ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីនៃកិច្ចប្រជុំក្រុមការងារផ្នែកស្រូវ-អង្ករ (ក្រុម «ឈ») នៃវេទិការាជរដ្ឋាភិបាល-ផ្នែកឯកជន

ចេញ​ផ្សាយ​ ១៣ កុម្ភៈ ២០១៨ 3386

នៅព្រឹកថ្ងៃទី ១៦ ខែសីហា ឆ្នាំ ២០១៦ ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញធ្វើជាអធិបតីក្នុងកិច្ចប្រជុំក្រុមការងារផ្នែកស្រូវ-អង្ករ (ក្រុម"ឈ") នៃវេទិការាជរដ្ឋាភិបាល-ផ្នែកឯកជន ដោយមានអញ្ជើញចូលរួមពីឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី ឯកឧត្ដមរដ្ឋលេខាធិការ អនុរដ្ឋលេខាធិការ ឯកឧត្ដម លោកជំទាវដែលជាសមាជិកនៃក្រុមការងារ ហើយនិងថ្នាក់ដឹកនាំក្រសួង និងថ្នាក់ដឹកនាំអង្គភាពជំនាញនៃក្រសួងកសិកម្ម រុក្ខាប្រមាញ់ និងនេសាទ។

កិច្ចប្រជុំបានពិភាក្សាលើរបៀបវារៈចំនួន៨ ដែលជាសំណើរបស់ផ្នែកឯកជននៅជុំវិញបញ្ហាប្រឈមពាក់ព័ន្ធ ការផលិតពូជស្រូវសុទ្ធឲ្យចំទីផ្សារ បច្ចេកទេសនិងបច្ចេកវិទ្យាផលិតកម្មស្រូវ កង្វះទុនបង្វិល ទីផ្សារនាំចេញ និងការផ្សព្វផ្សាយទូលំទូលាយអង្ករកម្ពុជាលើទីផ្សារពិភពលោក។ របៀបវារៈទាំង៨នោះ មាន៖

១. កិច្ចពិភាក្សាស្វែងរកនូវយន្តការគាំទ្រ និងសហការពីក្រសួងកសិកម្ម រុក្ខាប្រមាញ់ និងនេសាទ មន្ទីរនៃក្រសួង ស្ថាប័នពាក់ព័ន្ធ និងដៃគួអភិវឌ្ឍនានា លើរចនាសម្ព័ន្ធក្រុមការងារតាមតំបន់ និងតាមខេត្តនីមួយៗរបស់សហព័ន្ធស្រូវ-អង្ករកម្ពុជា។ ករណីនេះអង្គប្រជុំបានសម្រេចស្នើបង្កើតយន្តការក្រុមការងារខាងរដ្ឋាភិបាលដែលមានឯកឧត្តមគណៈភិបាល ឬអភិបាលរងនៃខេត្តណាមួយជាសហប្រធានជាមួយប្រធានការិយាល័យតំបន់របស់សហព័ន្ធស្រូវ-អង្ករ និងមន្ទីរជំនាញខេត្តពាក់ព័ន្ធធ្វើជាសមាជិកដោយខាងសហព័ន្ធត្រូវស្នើនូវលក្ខខណ្ឌក្រមខ័ណ្ឌការងារ(ToR) របស់ការិយាល័យសិន។

២. ការគាំទ្រនូវការបង្កើតម៉ាកបញ្ជាក់ពីចរិតលក្ខណៈទំនិញ និងសេវា (Certification Mark) ដើម្បីជួយសម្រួលឲ្យសហព័ន្ធ និងភាគីពាក់ព័ន្ធ ងាយស្រួលក្នុងការយកទៅផ្សព្វផ្សាយពីអង្ករកម្ពុជា ការពារនូវគុណភាព និងកិត្តិយសកេរ្តិ៍ឈ្មោះអង្ករកម្ពុជាទាំងក្នុងស្រុក និងអន្តរជាតិ។ ចំណុចនេះសហព័ន្ធស្រូវ-អង្ករចង់បានពាណិជ្ជមនាម (trade mark) លក់ ឬនាំចេញបានច្រើន តែខាងអ្នកស្រាវជ្រាវពូជស្រូវចង់រក្សាស្នាដៃ និងការរក្សាសិទ្ធិ (កម្មសិទ្ធបញ្ញា)។

