ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ហុង ណារិត អញ្ជើញដឹកនាំមន្ត្រីបង្គោលតាមអនុវិស័យ ចូលរួមកិច្ចប្រជុំត្រៀមរបស់ឧត្តមមន្ត្រីកសិកម្ម និងព្រៃឈើអាស៊ាន ស្តីពីស្ថានភាពវិវត្តន៍ចុងក្រោយនៅមជ្ឈិមបូព៌ា
ចេញផ្សាយ ២៤ មេសា ២០២៦ 2183
នៅថ្ងៃទី២៣ ខែមេសា ឆ្នាំ២០២៦ ឯកឧត្តម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំមន្រ្តីបង្គោលតាមអនុវិស័យ ចូលរួមកិច្ចប្រជុំត្រៀមរបស់ឧត្តមមន្ត្រីកសិកម្ម និងព្រៃឈើអាស៊ាន សម្រាប់កិច្ចប្រជុំពិសេសរបស់រដ្ឋមន្ត្រីកសិកម្ម និងព្រៃឈើអាស៊ាន ស្តីពីស្ថានភាពវិវត្តន៍ចុងក្រោយនៅមជ្ឈិមបូព៌ា ដែលមានលោកជំទាវ Paz J. Benavidez II អនុលេខាធិការ និងជាប្រធាន SOM-AMAF នៃក្រសួងកសិកម្មសាធារណរដ្ឋ ហ្វីលីពីន ក្រោមការសម្របសម្រួលពីលេខាធិការដ្ឋានអាស៊ានតាមរយៈប្រព័ន្ធវីដេអូពីចម្ងាយ។
កិច្ចប្រជុំនេះ ធ្វើឡើងក្នុងគោលបំណងទទួលបានសេចក្តីថ្លែងការណ៍របស់រដ្ឋជាសមាជិកអាស៊ានពីស្ថានភាពនៅមជ្ឈិមបូព៌ា និងផលវិបាកដល់សន្តិសុខស្បៀង។ អង្គប្រជុំក៏បានពិនិត្យ និងពិភាក្សាពីផលប៉ះពាល់នៃស្ថានភាពនៅមជ្ឈិមបូព៌ាទៅលើសន្តិសុខស្បៀងជាតិ និងជីកសិកម្ម រួមទាំងការស្វែងរកសក្តានុពលសម្រាប់កិច្ចសហប្រតិបត្តិការ និងការឆ្លើយតបរួមគ្នាក្នុងតំបន់។ លើសពីនេះ កិច្ចប្រជុំបានពិភាក្សាលើការបង្កើតវិធានការសម្របសម្រួលរួមគ្នា ដើម្បីពង្រឹងភាពធន់នៃស្បៀងអាហារក្នុងតំបន់អាស៊ាន ជាពិសេសក្នុងការឆ្លើយតបទៅនឹងបញ្ហាប្រឈមនាពេលបច្ចុប្បន្ន។
ឯកឧត្តមអនុរដ្ឋលេខាធិការ បានលើកឡើងពីក្តីបារម្ភយ៉ាងខ្លាំងចំពោះភាពតានតឹងនៅមជ្ឈិមបូព៌ា ដែលកំពុងធ្វើឱ្យទីផ្សារថាមពលសកលមានការប្រែប្រួល ជំរុញឱ្យតម្លៃប្រេងឥន្ធនៈ ថ្លៃដឹកជញ្ជូន និងតម្លៃធាតុចូលកសិកម្មដូចជា ជីកសិកម្ម កើនឡើងខ្ពស់។ កត្តាទាំងនេះអាចជះឥទ្ធិពលអវិជ្ជមានដល់ផលិតកម្មកសិកម្ម និងសន្តិសុខស្បៀងនៅកម្ពុជា និងក្នុងតំបន់។ ដើម្បីដោះស្រាយបញ្ហានេះ កម្ពុជាបានលើកឡើងពីការពង្រឹងយន្តការមានស្រាប់ដែលពាក់ព័ន្ធ ក៏ដូចជាការស្វែងរកវិធានការថ្មី ក្នុងការសម្របសម្រួល គាំទ្រ និងអន្តរាគមន៍ក្នុងតំបន់ រួមមាន ការចែករំលែកទិន្នន័យជាក់ស្តែងតាមរយៈប្រព័ន្ធ AFSIS ការរក្សាលំហូរទំនិញ ការប្រើប្រាស់យន្តការសង្គ្រោះបន្ទាន់អាស៊ានបូកបី(APTERR) យុទ្ធសាស្ត្រនិងយន្តការនិរន្តរភាពស្បៀង កសិកម្មនិងព្រៃឈើ លទ្ធភាពនៃការសិក្សាអំពីអភិក្រមអាស៊ានក្នុងការទិញជីក្នុងទំហំធំ (bulk-purchasing) ពីប្រភពផ្សេងទាំងក្នុងនិងក្រៅតំបន់អាស៊ាន បញ្ចៀសការពឹងផ្អែកតែពីប្រភពជាប់គាំង (chokepoints) និងការវិនិយោគរួមគ្នាលើការផលិតជីសរីរាង្គ ដើម្បីកាត់បន្ថយការពឹងផ្អែកលើការនាំចូលជីគីមី ជាដើម។
ទន្ទឹមនឹងនេះ កិច្ចប្រជុំក៏បានពិនិត្យ ពិភាក្សាលើសេចក្តីព្រាងសេចក្តីថ្លែងការណ៍រួម (Joint Press Statement) របស់កិច្ចប្រជុំពិសេស AMAF ដើម្បីផ្តល់ធាតុចូល និងឈានទៅឯកភាពគ្នាមុននឹងអនុម័តជាផ្លូវការ។ ឯកឧត្តមគូសញ្ជាក់ថា រាល់លទ្ធផលនៃកិច្ចប្រជុំត្រៀមនេះ រួមទាំងការរៀបចំសេចក្តីព្រាងរបៀបវារៈ នឹងត្រូវរាយការណ៍ និងដាក់ឆ្លងពិនិត្យ និងសម្រេចក្នុងកិច្ចប្រជុំពិសេសរបស់រដ្ឋមន្រ្តីកសិកម្ម និងព្រៃឈើអាស៊ាន (Special AMAF) នាពេលខាងមុខ៕
