ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាអធិបតីបើកសិក្ខាសាលាប្រចាំឆ្នាំឆ្លុះបញ្ចាំងពីការគម្រោងកែលម្អសន្តិសុខទឹកកម្ពុជានៅខេត្តកែប

ចេញ​ផ្សាយ​ ១៤ មីនា ២០២៦ 4669

នៅថ្ងៃទី១៣ ខែមីនា ឆ្នាំ២០២៦ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជានាយកគម្រោងកែលម្អសន្តិសុខទឹកកម្ពុជាសមាសភាពទី៣ ឯកឧត្តម អឿន ចន្ថា អនុរដ្ឋលេខាធិការក្រសួងធនធានទឹក និងឧតុនិយម ជានាយកគម្រោងកែលម្អសន្តិសុខទឹកកម្ពុជា និង លោក ចាន់ វីរៈ ប្រធានក្រុមការងារជាន់ខ្ពស់ តំណាងធនាគារពិភពលោក បានអញ្ជើញជាគណៈអធិបតីបើកសិក្ខាសាលាប្រចាំឆ្នាំឆ្លុះបញ្ចាំងពីគម្រោងនៅខេត្តកែប។ 
សិក្ខាសាលានេះ មានការអញ្ជើញចូលរួមពី តំណាងក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គណៈកម្មាធិការជាតិទន្លេមេគង្គកម្ពុជា អាជ្ញាធរទន្លេសាប មន្ត្រីមន្ទីរកសិកម្ម រុក្ខាប្រមាញ់ និងនេសាទ មន្ត្រីមន្ទីរធនធានទឹក និងឧតុនិយម នៃខេត្តគោលដៅទាំង៤ មានខេត្តកំពង់ធំ ក្រចេះ ព្រះវិហារ និងខេត្តមណ្ឌលគិរី និងមន្ត្រីកសិកម្មឃុំ នៃឃុំគោលដៅខេត្តទាំង៤ សរុបចំនួន១១៦នាក់។ 
ថ្លែងក្នុងអង្គសិក្ខាសាលា ឯកឧត្តមរដ្ឋលេខាធិការ បានគូសបញ្ជាក់ពី គោលបំណងនៃសិក្ខាសាលានេះ គឺរៀបចំឡើងដើម្បីពិនិត្យ និងវាយតម្លៃលើវឌ្ឍនភាពការងារដែលសម្រេចបាន ព្រមទាំងឆ្លុះបញ្ចាំងពីបញ្ហាប្រឈម និងចំណុចខ្វះខាតដែលត្រូវកែលម្អ សំដៅជំរុញប្រសិទ្ធភាពនៃការអនុវត្តគម្រោងបន្តទៀត។ ជាពិសេសគឺធ្វើយ៉ាងណាឱ្យកសិករក្រុមផលិតទទួលយកនិងអនុវត្តបច្ចេកទេសកសិកម្មឆ្លាតវៃបានដោយជោគជ័យ។ បន្ថែមលើសពីនេះក្រុមការងារអនុវត្តគម្រោងត្រូវសហការ ជួយគ្នា ដើម្បីសម្រេចគោលដៅរួមរបស់គម្រោងទាំងអស់គ្នា។
ជាមួយគ្នានេះ ឯកឧត្តមក៏បានលើកទឹកចិត្តដល់សិក្ខាកាមទាំងអស់ ឱ្យបន្តចូលរួមផ្តល់មតិឱ្យបានផុសផុល ចែករំលែកបទពិសោធន៍ និងពិភាក្សារកដោះស្រាយរាល់បញ្ហាប្រឈមនានា ដើម្បីជាធាតុចូលដ៏សំខាន់សម្រាប់យកទៅអនុវត្តការងារឱ្យទទួលបានលទ្ធផលកាន់តែប្រសើរស្របតាមផែនការយុទ្ធសាស្ត្រ។ ឯកឧត្តម បានសង្កត់ធ្ងន់ថា រាល់ធាតុចូល និងបទពិសោធន៍ដែលបានចែករំលែកក្នុងថ្ងៃនេះ នឹងត្រូវយកទៅកែសម្រួលផែនការសកម្មភាព ដើម្បីធានាថាគម្រោងនឹងសម្រេចបាននូវប្រសិទ្ធភាព តម្លាភាព និងបម្រើសេវាជូនប្រជាពលរដ្ឋឱ្យបានល្អបំផុត៕