៣. ការបង្កើនបរិមាណការផលិតពូជសុទ្ធ និងជំរុញការចុះបញ្ជីពូជស្រូវតាមតម្រូវការទីផ្សារនាំចេញ ដូចពូជស្រូវដែនក្រអូបជាដើម។ ចំណុចនេះផ្នែកឯកជនអាចផលិត នាំចេញ ដោយទទួលខុសត្រូវខ្លួនឯង ជាពិសេសពូជស្រូវសែនក្រអូប។

៤. លទ្ធភាពណាមួយដែលអាចអនុញ្ញាតឲ្យសហព័ន្ធសហការ ដើម្បីជួយដល់ដំណើរការគម្រោងវិនិយោគឃ្លាំងស្តុក និងទុកបង្វលសម្រាប់ប្រមូលផលសស្រូវស្តុកទុកនៅរដូវប្រមូលផលសម្រាប់កិនកែច្នៃនាំចេញក្រោមគម្រោងកម្ចីសម្បទានរបស់ ADB ដែលក្រសួងបាននឹងកំពុងពីភាក្សា។ ចំណុចនេះ គឺ ADB មានថវិកាមិនធំ សម្រាប់ជួយដល់ផ្នែកឯកជននោះទេ គឺថវិការបស់ ADB គឺជួយដល់សហគមន៍ប៉ុណ្ណោះ។

៥. កិច្ចពិភាក្សាពីអនាម័យ និងភូតគាមអនាម័យសម្រាប់ការនាំអង្ករបាក់ទៅប្រទេសចិន។ អង្គប្រជុំ (ទាំងភាគីរាជរដ្ឋាភិបាល និងសហព័ន្ធស្រូវ-អង្ករ) បានជូនដំណឹងគ្នាទៅវិញទៅមកអំពីព័ត៌មាន និងនភាពការណ៍វិវត្តន៍ថ្មីពាក់ព័ន្ធទៅនឹងការងារនេះ។

៦. កិច្ចពិភាក្សាអំពីស្ថិតិនៃរបាយការណ៍នាំចេញអង្កររបស់លេខាធិការដ្ឋានច្រកចេញ-ចូលតែមួយសម្រាប់បំពេញបែបបទនាំចេញអង្ករ។ ចំណុចនេះអង្គប្រជុំបានទទួលស្គាល់ថាស្ថិតិនេះគឺជាបញ្ហាសំខាន់។

៧. ការជំរុញក្រសួង ស្ថាប័នពាក់ព័ន្ធលើការពង្រីក និងគ្រប់គ្រងនូវប្រព័ន្ធធារាសាស្រ្ត អាងស្តុកទឹក និងហេដ្ឋានរចនាសម្ព័ន្ធដឹកជញ្ជូនតាមផ្លូវទឹក ផ្លូវដែក ផ្លូវគោក និងការបញ្ចុះតម្លៃអគ្គីសនីជាដើម ដើម្បីបង្កើននូវការផលិត និងកាត់បន្ថយថ្លៃដើមសម្រាប់ការប្រកួតប្រជែង។ ចំណុចនេះសមាជិកក្រុមការងារមកពីរាជរដ្ឋាភិបាលបានបញ្ជាក់ពីការខិតខំបន្ថែមទៀតទៅតាមវិស័យរបស់ខ្លួន ជួយដល់វិស័យឯកជន ក៏ដូចជាប្រជាកសិករកម្ពុជា លើការរីកចម្រើន និងការអភិវឌ្ឍន៍ដែលមានរួចហើយ។

៨. បញ្ហាផ្សេងៗទៀតក្នុងវិស័យស្រូវ-អង្ករ។