លោកជំទាវអនុរដ្ឋលេខាធិការ អ៊ឹម រចនា អញ្ជើញជួបសំណេះសំណាលជាមួយ លោកបណ្ឌិត Seetharama Shetty THOMBATHU ប្រធានទីប្រឹក្សាបច្ចេកទេស នៃអង្គការ (UNIDO) នៅទីស្តីការក្រសួងកសិកម្ម

ចេញ​ផ្សាយ​ ៥ ធ្នូ ២០២៥ 1032

នៅថ្ងៃទី៥ ខែធ្នូ ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបសំណេះសំណាលជាមួយ លោកបណ្ឌិត Seetharama Shetty THOMBATHU ប្រធានទីប្រឹក្សាបច្ចេកទេស នៃអង្គការអភិវឌ្ឍន៍ឧស្សាហកម្មសហប្រជាជាតិ ហៅកាត់ថា (UNIDO) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ 
ក្នុងជំនួបនេះ  លោកបណ្ឌិត Seetharama Shetty THOMBATHU បានថ្លែងអំណរគុណដល់ក្រសួងកសិកម្ម រុក្ខាប្រមាញ់ និងនេសាទ ដែលបានសហការយ៉ាងជិតស្និទ្ធជាមួយអង្គការ (UNIDO) ជាពិសេសពាក់ព័ន្ធនឹងការងារព័ត៌មាន ជាពិសេសការរៀបចំដំណើរទស្សនកិច្ចអ្នកសារព័ត៌មានចំនួន៣លើក ដែលបានរួមចំណែកជួយឱ្យគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) បានបិទបញ្ចប់និងជោគជ័យ។
ជាការឆ្លើយតប លោកជំទាវ អឹម រចនា បានថ្លែងអំណរគុណចំពោះកិច្ចខិតខំប្រឹងប្រែងអនុវត្តការងាររបស់អង្គការ (UNIDO) ប្រកបដោយការទទួលខុសត្រូវខ្ពស់ ដើម្បីជាប្រយោជន៍របស់សិប្បកម្ម និងសហគ្រាសដែលកែច្នៃផលិតផលជលផលក្រោយប្រមូលផល។ 
លោកជំទាវក៏បានបញ្ជាក់ផងដែរថា ក្រសួងកសិកម្ម រុក្ខាប្រមាញ់ និងនេសាទ ស្វាគមន៍ជានិច្ចចំពោះកិច្ចសហការជាមួយអង្គការ និងដៃគូពាក់ព័ន្ធនៅក្នុងការងារព័ត៌មាន ដើម្បីធ្វើយ៉ាងណាជំរុញការផ្សព្វផ្សាយឱ្យមានការយល់ដឹងទូលំទូលាយអំពីវិស័យទាំងឡាយដែលស្ថិតនៅក្រោមការទទួលខុសត្រូវរបស់ក្រសួង។ ការងារព័ត៌មាន និងការផ្សព្វផ្សាយជាសាធារណៈអំពីសមិទ្ធផលសំខាន់ៗដែលក្រសួងកសិកម្មសម្រេចបាន ដោយមានការសហការជាមួយអង្គការដៃគូពាក់ព័ន្ធ មានសារសំខាន់ណាស់ ដើម្បីឱ្យសាធារណៈជនបានយល់ដឹងឱ្យកាន់តែច្បាស់ពីកិច្ចខិតខំប្រែងរបស់របស់ក្រសួងដែលជាសេនាធិការរបសើរាជរដ្ឋាភិបាលកម្ពុជា និងអង្គការដៃគូពាក់ព័ន្ធនានា ដើម្បីលើកកម្ពស់វិស័យកសិកម្ម ក្នុងគោលដៅធ្វើយ៉ាងណាឱ្យប្រជាជនកម្ពុជា «មានហូប មានបាន មានប្រើ មានរហូត»៕