ចូលរួមទាំងអស់គ្នា អប់រំផ្សព្វផ្សាយដល់និស្សិតកសិកម្ម ដើម្បីបង្ការគ្រឿងញៀន និងការឆ្លងមេរោគអេដស៍

ចេញ​ផ្សាយ​ ៣១ កក្កដា ២០២៦ 2879

នៅថ្ងៃទី៣០ ខែកក្កដា ឆ្នាំ២០២៦ ក្រុមការងារប្រយុទ្ធប្រឆាំងគ្រឿងញៀន និងគណៈកម្មាធិការប្រយុទ្ធនឹងជំងឺអេដស៍ ប្រចាំក្រសួងកសិកម្ម រុក្ខាប្រមាញ់ និងនេសាទ បានសហការជាមួយអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន និងអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍ រៀបចំពិធីអប់រំផ្សព្វផ្សាយដល់និស្សិតនៃវិទ្យាស្ថានជាតិកសិកម្មកំពង់ចាម ចំនួន ២០០នាក់ ដើម្បីពង្រឹងការយល់ដឹង និងជំរុញការចូលរួមបង្ការ ទប់ស្កាត់ការប្រើប្រាស់គ្រឿងញៀន និងការឆ្លងមេរោគអេដស៍។
កម្មវិធីនេះប្រព្រឹត្តទៅក្រោមអធិបតីភាព លោកជំទាវអនុរដ្ឋលេខាធិការ ហ៊ូ សុពណ៌ តំណាង ឯកឧត្តម រដ្ឋលេខាធិការ គង់ ច័ន្ទវាសនា និងជាប្រធានក្រុមការងារផ្សព្វផ្សាយ អប់រំ បង្ការ ទប់ស្កាត់ការប្រើប្រាស់ និងជួញដូរគ្រឿងញៀន និងគណៈកម្មាធិការប្រឆាំងជំងឺអេដស៍  ដោយមានការចូលរួមពី ឯកឧត្តមឧត្តមសេនីយ៍ឯក ថោង សុគន្ធា អគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន លោកវេជ្ជបណ្ឌិត ហួត សេរីរដ្ឋ ប្រធាននាយកដ្ឋានទាក់ទង និងចលនាប្រភពធនធាន នៃអាជ្ញាធរអេដស៍ ថ្នាក់ដឹកនាំក្រុមការងារក្រសួង គណៈគ្រប់គ្រងវិទ្យាស្ថាន លោកគ្រូ អ្នកគ្រូ និងថ្នាក់ដឹកនាំនៃអាជ្ញាធរជាតិទាំងពីរ។
ក្នុងឱកាសនោះ លោកជំទាវ ហ៊ូ សុពណ៌ បានថ្លែងអំណរគុណចំពោះថ្នាក់ដឹកនាំអគ្គលេខាធិការដ្ឋានអាជ្ញាធរជាតិទាំងពីរ ដែលបានសហការរៀបចំកម្មវិធីដ៏មានសារៈសំខាន់នេះ ព្រមទាំងបានកោតសរសើរចំពោះគណៈគ្រប់គ្រងវិទ្យាស្ថាន និងលោកគ្រូ អ្នកគ្រូ ដែលបានចូលរួមសហការយ៉ាងសកម្មក្នុងការអប់រំ និងផ្សព្វផ្សាយចំណេះដឹងដល់និស្សិតកន្លងមក។ 
ជាមួយគ្នានេះ លោកជំទាវក៏បានផ្តាំផ្ញើ និងលើកទឹកចិត្តដល់និស្សិតទាំងអស់ឱ្យប្រកាន់ខ្ជាប់នូវការរស់នៅប្រកបដោយសុខភាពល្អ ចៀសវាង និងបដិសេធដាច់ខាតចំពោះគ្រឿងញៀន ព្រមទាំងអនុវត្តវិធានការបង្ការការឆ្លងមេរោគអេដស៍ ដើម្បីក្លាយជាយុវជនគំរូ មានសមត្ថភាព និងជាធនធានមនុស្សដ៏មានតម្លៃសម្រាប់ការអភិវឌ្ឍវិស័យកសិកម្ម និងសង្គមជាតិ។
ជាកិច្ចបញ្ចប់ ក្រុមនិស្សិតចំនួន ៣ក្រុម បានចូលរួមប្រកួតប្រជែងវោហារកោសល្យ ដោយលើកយកប្រធានបទស្តីពីផលប៉ះពាល់នៃគ្រឿងញៀន និងតួនាទីរបស់យុវជនក្នុងការចូលរួមប្រយុទ្ធប្រឆាំងគ្រឿងញៀន។ កម្មវិធីនេះបានឆ្លុះបញ្ចាំងពីការយល់ដឹង ការទទួលខុសត្រូវ និងការប្តេជ្ញាចិត្តរបស់យុវជន ក្នុងការក្លាយជាកម្លាំងដឹកនាំដ៏សំខាន់ក្នុងការកសាងសង្គមប្រកបដោយសុខសន្តិភាព សុវត្ថិភាព និងគ្មានគ្រឿងញៀន៕