ព័ត៌មានផ្សេងៗទៀត
ឯកឧត្តម ឡោ រស្មី បេីកវគ្គបណ្តុះបណ្តាល អប់រំសមត្ថភាពវិជ្ជាជីវៈដល់អាជីវករលក់ជី-ថ្នាំកសិកម្មនៅខេត្តកំពង់ធំ
ចេញផ្សាយ ៨ ឧសភា ២០២៥ 2786
នៅព្រឹកថ្ងៃទី៧ ខែឧសភា ឆ្នាំ២០២៥ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលអប់រំសមត្ថភាពវិជ្ជាជីវៈដល់អាជីវករលក់ជី និងថ្នាំកសិកម្ម ដោយមានការចូលរួមពីឯកឧត្តម ព្រឹម រដ្ឋា អភិបាលរងនៃគណៈអភិបាលខេត្តកំពង់ធំ លោកស្រី គិត វិសិដ្ឋកញ្ញា អគ្គនាយិការងនៃអគ្គនាយកដ្ឋានកសិកម្ម លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ មន្រ្តីជំនាញនៃអគ្គនាយកដ្ឋានកសិកម្ម លោកប្រធានអង្គភាពច្រកចេញចូលតែមួយនៃរដ្ឋបាលខេត្ត និងសិក្ខាកាមចូលរួមសរុប ១៦៣នាក់។
នាឱកាសនោះ ឯកឧត្តមអនុរដ្ឋលេខាធិការបានថ្លែងអំណរគុណដល់រដ្ឋបាលខេត្ត និងមន្ទីរកសិកម្ម ដែលបានផ្តល់សហការល្អក្នុងការអភិវឌ្ឍវិស័យកសិកម្ម ការគ្រប់គ្រងដល់អាជីវករធាតុចូលកសិកម្ម និងទប់ស្កាត់ចរាចរណ៍ជី-ថ្នាំកសិកម្មខុសច្បាប់ ដើម្បីធ្វើឱ្យប្រសើរឡើងនូវប្រព័ន្ធគ្រប់គ្រង ផ្គត់ផ្គង់ និងចែកចាយធាតុចូលកសិកម្ម ដោយផ្សារភ្ជាប់ជាមួយមន្រ្តីជំនាញបច្ចេកទេស និងមន្រ្តីកសិកម្មឃុំ។
ឯកឧត្តមក៏បានជម្រាបជូនអង្គពិធីអំពីកម្មវិធីគោលនយោបាយអាទិភាពទី៥ ទី៦ របស់រាជរដ្ឋាភិបាលគាំទ្រដល់វិស័យកសិកម្ម តាមរយ:ការជួយរក្សាលំនឹងថ្លៃកសិផល ការរកទីផ្សារ ការដាក់ពង្រាយមន្រ្តីកសិកម្មឃុំ និងការអភិវឌ្ឍសហគមន៍កសិកម្មទំនើប និងគោលនយោបាយរបស់ក្រសួងកសិកម្ម “មានហូប មានប្រើ មានបាន និងមានរហូត” ព្រមទាំងបានរំលេចនូវសមិទ្ធផលជាច្រើនដែលក្រសួងសម្រេចបាននាពេលកន្លងមកផងដែរ។
មុននឹងបញ្ចប់ ឯកឧត្តមបានណែនាំដល់សិក្ខាកាមទាំងអស់ ត្រូវយកចិត្តទុកដាក់ចូលរួមវគ្គបណ្ដុះបណ្ដាលនេះឱ្យបានពេញលេញ ដើម្បីក្លាយជាអាជីវករលក់ជី-ថ្នាំកសិកម្មប្រកបដោយមនៈសិការវិជ្ជាជីវៈ និងជាអ្នកប្រឹក្សាយោបល់ដ៏ល្អរបស់កសិករ សំដៅចូលួមកាត់បន្ថយថ្លៃដេីមផលិត និងបង្កេីនប្រាក់ចំណេញរបស់ប្រជាកសិករ៕
