឹងទន្លេសាប ក្នុងខេត្ដបាត់ដំបង និងសៀមរាប និងស្នើឱ្យសហការគ្នាកាន់តែជិតស្និទ្ធិបន្ថែមទៀត ក្នុងការអនុវត្តន៍ភារកិច្ច ជួយអភិរក្ស ធនធានជលផលនៅបឹងទន្លេសាប ដើម្បីជាប្រយោជន៍រួមទាំងអស់គ្នា៕
