ឯកឧត្តមអនុរដ្ឋលេខាធិការ គី ច័ន្ទរំដួល អញ្ជើញចុះពិនិត្យ និងពិគ្រោះយោបល់ ដើម្បីផ្សព្វផ្សាយពីការបង្កើតសហគមន៍កសិកម្មទំនើបដំណាំស្វាយចន្ទី តាមឃ្លាំងប្រមូលទិញគ្រាប់ស្វាយចន្ទី នៅខេត្តប៉ៃលិន

ចេញ​ផ្សាយ​ ២៧ មេសា ២០២៥ 3370

នៅថ្ងៃទី២៥ ខែមេសា ឆ្នាំ២០២៥ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពីលោក អ៊ឹម សុភឿន អនុប្រធានមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន និងមន្ត្រីជំនាញ បានអញ្ជើញចុះពិនិត្យពីសក្តានុពលនិងពិគ្រោះយោបល់ ដើម្បីផ្សព្វផ្សាយពីការបង្កើតសហគមន៍កសិកម្មទំនើបស្វាយចន្ទី នៅខេត្តប៉ៃលិន។

ក្នុងដំណើរនេះ ឯកឧត្តមអនុរដ្ឋលេខាធិការ បានជួបជាមួយអាជីវករប្រមូលទិញគ្រាប់ស្វាយចន្ទី ចំនួន២កន្លែងដែលស្ថិតនៅ សង្កាត់អូតាវ៉ៅ ក្រុងប៉ៃលិន ខេត្តប៉ៃលិន។ បើតាមឯកឧត្តម អាជីវករប្រមូលទិញបានចំនួន450-500តោន ក្នុងមួយថ្ងៃ ដោយតម្លៃគ្រាប់សើម 5550៛ ក្នុងមួយគីឡូក្រាម ហើយចន្ទីនៅប៉ៃលិននេះ មានគុណភាណល្អ អត្រាសាច់ 27%-30%. 105-110គ្រាប់ក្នុងមួយគីឡូក្រាម។

ឯកឧត្តមអនុរដ្ឋលេខាធិការ បានគូសបញ្ជាក់ថា គ្រាប់ស្វាយចន្ទីទាំងនេះ ប្រមូលទិញក្នុងខេត្តប៉ៃលិន បាត់ដំបង ពោធិ៍សាត់ និងខេត្តបន្ទាយមានជ័យ និងរៀបចំលក់បន្តទៅខេត្តកំពង់ចាម និងប្រទេសវៀតណាម។

ជាចុងបញ្ចប់ ឯកឧត្តមអនុរដ្ឋលេខាធិការ ក៏បានស្នើសុំដល់អ្នកប្រមូលទិញទាំអស់ ជួយផ្សព្វផ្សាយបន្តអំពីអត្ថប្រយោជន៍នៃការចងក្រងបង្កើតសហគមន៍ទំនើបដំណាំស្វាយចន្ទីជូនដល់កសិករដែលដាំដុះដំណាំស្វាយចន្ទីរផងដែរ៕