ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារចុះពិនិត្យសហគមន៍កសិកម្មជំរុញផលិតកម្មដំណាំសាវប្បកម្ម នៅខេត្ដបន្ទាយមានជ័យ

ចេញ​ផ្សាយ​ ៣ កញ្ញា ២០២៥ 628

នៅថ្ងៃទី៣ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ អមដោយលោកអនុប្រធានមន្ទីរ មន្រ្តីពាក់ព័ន្ធ និងមន្រ្តីកសិកម្មឃុំ បានអញ្ជើញចុះពិនិត្យសហគមន៍កសិកម្មបន្លែបៃតងពង្រកងវ៉ា ស្ថិតនៅក្រុង សិរីសោភ័ណ ខេត្ដបន្ទាយមានជ័យ។

ក្នុងដំណើរចុះពិនិត្យ មានការអមដោយក្រុមការងារបានចុះជួបសមាជិកឆ្នើមសហគមន៍ចំនួន ២រូប ក្នុងនោះរួមមាន: លោក យាន មេន ស្ថិតនៅភូមិពង្រ សង្កាត់កំពង់ស្វាយ ក្រុង សិរីសោភ័ណ និងលោកស្រី ទឹង សារាយ ស្ថិតនៅភូមិម្កាក់ សង្កាត់ម្កាក់ កក្រុងសិរីសោភ័ណ។

កិច្ចប្រជុំនេះរៀបចំឡើងក្នុងគោលបំណងពិនិត្យមើលជាក់ស្ដែងពីតម្រូវការចាំបាច់ ក្នុងការផ្តល់ជំនួយបច្ចេកទេសដល់សហគមន៍ តាមការចង្អុលបង្ហាញ និងអនុសាសន៍ណែនាំដ៏ខ្ពង់ខ្ពស់ពីឯករដ្ឋមន្រ្ដីក្រសួងកសិកម្ម លើការដោះស្រាយបញ្ហា បង្កើនផលិតភាពផលិតកម្ម (បង្កើនប្រាក់ចំណេញ) បញ្ហារាំងស្ទះលំហូរពីផលិតកម្មទៅកាន់ទីផ្សារឱ្យមានភាពរលូន លឿន ជឿជាក់ ទាំងប្រភេទ បរិមាណ និងគុណភាព ដែលជាកត្តាជំរុញកំណើនផលិតកម្មបន្លែសុវត្ថិភាពស្របតាមតម្រូវការទីផ្សារ និងបរិបទថ្មី។

ក្នុងឱកាសនោះ ឯកឧត្ដមរដ្ឋលេខាធិការ ក៏បានផ្ដល់អនុសាសន៍ណែនាំ និងផ្ដល់លទ្ធភាពគាំទ្រដល់សហគមន៍កសិកម្ម មានដូចជា៖ ការពង្រឹងរៀបចំដំណើរការផែនការផលិតកម្ម ទីផ្សារលក់រួម និងបង្កើនសមត្ថភាពដឹកនាំសហគមន៍ ការផលិតរបស់សហគមន៍ និងសមត្ថភាពចរចារទីផ្សារ និងបន្ដសហការជាមួយមន្ទីរកសិកម្ម មន្រ្ដីកសិកម្មឃុំ និងអាជ្ញាធរ ស្រុក-ឃុំ ចូលរួមដោះស្រាយបញ្ហាពាក់ព័ន្ធនានា ដែលសហគមន៍កំពុងប្រឈមរាំងស្ទះដល់ខ្សែច្រវាក់ផលិតកម្ម។

ជាមួយគ្នានេះ ឯកឧត្តមរដ្ឋលេខាធិការ បានលើកទឹកចិត្ដ ប្រមែប្រមូលបងប្អូនពលរដ្ឋក្នុងមូលដ្ឋានដែលទើបបានវិលត្រលប់មកពីប្រទេសថៃវិញចូលរួមជាសមាជិកថ្មី ដែលមានជំនាញផ្នែកកសិកម្ម ដើម្បីចូលរួមអភិវឌ្ឍន៍សហគមន៍ និងបង្កើនកម្រិតជីវភាព ផងដែរ៕