ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំប្រជុំពិភាក្សាផ្សព្វផ្សាយចុះបោះតម្រុយព្រំប្រទល់ព្រៃលិចទឹកនៅភូមិសាស្ត្រឃុំឈូក ខេត្តត្បូងឃ្មុំ
ចេញផ្សាយ ៤ កុម្ភៈ ២០២៦ 2027
នៅថ្ងៃទី៣ ខែកុម្ភ: ឆ្នាំ២០២៦ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពី ឯកឧត្តមរដ្ឋលេខាធិការ ហាស់ សារ៉េត បានអញ្ជើញដឹកនាំប្រជុំពិភាក្សាផ្សព្វផ្សាយចុះបោះតម្រុយព្រំប្រទល់ដីព្រៃលិចទឹកនៅក្នុងភូមិសាស្ត្រឃុំឈូក អត្ថប្រយោជន៍ព្រៃលិចទឹក ការពារភ្លើងឆេះព្រៃលិចទឹក និងកំណត់ព្រំប្រទល់ដីព្រៃលិចទឹកដែលត្រូវការពារដាច់ខាត ផែនការបោះបង្គោលព្រំប្រទល់ដីព្រៃលិចទឹកក្នុងតំបន់គ្រប់គ្រងជលផលដល់អាជ្ញាធរដែនដី អង្គភាពសុរិយោដី មេភូមិ ប្រជាពលរដ្ឋក្នុងឃុំឈូក ស្រុកក្រូចឆ្មារ ខេត្តត្បូងឃ្មុំ (នៅសាលាឃុំឈូក)។
កិច្ចប្រជុំនេះ មានការចូលរួមពី អភិបាលរង នៃគណ:អភិបាលខេត្តត្បូងឃ្មុំ ប្រធានមន្ទីរកសិកម្មខេត្តត្បូងឃ្មុំ អភិបាលស្រុកក្រូចឆ្មារ និងសហការី នាយរងខណ្ឌរដ្ឋបាលជលផល និងសហការី ប្រធានការិយាល័យភូមិបាលស្រុកក្រូចឆ្មារ និងសហការី និងលោកមេឃុំឈូក ក្រុមប្រឹក្សា មេភូមិពាក់ព័ន្ធ សហគមន៍នេសាទ មានការចូលរួមពីកម្លាំងវរ:សេនាតូចកាំភ្លើងយោធាភូមិភាគ២ និងកម្លាំងប្រចាំការគោលដៅស្រុកក្រូចឆ្មារ។
ឯកឧត្តមអនុរដ្ឋលេខាធិការបានគូសបញ្ជាក់ថា ក្រុមការងារជំនាញបានចុះពិនិត្យទិដ្ឋភាពច្បាប់ និងពិភាក្សាលើទីតាំងដែលត្រូវបោះតម្រុយការពារការទន្ទ្រានដីព្រៃលិចទឹក ពិនិត្យពិភាក្សាពីបញ្ហាប្រឈមនានាក្នុងការការពារដីកន្លែងសហគមន៍នេសាទមច្ឆាដងស្ទឹង និងចុះបោះបង្គោលតម្រុយការពារដីព្រៃលិចទឹក ចំនួន២បង្គោល ជានិម្មិតសញ្ញា នៅចំណុចក្បែរស្ពានក្របីគ្រៀក ពេលខាងមុខក្រុមការងារ និងបន្តបោះបង្គោលព្រំស៊ីម៉ងត៍ ចំនួន២០០ដើម លើផ្ទៃដី ចំនួន ១៥៩៥ហិកតា។
ជាចុងបញ្ចប់ ឯកឧត្តមអនុរដ្ឋលេខាធិការ បានអំពាវនាវដល់ប្រជាពលរដ្ឋឱ្យចូលរួមថែរក្សាការពារភ្លើងឆេះព្រៃលិចទឹក និងព្រៃលិចទឹកដើម្បីជាជម្រកជីវចម្រុះ ធនធានជលផល បរិស្ថាន របបអាហារ និងចំណូលរបស់ប្រជាពលរដ្ឋ និងហាមពង្រីកកន្ទុយដីស្រែចូលទៅក្នុងតំបន់ដីព្រៃលិចទឹក។ ចំណែក ជនប្រព្រឹត្តបទល្មើសព្រៃលិចទឹក នឹងត្រូវបញ្ជូនសំណុំរឿងទៅតុលាការ ហើយជនបង្កធ្វើឱ្យប៉ះពាល់ ខូចខាតព្រៃលិចទឹក នឹងត្រូវទទួលខុសត្រូវចំពោះមុខច្បាប់៕
