ព័ត៌មានផ្សេងៗទៀត
ត្រីមេពូជ កូនត្រី និងវារីសត្វពូជចំនួនសរុបជាង២០ប្រភេទ ប្រមាណជា១,៥លានក្បាលត្រូវបានប្រលែងចូលបឹងធម្មជាតិទន្លេបាទី នៅខេត្តតាកែវ ក្នុងកម្មវិធីទិវាមច្ឆជាតិ១ កក្កដា លើកទី២០
ចេញផ្សាយ ១ កក្កដា ២០២៥ 3423
នៅព្រឹកថ្ងៃទី១ ខែកក្កដា ឆ្នាំ២០២៥ កម្មវិធីទិវាមច្ឆជាតិ ១កក្កដា លើកទី២០ ឆ្នាំ២០២៥ បានប្រារព្ធធ្វើឡើងនៅបឹងទន្លេបាទី ភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ ក្រោមអធិបតីភាពដ៏ខ្ពង់ខ្ពស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
នាឱកាសនោះក្រសួងកសិកម្ម រុក្ខាប្រមាញ់ និងនេសាទ បានរៀបចំការប្រលែងត្រីមេពូជ កូនត្រី និងវារីសត្វសរុបជាង ២០ប្រភេទ ប្រមាណ ១,៥លានក្បាល ដូចជា ត្រីប្រា ត្រីពោ ត្រីឆ្ពិន ត្រីកាហែ ត្រីគល់រាំង អណ្ដើក កន្ធាយ បង្កងទឹកសាប ។ល។ ចូលទៅបឹងទន្លេបាទី។
បឹងទន្លេបាទី មានបណ្តោយប្រវែងប្រមាណ ៧គ.ម និងទទឹងប្រវែង ១គ.ម ជម្រៅ៧ម៉ែត្រនៅរដូវស្សា និង២ម៉ែត្រ នៅរដូវប្រាំង បានកំពុងដើរតួនាទីជាប្រភពទឹកដ៏សំខាន់សម្រាប់ផ្គត់ផ្គង់ទឹកស្អាតប្រើប្រាស់ ការធ្វើកសិកម្ម និងការរក្សាទុក នូវត្រីមេពូជសម្រាប់បន្តពូជ ដែលជាប្រភពស្បៀងអាហារ និងប្រាក់ចំណូលរបស់ប្រជាពលរដ្ឋ ពឹងអាស្រ័យលើផលនេសាទ កសិកម្ម និងទេសចរណ៍។
ជារៀងរាល់ឆ្នាំត្រីមេពូជ កូនត្រី និងវារីសត្វពូជស្រុកប្រមាណ ៥លានក្បាល ត្រូវប្រលែងចូលទៅក្នុងដែនទឹកធម្មជាតិ ទាំងនៅទីតាំងពិធី និងនៅទូទាំងប្រទេស។ កាលពីឆ្នាំ២០២៤ ទិវាមច្ឆជាតិ ១កក្កដា លើកទី១៩ ត្រូវបានរៀបចំឡើងនៅបឹងធំ ស្ថិតនៅភូមិសាស្ត្រឃុំវិហារធំ ស្រុកកំពង់សៀម ខេត្តកំពង់ចាម ដោយបានប្រលែងត្រីមេពូជ កូនត្រី និងវារីសត្វសរុប២០ប្រភេទ ប្រមាណ១,៥លានក្បាលទៅក្នុងបឹងធំ។
សូមជម្រាបថា “ទិវាមច្ឆជាតិ” ត្រូវបានប្រារព្ធឡើងរៀងរាល់ថ្ងៃទី១ ខែកក្កដា ចាប់តាំងពីឆ្នាំ២០០៣ មកទល់ពេលបច្ចុប្បន្ន ក្នុងគោលបំណងដើម្បីផ្សព្វផ្សាយ និងបំផុសស្មារតីឱ្យប្រជាពលរដ្ឋនៅទូទាំងប្រទេស ចូលរួមអភិរក្ស និងអភិវឌ្ឍន៍ធនធានជលផលប្រកបដោយនិរន្តរភាព សំដៅបង្កើនផលស្តុកមច្ឆជាតិ បំពេញសេចក្តីត្រូវការអាហារ មូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពប្រជាពលរដ្ឋ៕
