ឯកឧត្តមរដ្ឋមន្រ្តី វេង សាខុន បានអញ្ជើញជាអធិបតីចូលរួមក្នុងពិធីបិទកិច្ចប្រជុំប្រចាំឆ្នាំ២០១៦និងលើកទិសដៅការងារសុខភាពសត្វ និងផលិតកម្មសត្វឆ្នាំ២០១៧

ចេញ​ផ្សាយ​ ២៤ កុម្ភៈ ២០១៨ 4016

នៅរសៀលថ្ងៃទី២១ ខែកុម្ភៈ ឆ្នាំ២០១៧ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន រដ្ឋមន្រ្តីនៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីចូលរួមក្នុងពិធីបិទកិច្ចប្រជុំប្រចាំឆ្នាំ២០១៦ និងលើកទិសដៅការងារសុខភាពសត្វ និងផលិតកម្មសត្វឆ្នាំ២០១៧។ អញ្ជើញចូលរួមក្នុងពិធីនោះមានឯកឧត្តម លោកជំទាវជាថ្នាក់ដឹកនាំក្រសួង និងឯកឧត្តម អស់លោក លោកស្រីជាថ្នាក់ដឹកនាំអង្គភាពក្រោមឱវាទក្រសួងទាំងអស់។ បន្ទាប់ពីឯកឧត្តម សេន សុវណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បង្ហាញអំពីលទ្ធផលនៃកិច្ចប្រជុំបូកសរុប និងលើកទិសដៅអនុវត្តសម្រាប់ឆ្នាំ២០១៧ ដោយបានឆ្លុះបញ្ចាំងឲ្យឃើញនូវស្ថានភាពជាក់ស្តែង សមិទ្ធផល បញ្ហាប្រឈមនានាដែលបានកើតឡើង ហើយដែលត្រូវរួមគ្នាខិតខំដោះស្រាយឱ្យបានតាមការរំពឹងទុក។ ឯកឧត្តមរដ្ឋមន្រ្តី បានសម្តែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងបំពេញភារកិច្ច ការលះបង់កម្លាំងកាយចិត្តរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ទាំងអស់របស់អគ្គនាយកដ្ឋានសុខភាពសត្វ និងផលិតកម្មសត្វ ជាពិសេសការចាត់ចែងអនុវត្ត ខ្លឹមសារអនុក្រឹត្យ លេខ២២៤ អនក្រ.បក ចុះថ្ងៃទី២៨ ខែតុលា ឆ្នាំ២០១៦ ក្នុងការរៀបចំរចនាសម្ព័ន្ធដឹកនាំ និងគ្រប់គ្រងអង្គភាពអគ្គនាយកដ្ឋាន បានទាន់ពេលវេលា ប្រកបដោយស្មារតីទទួលខុសត្រូវខ្ពស់ ភាតរភាព និងមានសាមគ្គីភាពខ្ពស់។ ឆ្លៀតក្នុងឱកាសនោះ ឯកឧត្តមរដ្ឋមន្រ្តី បានផ្តល់នូវចក្ខុវិស័យ និងអនុសាសន៍មួយចំនួនជូនអង្គពិធីទាំងមូលដើម្បីជាធាតុចូលសម្រាប់យកទៅពិចារណា និងអនុវត្តដូចតទៅ៖

ទី១. ត្រូវជំរុញការរៀបចំរចនាសម្ព័ន្ធចាត់តាំងដឹកនាំការងារនៃអគ្គនាយកដ្ឋានសុខភាពសត្វ និងផលិតកម្មសត្វ ស្របតាមខ្លឹមសារមាត្រា៩នៃអនុក្រឹត្យលេខ២២៤ អនក្រ.បក ចុះថ្ងៃទី២៨ ខែតុលា ឆ្នាំ២០១៦ ស្តីពីការដំឡើងនាយកដ្ឋានផលិតកម្មនិងបសុព្យាបាលទៅជាអគ្គនាយកដ្ឋានសុខភាពសត្វនិងផលិតកម្មសត្វ។

