ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំក្រុមការងារ ចុះពិនិត្យ និងបង្រ្កាបបទល្មើសជលផលនៅខេត្តកំពង់ឆ្នាំង
ចេញផ្សាយ ១៥ សីហា ២០២៥ 377
នៅថ្ងៃទី១៥ ខែសីហា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំលោកនាយរងអធិការរដ្ឋបាលជលផលខាងត្បូងបឹងទន្លេសាប លោកនាយខណ្ឌរដ្ឋបាលជលផលកំពង់ឆ្នាំង និងសហការី ដោយចុះទៅពិនិត្យ និងបង្រ្កាបបទល្មើសជលផលក្នុងភូមិសាស្រ្តស្រុកជលគិរី ខេត្តកំពង់ឆ្នាំង។
ក្នុងដំណើរនេះ ឯកឧត្តមអនុរដ្ឋលេខាធិការ បានគូសបញ្ជាក់ថា ក្រុមការងារបានប្រើមធ្យោបាយទូកចំនួន៤គ្រឿង មានកម្លាំងសរុបចំនួន១៦នាក់ ដោយបំបែកគ្នាចុះអនុវត្តនៅក្នុងចំណុចបឹង វាលសំណាប ក្រោយភូមិឃុំពាមឆ្កោក ក្នុងភូមិសាស្រ្តស្រុកជលគិរី ខេត្តកំពង់ឆ្នាំង ដើម្បីប្រតិបត្តិការបង្ក្រាបទៅលើការធ្វើនេសាទដោយឧបករណ៍មិនស្របច្បាប់នារដូវបិទនេសាទនេះ។
ក្នុងប្រតិបត្តិការនេះ ក្រុមការងារបានប្រទះឃើញឧបករណ៍នេសាទខុសច្បាប់មួយចំនួនដែលបានពន្លិចក្រោមទឹកពិបាកនឹងរក ប៉ុន្តែក្រុមទាំងបួនបានព្យាយាមពិនិត្យរក និងប្រទះឃើញ របាំងស្បៃមុងចំនួន ១៦បាំង ស្មើនឹង៨៤០ម៉ែត្រ, លូនិងលបស្បៃមុងចំនួន១៦មាត់ លបប្រឹស១០០ចំនួន២៥ខ្សែ បង្គោលឫស្សីចំនួន ៤៨០ដើម ហើយបានរើយកមកដុតបំផ្លាញចោលនៅលើគោក ព្រមទាំងបានចាក់លែងកូនត្រីចូលបឹងធម្មជាតិវិញប្រមាណ២០០គីឡូក្រាម។
ក្រោយពីបញ្ចប់បេសកកម្មនេះ ឯកឧត្តមអនុរដ្ឋលេខាធិការ ក៏បានណែនាំបន្ថែមដល់មន្រ្តីជំនាញជលផល ឱ្យខិតខំប្រឹងប្រែងអនុវត្តបន្តជាប់ជានិច្ចដូចភ្លៀងរលឹម និងសូមឱ្យសហការជាមួយកម្លាំងដែលប្រចាំការក្នុងភូមិសាស្រ្តរបស់ខ្លួនឱ្យកាន់តែជិតស្និទ្ធ ក្នុងការអនុវត្តកិច្ចការបង្រ្កាបបទល្មើសឱ្យកាន់តែមានប្រសិទ្ធិភាព ដើម្បីអភិរក្សធនធានមច្ឆជាតិក្នុងបឹងទន្លេសាបឱ្យកាន់តែសម្បូរ សម្រាប់ជួយជីវភាពរបស់ប្រជាជន ក្នុងការអភិវឌ្ឍសេដ្ឋកិច្ចជាតិឱ្យកាន់តែសម្បូររុងរឿង៕
