ឯកឧត្តមអនុរដ្ឋលេខាធិការ ទឹម បូរក្ស អញ្ជើញចូលរួម "សិក្ខាសាលាពិគ្រោះយោបល់ថ្នាក់ជាតិស្តីពី ការអនុវត្តយុទ្ធសាស្រ្ត បង្ការ ទប់ស្កាត់អំពើជួញដូរមនុស្ស"

ចេញ​ផ្សាយ​ ១៤ តុលា ២០២៥ 1048

នៅថ្ងៃទី១៣-១៤ ខែតុលា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ ឯកឧត្តម រដ្ឋលេខាធិការ ហាស់ សារ៉េត និងជាសមាជិក "គជបជ" អមដោយ លោក អ៊ុយ ជីង អនុប្រធាននាយកដ្ឋានកិច្ចការជលផលនៃរដ្ឋបាលជលផល និងលោកស្រី ថាច់ ផាន់ណាឌី អនុប្រធាននាយកដ្ឋានកិច្ចការរដ្ឋបាល និងនីតិកម្មនៃរដ្ឋបាលជលផល បានអញ្ជើញចូលរួម "សិក្ខាសាលាពិគ្រោះយោបល់ថ្នាក់ជាតិស្តីពី ការអនុវត្តយុទ្ធសាស្រ្ត បង្ការ ទប់ស្កាត់អំពើជួញដូរមនុស្ស" ប្រកបដោយប្រសិទ្ធភាព ដើម្បីកាត់បន្ថយចំណាកស្រុកដោយប្រថុយប្រថាន ក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ "គជបជ" នៅសាលប្រជុំទីស្តីការក្រសួងមហាផ្ទៃ។
អង្គសិក្ខាសាលានេះ ក៏មានការអញ្ជើញចូលរួមពីឯកឧត្តម លោក លោកស្រី តំណាងក្រសួងដែលជាសមាជិកគណ:កម្មាធិការជាតិ "គជបជ" ស្ថាប័នពាក់ព័ន្ធ និងអង្គការដៃគូ។ 
ឯកឧត្តមអនុរដ្ឋលេខាធិការ បានគូសបញ្ជាក់ថា អង្គសិក្ខាសាលានេះ រៀបចំឡើងក្នុងគោលបំណង សំខាន់នៃយុទ្ធសាស្រ្ត បង្ការទប់ស្កាត់ ភាពប្រទាក់ក្រឡាជាមួយយុទ្ធសាស្រ្តទាំងបួនរបស់ផែនការយុទ្ធសាស្រ្តជាតិ ស្តីពីការប្រយុទ្ធប្រឆាំងអំពើជួញដូរមនុស្ស ឆ្នាំ២០២៤-២០២៨។ យុទ្ធសាស្ត្រទាំងនោះរួមមាន លើកកម្ពស់ ការបង្ការ ទប់ស្កាត់ រាល់ទម្រង់នៃអំពើជួញដូរមនុស្ស ការកេងប្រវ័ញ្ច និងការរំលោភបំពានកុមារ  ការបង្កើនគុណភាព និងប្រសិទ្ធភាពនៃប្រព័ន្ធយុត្តិធម៌ព្រហ្មទណ្ឌឆ្លើយតបទៅនឹងអំពើជួញដូរមនុស្សគ្រប់ទម្រង់  ការបង្កើនគុណភាព និងប្រសិទ្ធភាពនៃកិច្ចការពារជនរងគ្រោះ និងការពង្រឹងកិច្ចសហប្រតិបត្តិការ ការកសាង និងអនុវត្តច្បាប់ គោលនយោលបាយ និងបទដ្ឋានគតិយុត្ត។
ជាចុងបញ្ចប់ឯកឧត្តមអនុរដ្ឋលេខាធិការ ក៏បានឱ្យដឹងពីលទ្ធផលនៃអង្គសិក្ខាសាលា រួមមាន  ផ្តល់ការអប់រំផ្សព្វផ្សាយពលករកុំឱ្យធ្វើទេសន្តរប្រវេសន៍ទៅប្រទេសថៃ ជួយសម្រួលរកការជូនពលករឱ្យធ្វើការងារក្នុងស្រុក  ការងារកសិកម្មជាការងារស្នូលធានាសុវត្ថិភាពស្បៀង សម្រាប់ឆ្លើយតបយុទ្ធសាស្រ្តយូរអង្វែង និងស្ថាប័ននីមួយៗត្រូវបំពេញបេសកកម្មតាមវិស័យរបស់ខ្លួន ដើម្បីបញ្ជ្រៀបនិងបង្ការ ទប់ស្កាត់ការជួញដូរមនុស្សគ្រប់ទម្រង់៕