ទី២. សូមជំរុញរៀបចំលិខិតបទដ្ឋានគតិយុត្តក្រោមច្បាប់ស្តីពីសុខភាពសត្វ និងផលិតកម្មសត្វដែលនៅក្នុងនោះមាន ព្រះរាជក្រឹត្យចំនួន០១ អនុក្រឹត្យចំនួន០៤ ប្រកាសរួមចំនួន០២ ប្រកាសក្រសួងចំនួន៣៤ ព្រមទាំងលិខិតបទដ្ឋានមួយចំនួនទៀតតាមការចាំបាច់ និងតាមលំដាប់អាទិភាព។ កិច្ចការទាំងអស់នេះ ទាមទារនូវការខិតខំប្រឹងប្រែង ការប្តេជ្ញាចិត្ត និងត្រូវការពេលវេលា រួមទាំងធនធានមនុស្ស បច្ចេកទេស ថវិកា និងត្រូវមានការចូលរួមពីគ្រប់តួអង្គពាក់ព័ន្ធទាំងអស់ ដើម្បីធានាសម្រេចគោលដៅនេះឱ្យបានតាមការរំពឹងទុកព្រមទាំងយកចិត្តទុកដាក់ ជំរុញការផ្សព្វផ្សាយខ្លឹមសារនៃច្បាប់ និងលិខិតបទដ្ឋានគតិយុត្តក្រោមច្បាប់ស្តីពីសុខភាពសត្វ និងផលិតកម្មសត្វឲ្យបានទូលំទូលាយដើម្បីអនុវត្តឲ្យមានប្រសិទ្ធភាព។

ទី៣. ជំរុញការរៀបចំលិខិត និងបទដ្ឋានបច្ចេកទេស សម្រាប់ការសម្របសម្រួល និងគ្រប់គ្រងការនាំចេញ នាំចូល នាំឆ្លងកាត់ និងចរាចរសត្វនិងផលិតផលសត្វ ចំណីសត្វ និងបសុឱសថ ឱ្យប្រព្រឹត្តទៅដោយសុវត្ថិភាព ស្របតាមបទដ្ឋានអន្តរជាតិ និងកិច្ចព្រមព្រៀងអនាម័យ និងភូតគាមអនាម័យ ឆ្លើយតប ទៅនឹងកាតព្វកិច្ចកម្ពុជាជាសមាជិកអង្គការ WTO និងOIE ដើម្បីជាឆ្នាប់ក្នុងការធ្វើសមាហរណកម្មសង្គមសេដ្ឋកិច្ចអាស៊ាន និងសាកលភាវូបនីយកម្ម។

ទី៤. ជំរុញលើកទឹកចិត្តដល់ការបង្កាត់ពូជសត្វតាមបែបវិទ្យាសាស្រ្តទំនើបដើម្បីបង្កើនសក្តានុពលផលិតកម្មនិងការប្រកួតប្រជែង ព្រមទាំងពង្រឹងភាពជាដៃគូរវាងផ្នែកសាធារណៈ ឯកជន អ្នកចិញ្ចឹមសត្វ និងបង្កើតបរិយាកាសវិនិយោគលើឧស្សាហកម្មចិញ្ចឹមសត្វ ការកែច្នៃម្ហូបអាហារ និងផលិតផលសត្វ ដោយត្រូវគិតគូរជាចម្បងលើសុខភាពសាធារណៈ សុខុមាលភាពសត្វ និងសម្រួលពាណិជ្ជកម្មសត្វ ផលិតផលសត្វ ប្រកបដោយសុវត្ថិភាព និងមានប្រសិទ្ធភាព។

ទី៥. អង្គភាពជំនាញ មន្ទីរកសិកម្ម រុក្ខាប្រមាញ់ និងនេសាទរាជធានី ខេត្តទាំងអស់ ត្រូវយកចិត្តទុកដាក់ ជួយជំរុញផ្តល់សេវាគាំទ្រនិងលើកទឹកចិត្តដល់ការវិនិយោគលើការចិញ្ចឹមសត្វជាលក្ខណៈគ្រួសាររបស់កសិករខ្នាតតូចនិងកសិដ្ឋាន ឱ្យមានប្រសិទ្ធភាពខ្ពស់សំដៅធានាផ្គត់ផ្គង់សត្វ និងសាច់សត្វ និងដើម្បីធានាស្ថិរភាពតម្លៃសាច់សត្វគ្រប់ប្រភេទនៅក្នុងទីផ្សារក្នុងស្រុក និងឈានជាបណ្តើរៗទៅកាត់បន្ថយការនាំចូល និងជំរុញការនាំចេញ។ ក្នុងគោលដៅនេះ យើងត្រូវធ្វើកិច្ចការសំខាន់ៗមួយចំនួនដូចជា៖

(១).ជំរុញលើកទឹកចិត្តក្នុងការផលិតវ៉ាក់សាំង ការផលិតចំណីសត្វ ដោយប្រើប្រាស់វត្ថុធាតុដើម ដែលមានស្រាប់នៅក្នុងស្រុក

(២).បង្កើនសមត្ថភាពក្នុងការបង្ការ និងទប់ស្កាត់ជំងឺឆ្លងរាលដាលនៃសត្វ និងជំងឺស៊ូណូសឱ្យមានប្រសិទ្ធភាពតាមគ្រប់រូបភាព

