លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំអ្នកសារព័ត៌មាន និងស្ថាប័នពាក់ព័ន្ធ ធ្វើទស្សនកិច្ចសិក្សា និងផ្សព្វផ្សាយលើកទី៣ អំពីសមិទ្ធ​ផល​នៃការកែច្នៃផលិតផលជលផល (ប្រហុក) នៅខេត្តចំនួន៣

ចេញ​ផ្សាយ​ ១១ កញ្ញា ២០២៥ 471

នៅថ្ងៃទី៩ ខែកញ្ញា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារព័ត៌មាន និងទំនាក់ទំនងសាធារណៈ បានដឹកនាំអ្នកសារព័ត៌មាន​ចំនួន ៣៧រូប មកពី២១ស្ថាប័នព័ត៌មាន សរុបអ្នកចូលរួមប្រមាណជាង៧០នាក់ ធ្វើទស្សនកិច្ចសិក្សា និងផ្សព្វផ្សាយអំពីសមិទ្ធផលនៃ​សហគ្រាសដែលមានវិញ្ញាបនបត្រCQS និងក្រុមកែច្នៃប្រហុកដែល​មាន​ស្លាកសញ្ញាសម្គាល់ភូមិសាស្រ្ត GI នៅខេត្តចំនួន៣ រួមមាន៖ ខេត្តកំពង់ធំ ខេត្តសៀមរាប និងខេត្តកំពង់ចាម ដែលធ្វើឡើងរយៈពេល៣ថ្ងៃ ចាប់ពីថ្ងៃ​ទី៩ដល់១១ ខែកញ្ញា ឆ្នាំ២០២៥។

ដំណើរទស្សនកិច្ចនោះ មានការចូលរួមពីលោក  Koen Everaert អនុប្រធាន​សហប្រតិបត្តិការ នៃសហភាពអឺរុបប្រចាំប្រទេសកម្ពុជា លោកបណ្ឌិត ឈួន ចំណាន ប្រធាននាយកដ្ឋានបច្ចេកវិទ្យាកែច្នៃ និងគុណភាព នៃរដ្ឋបាល ជល ផល លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម លោក Sulaiman Berdikeev អ្នកសម្របសម្រួលអន្តរជាតិផ្នែកឯកជន នៃអង្គការ UNIDO លោក សុខ ណារិន តំណាង​ប្រចាំ​ប្រទេសកម្ពុជានៃអង្គការUNIDO បណ្ឌិត Seetharama Shetty THOMBATHU ប្រធានទីប្រឹក្សាបច្ចេកទេស​អង្គការUNIDO និងអង្គភាពពាក់ព័ន្ធមួយចំនួនទៀត សរុបអ្នកចូលរួមប្រមាណ ៧០រូប។

ថ្លែងនៅចំពោះមុខអង្គពិធី នាដំណើរទស្សនកិច្ច ទៅកាន់សិប្បកម្មកែ​ច្នៃផល​នេសាទនៅខេត្តកំពង់ធំ លោកជំទាវអនុរដ្ឋលេខាធិការ​បានគូស​បញ្ចាក់ពីសារ​សំខាន់នៃតួនាទីរបស់អ្នកសារព័ត៌មាន ​ក្នុងការចូល​រួមផ្សព្វ​ផ្សាយ អំពីផលិត​ផល​កែច្នៃក្នុងស្រុករបស់ខ្មែរ ដែលមានគុណភាព សុវត្ថិ​ភាព និងប្រកប​ដោយស្តង់ដារខ្ពស់។  បើតាមលោកជំទាវ ការធ្វើពហិការដោយអត្តនោម័ត មិន​ប្រើផលិតផល​ថៃពីសំណាក់ប្រជាជនខ្មែរមួយចំនួន បានធ្វើឲ្យផលិតផលខ្មែរចាប់ផ្ដើម «ត្រូវប៉ាន់» ហើយការកុម្មង់ទិញកំពុងកើនឡើងគួរឱ្យកត់សម្គាល់ រហូត​ដល់ផលិត​ផលមួយចំនួនមិនអាចផ្គត់ផ្គង់ទាន់ពេលវេលា។

លោកជំទាវបានបញ្ជាក់បន្ថែមទាក់ទងនឹងប្រសាសន៍ ឯកឧត្តមរដ្ឋមន្រ្តី ឌិត ទីណា លើកឡើងថាការចូលរួមគាំទ្រ​ផលិត​ខ្មែរ​​គឺជាអ្វីដែលកម្ពុជាចង់បាន ហើយក្រសួងនឹងប្រឹងប្រែងឲ្យអស់ពីលទ្ធភាពនិងសមត្ថភាព ធ្វើយ៉ាងណាជួយដល់សហគ្រាសនិងសិប្បកម្ម អាចទទួលបាននូវការគាំទ្រទាំងបច្ចេកទេស និងទុន ពីសំណាក់ដៃគូសហការ ដើម្បីពង្រឹងផលិតកម្មផង និងជាពិសេសធានាគុណភាព និងសុវត្ថិភាពចំណីអាហារសម្រាប់អ្នកទទួលទានផង។ ​កំណើននៃកែច្នៃផលិតផលកសិកម្មមិនត្រឹមតែអាចបង្កើនតម្លៃបន្ថែមដល់កសិផល ឬផលិតផលជលផលប៉ុណ្ណោះទេ។ វាផ្ដល់ផលចំណេញផ្នែកសេដ្ឋកិច្ច និងអាចផ្តល់ការងារជូនប្រជាជនផងដែរ ស្រប​តាម​​គោល​នយោបាយ​របស់ក្រសួងគឺ៖ «មានហូប មានបាន មានប្រើ និង​មានរហូត»៕