ឯកឧត្តមរដ្ឋលេខាធិការ តូច ប៊ុនហ៊ួរ អញ្ជើញដឹកនាំក្រុមការងារជំនាញប្រជុំពិនិត្យ និងពិភាក្សាលើសូចនាករគោលនយោបាយដំឡូងមីឆ្នាំ២០២០-២០២៥

ចេញ​ផ្សាយ​ ២៩ ឧសភា ២០២៥ 2406

នៅថ្ងៃទី២៩ ខែឧសភា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារជំនាញប្រជុំពិនិត្យ និងពិភាក្សាលើសូចនាករគោលនយោបាយដំឡូងមីឆ្នាំ២០២០-២០២៥ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

នៅក្នុងកិច្ចប្រជុំឯកឧត្តមរដ្ឋលេខាធិការ បានណែនាំទៅក្រុមការងារជំនាញ ពិនិត្យលើកលទ្ធផលដំឡូងមីក្នុងរយៈពេល៥ឆ្នាំ (ចន្លោះឆ្នាំ២០២០-២០២៥) ពីកំណើនប្រាក់ចំណេញកើនឡើងឬថយចុះប្រមាណភាគរយក្នុងមួយហិកតា និងបញ្ហាប្រឈម ព្រមទាំងរកវិធីដោះស្រាយឱ្យបានប្រសិទ្ធិភាពនិងប្រសិទ្ធផលខ្ពស់ ដើម្បីលើកស្ទួយវិស័យកសិកម្មប្រកបដោយចីរភាព។

ឯកឧត្តមរដ្ឋលេខាធិការបានឱ្យដឹងថា បញ្ហាប្រឈមលើការដាំដុះដំឡូងមីកន្លងមក  ដោយសារប្រើប្រាស់ពូជមិនសុទ្ធ ខ្វះបច្ចេកទេស និងគុណភាពដី (ដីដាំដុះរយៈពេលយូរ និងដីខ្សាច់) និងការដាំដុះតាមយថាផល  ការប្រែប្រួលអាកាសធាតុ   រងផលប៉ះពាល់ពីសមាសភាពចង្រៃ តម្លៃប្រែប្រួល ការប្រើប្រាស់ពូជម្សៅទាប ការដាំដុះកើនឡើងខ្ពស់លើសពីតម្រូវការ កសិករដែលមានគ្រឿងយន្តកសិកម្ម និងសេវាគ្រឿងចក្រមិនមានបំណងចូលរួមជាសហគមន៍។

ជាដំណោះស្រាយឯកឧត្តមរដ្ឋលេខាធិការ បានផ្តល់ជាអនុសាសន៍ដល់មន្ត្រីជំនាញ ឱ្យធ្វើការណែនាំទៅប្រជាកសិករ ជ្រើសរើសពូជសុទ្ធល្អ ធន់នឹងជំងឺ និងសត្វល្អិត ផ្តល់បច្ចេកទេស និងកែលម្អគុណភាពដី ដើម្បីទទួលបានទិន្នផលខ្ពស់ និងចំណេញបានច្រើន ស្របតាមការសូចនាករគោលនយោបាយបស់ក្រសួងកសិកម្ម រុក្ខាប្រមាញ់ និងនេសាទ។

បើតាមឯកឧត្តម ការប្រមូលផលដំឡូងមីសម្រាប់ផ្គត់ផ្គង់ទៅទីផ្សារបានស្ទើរពេញមួយឆ្នាំ ដោយរាប់ចាប់ពីខែវិច្ឆិកា-កក្កដា)។ ទន្ទឹមនឹងនេះ ឯកឧត្តមបានណែនាំឱ្យមានការបង្កើតតំបន់ប្រមូលផ្តុំ និងឃ្លាំងស្តុកដំឡូងមីនៅតាមច្រកព្រំដែនសំខាន់ៗ សម្រាប់ឈ្មួញមកពីប្រទេសជិតខាងចូលមកទិញ ដើម្បីធានាស្ថិរភាពតម្លៃផងដែរ៕