(៣).ពង្រឹងការត្រួតពិនិត្យអនាម័យសត្វ និងផលិតផលសត្វ ចំណីសត្វ និងបសុឱសថ ពិសេសត្រូវចូលរួមរឹតបន្តឹងឱ្យបានកាន់តែសកម្មថែមទៀត ក្នុងការសហការទប់ស្កាត់ចលនាសត្វ និងផលិតផលសត្វខុសច្បាប់នៅក្នុងដែនសមត្ថកិច្ចរបស់ខ្លួន ជាពិសេសបណ្តាខេត្តនៅជាប់ព្រំដែន។ ទន្ទឹមនឹងនេះក៏មិនត្រូវមើលរំលងអំពីការខិតខំកែលម្អសេវាសាធារណៈឱ្យបានសមស្របតាមនីតិវិធីប្រកបដោយតម្លាភាព ដើម្បីផ្តល់នូវភាពកក់ក្តៅដល់អតិថិជនឱ្យបានល្អប្រសើរ។

ទី៦. ក្នុងបរិបទនៃការរីកចម្រើនវិស័យសេដ្ឋកិច្ច និងសង្គមនៅកម្ពុជាបច្ចុប្បន្ន រួមទាំងលំហូរនៃភ្ញៀវទេសចរណ៍អនុ្តរជាតិដែលបន្តកើនឡើងផងនោះ បានធ្វើឱ្យមានតម្រូវការសាច់ និងផលិតផលសត្វ មានការកើនឡើង ទាំងបរិមាណ គុណភាព និងសុវត្ថិភាព។ ដើម្បីឆ្លើយតបទៅតាមតម្រូវការរបស់អ្នកបរិភោគ អ្នកប្រើប្រាស់ ការងារសំខាន់ៗចំពោះមុខមួយចំនួនដែលអង្គភាពជំនាញត្រូវតែធ្វើការពិនិត្យឡើងវិញនោះមានជាអាទិ៍ៈការងារគ្រប់គ្រង និងត្រួតពិនិត្យសត្តឃាតដ្ឋាន និងកន្លែងតាំងលក់សាច់ ផលិតផលសត្វ ចំណីសត្វ ឱសថស្ថានសត្វ ការត្រួតពិនិត្យកសិដ្ឋាន ការត្រួតពិនិត្យចរាចរសត្វ ការអនុវត្តលិខិតបទដ្ឋានគតិយុត្ត នានាជាធរមានដែលទាក់ទងនឹងសុខភាពសត្វនិងការចិញ្ចឹមសត្វ។ ដូច្នេះយើងត្រូវតែពូនផ្គុំគំនិត យកចំណេះដឹង បទពិសោធន៍ ពីបណ្តាអ្នកជំនាញគ្រប់ផ្នែក គ្រប់ស្ថាប័ន ដើម្បីរួមគ្នារកដំណោះស្រាយ សមស្របទៅតាមស្ថានភាពជាក់ស្តែងនៃប្រទេសយើងធ្វើយ៉ាងណាធានាឱ្យបានទាំងបរិមាណ គុណភាព និងសុវត្ថិភាព ជាពិសេសសុខភាពសាធារណៈ។

ទី៧. ជំរុញរៀបចំ និងអនុវត្តបទដ្ឋានបច្ចេកទេស ជាពិសេសការត្រួតពិនិត្យអនាម័យសត្វ និងផលិតកម្មសត្វ ការគ្រប់គ្រងសត្តឃាតដ្ឋាន ការធ្វើអាជីវកម្មពិឃាតសត្វ ការត្រួតពិនិត្យអនាម័យសាច់ ដើម្បីធានាកិច្ចសម្របសម្រួលការវិនិយោគ និងពាណិជ្ជកម្មសត្វនិងផលិតផលសត្វ និងសុវត្ថិភាពម្ហូបអាហារ។

ទី៨. ពិនិត្យ បែងចែកតំបន់ត្រួតពិនិត្យ និងលុបបំបាត់ជំងឺឆ្លងសត្វ ជាពិសេសជំងឺអុតក្តាម ដូចមានចែងក្នុង ផែនការជាតិជំងឺអុតក្តាម ដែលក្រសួងបានអនុម័តដាក់ឲ្យអនុវត្តនៅឆ្នាំ២០១៥ និងដោយអនុលោមទៅនឹងផែនទីបង្ហាញផ្លូវលុបបំបាត់ជំងឺអុតក្តាមនៅក្នុងតំបន់អាស៊ីអគ្នេយ៍ និងចិន២០២០ នៃអង្គការសុខភាពសត្វពិភពលោក ដែលកម្ពុជា ជាសមាជិកសកម្មមួយផងដែរ។

