ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញជួបប្រជុំជាមួយអាជ្ញាធរនៃស្រុកចំនួន២ ក្នុងខេត្តក្រចេះ ដើម្បីបង្កើនកិច្ចសហការគ្រប់គ្រងនិងទប់ស្កាត់បទល្មើសនេសាទខុសច្បាប់ នៅតំបន់អភិរក្សសត្វផ្សោតទន្លេមេគង្គ
ចេញផ្សាយ ៤ កុម្ភៈ ២០២៦ 2289
នាថ្ងៃទី៣ ខែកុម្ភៈ ឆ្នាំ២០២៦ នៅសាលាស្រុកចិត្របុរី និងសាលាស្រុកសំបូរ នៃខេត្តក្រចេះ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំចំនួន២ ដាច់ដោយឡែកពីគ្នា ដើម្បីបង្កើនកិច្ចសហការក្នុងការគ្រប់គ្រង ការពារ និងទប់ស្កាត់បទល្មើសនេសាទខុសច្បាប់ នៅតំបន់អភិរក្សសត្វផ្សោតទន្លេមេគង្គ។
កិច្ចប្រជុំមានការចូលរួម ពីលោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល នៃរដ្ឋបាលជលផល លោក ផៃ សុម៉ានី អនុប្រធាននាយកដ្ឋានអភិរក្សជលផល លោក ម៉ៅ វិចិត្រ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ លោក ភួង ទីណា នាយរងអធិការដ្ឋានរដ្ឋបាលជលផលមេគង្គ លោក ម៉ុក ពន្លក នាយខណ្ឌរដ្ឋបាលជលផលក្រចេះ និងលោក យិន វណ្ណៈ អភិបាលស្រុកចិត្របុរី និងលោក គង់ មេត្តា អភិបាលស្រុកសំបូរ នៃខេត្តក្រចេះ។
នាឱកាសនៃកិច្ចប្រជុំ លោកជំទាវ អ៊ឹម រចនា បានលើកឡើងត្រួសៗពីសមិទ្ធផលនៃការងារអភិរក្សសត្វផ្សោតទន្លេមេគង្គ ដែលបានទទួលលទ្ធផលល្អក្នុងឆ្នាំ ២០២៥ កន្លងទៅ។ ក្នុងន័យនេះហើយ ទើបលោកជំទាវស្នើសុំការសហការពីអាជ្ញាធរស្រុកទាំងពីរ គឺស្រុកចិត្របុរី និងស្រុកសំបូរ ដើម្បីដាក់ចេញនូវយុទ្ធសាស្ត្ររួមមួយ ធ្វើយ៉ាងណារក្សាឱ្យបាននូវសមិទ្ធផលដែលសម្រេចបាននាពេលកន្លងមក ពោលគឺធ្វើយ៉ាងណាកុំឱ្យមានសត្វផ្សោតស្លាប់នៅក្នុងឆ្នាំ ២០២៦នេះ។
អង្គប្រជុំបានសម្រេចបង្កើតបណ្ដាញចម្រុះ ដើម្បីកំណត់អត្តសញ្ញាណអ្នកនេសាទប្រើប្រាស់ឧបករណ៍នេសាទខុសច្បាប់ទាំងអស់ ជាពិសេសអ្នកប្រើប្រាស់ឧបករណ៍ឆក់ ជាឧបករណ៍បង្កហានិភ័យខ្ពស់ដល់អាយុជីវិតសត្វផ្សោត ដែលជារតនសម្បត្តិរបស់ជាតិ។ ជាយុទ្ធសាស្ត្រ ចេញពីការកំណត់អត្តសញ្ញាណនេះ មន្ដ្រីជំនាញនិងអាជ្ញាធរស្រុកនឹងអញ្ជើញអ្នកនេសាទទាំងនោះមកពន្យល់ណែនាំ និងឈានទៅស្នើឱ្យបោះបង់ចោលការនេសាទខុសច្បាប់ ជាថ្នូរនឹងការជួយគាំទ្រជីវភាពដោយមុខរបរ ឬជំនាញផ្សេងៗវិញ។
លោកជំទាវអនុរដ្ឋលេខាធិការ បានថ្លែងអំណរគុណចំពោះការប្តេជ្ញាចិត្តខ្ពស់របស់អាជ្ញាធរថ្នាក់ស្រុកចិត្របុរី និងស្រុកសំបូរ ដែលជាតួអង្គដ៏សំខាន់នៅថ្នាក់មូលដ្ឋាន ក្នុងការពិនិត្យតាមដានអ្នកនេសាទក្នុងភូមិសាស្ត្ររបស់ខ្លួន។ រួមជាមួយការគាំទ្រពីថ្នាក់ជាតិ មន្ដ្រីជំនាញ អង្គការដៃគូ និងឆ្មាំទន្លេល្បាតសត្វផ្សោតផង លោកជំទាវជឿជាក់ថា កិច្ចសហការនេះនឹងអាចឈានទៅបង្រ្កាបបទល្មើសនេសាទនៅថ្នាក់មូលដ្ឋានប្រកបដោយប្រសិទ្ធភាព និងប្រសិទ្ធផលខ្ពស់ ដែលនឹងជះផលវិជ្ជមានដល់និរន្ដរភាពធនធានជលផល ព្រមទាំងការងារអភិរក្សសត្វផ្សោត ដែលលោកជំទាវចាត់ទុកថា ជា «ដង្ហើមនៃទន្លេមេគង្គ»ផង៕
