ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្មដឹកនាំក្រុមការងារ ចុះប្រកាសលទ្ធផលប្រជាកសិករទទួលបានការគាំទ្រ ពីគម្រោង EMPOWER នៅស្រុកស្វាយលើ ខេត្តសៀមរាប
ចេញផ្សាយ ២៣ សីហា ២០២៦ 3307
នៅថ្ងៃទី២២ ខែសីហា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្តគម្រោង EMPOWER ប្រចាំស្រុកស្វាយលើ និងស្រុកវ៉ារិន ខេត្តសៀមរាប បានអញ្ជើញបន្តដឹកនាំក្រុមការងារ ចុះប្រកាសលទ្ធផល និងជូនដំណឹងដល់ប្រជាកសិករដែលទទួលបានការគាំទ្រពីគម្រោង EMPOWER ដែល ផ្ដល់ជូនដល់ឃុំចំនួនពីរគឺ៖ ឃុំខ្នងភ្នំ និងឃុំកន្ទួត ក្នុងស្រុកស្វាយលើ ។
ពិធីធ្វើឡើងនៅសាលាស្រុកស្វាយលើ មានការចូលរួមពី លោក ហៃ វាសនា អនុប្រធានមន្ទីរកសិកម្ម រុក្ខាប្រមាញ់ និងនេសាទ និងសហការី លោក ផន សុផាត អភិបាលរងស្រុកស្វាយលើ ព្រមទាំងអាជ្ញាធរមូលដ្ឋាន មន្ត្រីកសិកម្មឃុំ និងប្រជាកសិករ សរុបប្រមាណ ១៥០នាក់។
ក្នុងជំនួបជាមួយប្រជាកសិករ ឯកឧត្តម ឃុន សាវឿន បានគូសបញ្ជាក់ថា សម្រាប់ប្រជាកសិករនៅស្រុកស្វាយលើ គម្រោង EMPOWER បានកំណត់ជម្រើសមុខរបរកសិកម្មចំនួន២ប្រភេទ ដើម្បីផ្តល់ឱកាសឱ្យប្រជាកសិករជ្រើសរើសតាមស្ថានភាពរួមមាន៖ ការដាំបន្លែក្នុងផ្ទះសំណាញ់ និងការចិញ្ចឹមមាន់ស្រែ។
ទន្ទឹមនឹងនោះ ឯកឧត្តមរដ្ឋលេខាធិការ បានបញ្ជាក់ថា ក្រសួងកសិកម្ម នឹងបន្តផ្តល់ការគាំទ្រដល់ប្រជាកសិករ ដែលទទួលបានការជ្រើសរើសពីគម្រោង តាមរយៈការបណ្តុះបណ្តាលចំណេះដឹង និងបច្ចេកទេសកសិកម្ម ការផ្តល់សម្ភារៈ និងធាតុចូលសម្រាប់ផលិតកម្ម ព្រមទាំងការតភ្ជាប់ទីផ្សារនៅពេលប្រមូលផល។ តាមរយៈការគាំទ្ររបស់គម្រោង ប្រជាកសិករដែលទទួលបានការជ្រើសរើស នឹងទទួលបានសម្ភារៈផលិតកម្មកសិកម្ម ក្នុងនោះរួមមាន៖ កូនមាន់ពូជ និងចំណី ពូជបន្លែ មេផ្សិត និងជី សម្រាប់អនុវត្តមុខរបរឱ្យមានប្រសិទ្ធភាព និងនិរន្តរភាព៕
