Other News
វត្តវិហារមាសមានសាលាធម្មសភាថ្មី
ចេញផ្សាយ ១៧ មករា ២០១៨ 4242
វត្តវិហារមាស ដែលស្ថិតនៅឃុំអូរសារ៉ាយ ស្រុកត្រាំកក់ ខណៈនេះ បានទទួលសាលាធម្មសភាថ្មីមួយខ្នង នៅពេលដែល មិនយូរប៉ុន្មានសាលានេះ នឹងបម្រើឱ្យសាសនិកជន នៅក្នុងពិធីភ្ជុំបិណ្ឌខាងមុខនេះ។
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាអ្នកជ្រោមជ្រែង ឱ្យកើតចេញ ជារូបរាងនេះឡើង បានអញ្ជើញចូលរួមសម្ភោធឆ្លងដោយផ្ទាល់ កាលពីដើមសប្តាហ៍កន្លងទៅនេះ។
សាលាធម្មសភាថ្មីនេះ មានបណ្តោយ ២២ម៉ែត្រ និងទទឹង ១៦ម៉ែត្រ និងចំណាយថវិកាសាងសង់ចំនួន៦៨.៦០០ដុល្លារ។ បច្ច័យសាងសង់ គឺបានពីពុទ្ធបរិស័ទសប្បុរសជនជិតឆ្ងាយ។
ឯកឧត្តម រដ្ឋមន្ត្រី បានមានប្រសាសន៍ក្នុងពិធីនោះ ដោយថ្លែងអំណរគុណចំពោះសប្បុរសជនជិតឆ្ងាយ គណៈ កម្មការអាចារ្យវត្ត ប្រជាជនចំណុះជើងវត្ត អាជ្ញាធរមូលដ្ឋាន ដែលបានរួមសាមគ្គីរហូតបានសម្រេច បានសមិទ្ធផលដែលបម្រើឱ្យវិស័យព្រះពុទ្ធសាសនា។
ឯកឧត្តមរដ្ឋមន្ត្រី បានអំពាវនាវឱ្យចូលរួមថែរក្សាសមិទ្ធិផល ដែលសម្រេចបាន ដោយកម្លាំងសទ្ធានេះ ដើម្បីប្រយោជន៍ប្រើប្រាស់បានយូរអង្វែង និងរួមគ្នាកសាងបន្ថែមទៀត ដើម្បីធ្វើឱ្យវិស័យពុទ្ធចក្រនៅមូលដ្ឋានមានការរីកចម្រើន។
ឯកឧត្តម រដ្ឋមន្ត្រីក៏បានរំលឹកផងដែរ ទាក់ទងនឹងការងារកសិកម្ម។ ឯកឧត្តម រដ្ឋមន្ត្រីបាន បញ្ជាក់ថា ក្នុងចំនោម១៥ឃុំ របស់ស្រុកត្រាំកក់ គឺមានតែឃុំចំនួនពីរទេ ដែលសម្រេចបានតាមផែនការ នៅសល់ឃុំចំនួន១៣ទៀតដែលមិនទាន់សម្រេចរួចរាល់។ ឯកឧត្តមរដ្ឋមន្ត្រី បានសំណូមពរដល់ កសិករនៅតំបន់ដែលអាចជម្រុញការដកស្ទូង ត្រូវតែជម្រុញឱ្យបានឆាប់រហ័ស។ ឯកឧត្តមរដ្ឋមន្ត្រី បានពន្យល់ពីបច្ចេកទេសថ្មីក្នុងការសាបស្ទូង ការធ្វើដី ការថែទាំ ការជ្រើសរើសពូជ ការទុកដាក់ពូជ។ ឯកឧត្តម រដ្ឋមន្ត្រីបានបញ្ជាក់ថា កសិករត្រូវតែធ្វើការផ្លាស់ប្តូរពូជ គឺត្រូវប្រើពូជស្រូវស្រាលមិនប្រកាន់ រដូវទើបសមស្របសម្រាប់ពេលនេះ៕
