កិច្ចប្រជុំស្ដីពីការពង្រឹងការគ្រប់គ្រង និងត្រួតពិនិត្យសារធាតុញៀន និងសារធាតុគីមីផ្សំពាក់ព័ន្ធនឹងការនាំចូល Ammonium Chloride

ចេញ​ផ្សាយ​ ៣ វិច្ឆិកា ២០២៦ 261

នៅថ្ងៃទី២​ ខែវិច្ឆិកា​ ឆ្នាំ​២០២៦​ លោកស្រី គិត វិសិដ្ឋកញ្ញា អគ្គនាយករងនៃអគ្គនាយកដ្ឋានក្សេត្រសាស្ត្រ បានដឹកនាំកិច្ចប្រជុំស្តីពីការគ្រប់គ្រង និងត្រួតពិនិត្យសារធាតុញៀន និងសារធាតុគីមីផ្សំ ពាក់ព័ន្ធនឹងក្រុមហ៊ុននាំចូលសារធាតុ Ammonium Chloride នៅអគ្គនាយកដ្ឋានក្សេត្រសាស្ត្រ​ ដោយមានការចូលរួមពីថ្នាក់ដឹកនាំ និងមន្ត្រីជំនាញនៃនាយកដ្ឋានគ្រប់គ្រងធនធានដីនិងជីកសិកម្ម ប្រធានការិយាល័យនីតិកម្មនៃមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ និងខេត្តកណ្ដាល ព្រៃវែង កំពង់ស្ពឺ និងបន្ទាយមានជ័យ ព្រមទាំងតំណាងក្រុមហ៊ុនឯកជនពាក់ព័ន្ធចំនួន ១០ ក្រុមហ៊ុន។ 
កិច្ចប្រជុំនេះមានគោលបំណងពង្រឹងប្រសិទ្ធភាពនៃការគ្រប់គ្រងការនាំចូល ការដឹកជញ្ជូន ការចែកចាយ និងការរក្សាទុកសារធាតុ Ammonium Chloride ដើម្បីទប់ស្កាត់ការលួចបង្វែរទិសដៅប្រើប្រាស់ពីអាជីវកម្មស្របច្បាប់ទៅជាការផលិតគ្រឿងញៀនសំយោគខុសច្បាប់។ ជាមួយគ្នានេះ កិច្ចប្រជុំក៏បានណែនាំដល់មន្ត្រីជំនាញអំពីតួនាទីក្នុងការត្រួតពិនិត្យឯកសារមុននាំចូល ការផ្ទៀងផ្ទាត់តម្រូវការប្រើប្រាស់ ការត្រួតពិនិត្យឃ្លាំងស្តុកទុក និងការតាមដានរបាយការណ៍សន្និធិ និងការប្រើប្រាស់របស់ក្រុមហ៊ុន។
ជាមួយគ្នានេះ តំណាងក្រុមហ៊ុនទាំងអស់ត្រូវបានណែនាំឱ្យគោរពច្បាប់ និងបទប្បញ្ញត្តិជាធរមាន អនុវត្តតាមនីតិវិធីប្រតិបត្តិស្តង់ដារ (SOP) និងបំពេញកាតព្វកិច្ចរាយការណ៍អំពីការនាំចូល ការប្រើប្រាស់ និងសន្និធិឱ្យបានទៀងទាត់។ ជាពិសេស មិនត្រូវប្រើប្រាស់ ឬចែកចាយសារធាតុគីមីដែលទើបនាំចូល មុនពេលមន្ត្រីជំនាញចុះត្រួតពិនិត្យ និងផ្ទៀងផ្ទាត់ឡើយ។ ក្រុមហ៊ុនក៏ត្រូវសហការជាមួយក្រុមការងារអន្តរក្រសួង និងរាយការណ៍ជាបន្ទាន់ក្នុងករណីមានសកម្មភាពទិញលក់គួរឱ្យសង្ស័យ ឬបុគ្គលដែលមិនអាចបញ្ជាក់អត្តសញ្ញាណ និងគោលបំណងប្រើប្រាស់បានច្បាស់លាស់។
តាមរយៈកិច្ចប្រជុំនេះ គឺជាការរួមចំណែកដ៏សំខាន់ក្នុងការលើកកម្ពស់ការទទួលខុសត្រូវរបស់មន្ត្រីជំនាញ និងក្រុមហ៊ុនឯកជន ព្រមទាំងពង្រឹងកិច្ចសហការក្នុងការគ្រប់គ្រងសារធាតុគីមីឱ្យមានសុវត្ថិភាព តម្លាភាព និងប្រសិទ្ធភាព ដើម្បីទប់ស្កាត់ការប្រើប្រាស់សារធាតុគីមីខុសគោលដៅ និងចូលរួមប្រយុទ្ធប្រឆាំងនឹងគ្រឿងញៀនខុសច្បាប់។