ទី៩. ត្រូវខិតខំជំរុញការផ្សព្វផ្សាយបច្ចេកទេសចិញ្ចឹមសត្វ ការការពារ និងតាមដានជំងឺឆ្លងសត្វ ព័ត៌មានទីផ្សារសត្វ ផលិតផលសត្វទាំងក្នុងនិងក្រៅប្រទេស ការចរាចរសត្វចេញ-ចូល និងជំរុញចងក្រង ផ្តល់ការគាំទ្រ ដល់កសិករខ្នាតតូច ឲ្យក្លាយជាសហគមន៍ចិញ្ចឹមសត្វ និងរួមគ្នារកវិធីសាស្រ្តដោះស្រាយរាល់បញ្ហាទាំងឡាយដែលអាចកើតមានឡើងជាយថាហេតុនៅក្នុងមូលដ្ឋានរបស់ខ្លួនដោយត្រូវសហការឱ្យបានកាន់តែជិតស្និទ្ធថែមទៀតជាមួយភ្នាក់ងារសុខភាពសត្វតាមការចាំបាច់។

ទន្ទឹមនឹងនេះ ឯកឧត្តមបានកត់សម្គាល់ឃើញថា មន្រ្តីជំនាញរបស់យើងនៅតាមអង្គភាពនីមួយៗបានទៅចូលរួមកិច្ចប្រជុំ សិក្ខាសាលា និងវគ្គបណ្តុះបណ្តាលនៅក្រៅប្រទេសជាច្រើន។ ដូច្នេះ អង្គភាពនីមួយៗត្រូវរៀបចំចងក្រងអត្ថបទបច្ចេកទេស ដើម្បីជាបទពិសោធន៍ និងផ្សព្វផ្សាយឱ្យបានទូលំទូលាយ។

ទី១០. ក្នុងការអនុវត្តផែនការថវិកាឆ្នាំ២០១៧ ឯកឧត្តមស្នើឱ្យគ្រប់អង្គភាពថវិកាទាំងអស់ រួមទាំងមន្ទីរកសិកម្ម រុក្ខា-ប្រមាញ់ និងនេសាទរាជធានី-ខេត្ត ពិសេសអង្គភាពដែលប្រមូលចំណូលពីសេវាសាធារណៈ ត្រូវខិតខំប្រមូលចំណូលឲ្យអស់លទ្ធភាព និងត្រូវរៀបចំយន្តការចំណាយឱ្យចំទិសដៅ និងសន្សំសំចៃខ្ពស់ ដោយផ្តោតទៅលើសកម្មភាពដែលចំាបាច់ជាអាទិភាពពោលគឺ អាទិភាពលើអាទិភាព និងត្រូវជៀសវាងការលើកគម្រោងចំណាយដែលខុសផែនការ។

ទី១១. ការពង្រឹងសមត្ថភាព គុណភាពការងារ និងមនសិកាវិជ្ជាជីវៈរបស់មន្រ្តីរាជការ គឺជាការចាំបាច់ សម្រាប់លើកកម្ពស់ប្រសិទ្ធភាព ប្រសិទ្ធផលការងារ និងធានាការបំពេញភារកិច្ច ប្រកបដោយស្មារតីទទួលខុសត្រូវខ្ពស់។ ចំណុចនេះ សូមប្រធានអង្គភាពទាំងអស់ យកចិត្តទុកដាក់ ពង្រឹងការរៀបចំចាត់ចែងការងារដឹកនាំនិងគ្រប់គ្រងដោយត្រូវឈរលើមូលដ្ឋានរួមមាន៖

(១).សមត្ថភាពជំនាញវិជ្ជាជីវៈ បទពិសោធន៍ និងមានស្នាដៃការងារសមស្រប

(២).មានស្មារតីសមូហភាពចូលរួមបុគ្គលទទួលខុសត្រូវ

(៣). មានសីលធម៌ គុណធម៌ និងសមធម៌ ចេះចែករំលែក និងស្គាល់សុខទុក្ខមន្រ្តីក្រោមឱវាទ

(៤). ចូលរួមកិច្ចការអភិវឌ្ឍសហគមន៍និងសង្គម (៥). មានការប្រាស្រ័យទាក់ទងល្អជាមួយមហាជន។ ជាទីបញ្ចប់ឯកឧត្តមរដ្ឋមន្រ្តីបានផ្តល់កិត្តិយសបំពាក់គ្រឿងឥស្សរិយយសដល់មន្រ្តីដែលមានស្នាដៃរបស់អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វផងដែរ។