ព័ត៌មានផ្សេងៗទៀត
កិច្ចប្រជុំលេខាធិការដ្ឋាននៃក្រុមការងារចម្រុះសម្របសម្រួលខ្សែច្រវាក់តម្លៃផលិតផលកសិកម្ម
ចេញផ្សាយ ១៤ កក្កដា ២០២៦ 4016
នារសៀលថ្ងៃទី១៣ ខែកក្កដា ឆ្នាំ២០២៦ ឯកឧត្តម តូច ប៊ុនហួរ ឯកឧត្តម យ៉ង សាំងកុមារ និងឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានរួមគ្នាដឹកនាំកិច្ចប្រជុំលេខាធិការដ្ឋាននៃក្រុមការងារចម្រុះសម្របសម្រួលខ្សែច្រវាក់តម្លៃផលិតផលកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំនេះមានគោលបំណងពិភាក្សាលើការប្រើប្រាស់កញ្ចប់ឥណទានថវិកាចំនួន ១០០លានដុល្លារ របស់រាជរដ្ឋាភិបាល ក្រោមកម្មវិធីគោលនយោបាយអាទិភាពទី៥ ដើម្បីជួយរក្សាលំនឹងថ្លៃកសិផលឱ្យអស់ពីលទ្ធភាព ជាប្រយោជន៍ដល់ប្រជាកសិករ។
សូមជម្រាបជូនថា កម្មវិធីគោលនយោបាយនេះត្រូវបានប្រកាសជាផ្លូវការ កាលពីចុងឆ្នាំ២០២៣ ដោយ សម្តេចមហាបវរធិបតី នាយករដ្ឋមន្ត្រី។ កន្លងមក ជាមួយការតម្រង់ទិស របស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្រុមការងារចម្រុះសម្របសម្រួលខ្សែច្រវាក់តម្លៃបានស្នើសុំការគាំទ្រពីរាជរដ្ឋាភិបាល និងបានផ្តល់កិច្ចអន្តរាគមន៍ចំនួន ៥លើក ក្នុងរូបភាពជាកម្ចីការប្រាក់ទាបដល់រោងម៉ាស៊ីនកិនស្រូវ តាមរយ:ធនាគារអភិវឌ្ឍជនបទ និងកសិកម្ម ដើម្បីបង្កើនសមត្ថភាពប្រមូលទិញស្រូវ និងជួយរក្សាលំនឹងថ្លៃស្រូវជូនបងប្អូនប្រជាកសិករ ប្រកបដោយប្រសិទ្ធភាព សំដៅធានាសន្តិសុខស្បៀង និងលើកកម្ពស់ជីវភាពប្រជាកសិករ។
ក្នុងកិច្ចប្រជុំនេះ ថ្នាក់ដឹកនាំក្រសួង និងក្រុមការងារលេខាធិការដ្ឋាន បានប្រជុំពិភាក្សា និងវាយតម្លៃលើប្រភេទកសិផលអាទិភាពមួយចំនួនដែលគួរស្នើសុំអន្តរាគមន៍ ជាពិសេសដំណាំស្រូវ ដោយផ្តោតលើតួអង្គដែលអាចស្នើសុំ និងលទ្ធភាពទទួលបានឥណទានអន្តរាគមន៍ ត្រៀមសម្រាប់កិច្ចប្រជុំក្រុមការងារចម្រុះសម្របសម្រួលខ្សែច្រវាក់តម្លៃ នាពេលខាងមុខ៕
