ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាពក្នុងកិច្ចប្រជុំពិនិត្យវឌ្ឍនភាពនិងផែនការឆ្នាំ២០២៦ របស់គម្រោងជលផលសមុទ្រនិងតំបន់ឆ្នេរប្រកបដោយចីរភាព (SCMF)

ចេញ​ផ្សាយ​ ២៥ មេសា ២០២៦ 3813

នាថ្ងៃទី២៤ ខែមេសា ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសហប្រធានគណៈកម្មការតម្រង់ទិសនៃគម្រោងជលផលសមុទ្រនិងតំបន់ឆ្នេរប្រកបដោយចីរភាព (SCMF) បានអញ្ជើញជាអធិបតីភាពក្នុងកិច្ចប្រជុំពិនិត្យវឌ្ឍនភាពនិងផែនការឆ្នាំ២០២៦ របស់គម្រោង SCMF ក្រោមក្របខណ្ឌហិរញ្ញប្បទានរបស់ធនាគារអភិវឌ្ឍន៍អាស៊ី(ADB) និងទីភ្នាក់ងារបារាំងសម្រាប់ការអភិវឌ្ឍ(AFD) នៅអគ្គនាយកដ្ឋានជលផល។
កិច្ចប្រជុំនេះ មានការអញ្ជើញចូលរួមដោយផ្ទាល់និងតាមប្រព័ន្ធវីដេអូពីចម្ងាយ (Zoom) ពីថ្នាក់ដឹកនាំគម្រោង ក្រុមការងារអនុវត្តគម្រោងថ្នាក់ជាតិ និងថ្នាក់ក្រោមជាតិរួមមាន៖ ខេត្តកែប កំពត ព្រះសីហនុ និងខេត្តកោះកុង និងទីប្រឹក្សាបច្ចេកទេសគម្រោង ក្នុងគោលបំណងរាយការណ៍វឌ្ឍនភាពការងារអនុវត្តគម្រោងមកទល់ត្រីមាសទី១ ពិភាក្សាលើបញ្ហាប្រឈមនិងដំណោះស្រាយ ព្រមទាំងដាក់ទិសដៅអនុវត្តបន្ត។ 
ក្រោយពីបានទទួលស្តាប់បទបង្ហាញចប់សព្វគ្រប់ ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់អង្គប្រជុំ បង្កេីនការសហការគ្រប់ភាគីពាក់ព័ន្ធទាំងអស់ឲ្យសម្រេចបានសមិទ្ធិផលជាក់ស្តែងទាំងលើការងារគ្រប់គ្រង អភិរក្ស និងអភិវឌ្ឍ ប្រកបដោយប្រសិទ្ធភាពសេដ្ឋកិច្ច ក្រោមសមាសភាគរបស់គម្រោងរួមមាន៖ ពន្លឿនការដាក់ពង្រាយសំណង់និងប្រអប់ជម្រកត្រីសិប្បនិម្មិតដោយកំណត់ផែនការនិងទីតាំងឱ្យបានជាក់លាក់ បន្តការគាំទ្រសហគមន៍នេសាទទាំងការពង្រឹងសមត្ថភាពគណៈកម្មការសហគមន៍ សមាជិក និងសកម្មភាពសេដ្ឋកិច្ចសហគមន៍ ព្រមទាំងពន្លឿនការអភិវឌ្ឍផែនេសាទនិងហេដ្ឋារចនាសម្ព័ន្ធគាំទ្រសហគមន៍ ដើម្បីឆ្លើយតបតម្រូវការអភិវឌ្ឍសេដ្ឋកិច្ចមូលដ្ឋាន។
ទន្ទឹមនឹងនេះ ឯកឧត្តមរដ្ឋលេខាធិការ បានផ្តល់អនុសាសន៍លើការគ្រប់គ្រងនិងដាំព្រៃកោងកាងដែលទាមទារឱ្យមានការធ្វើបច្ចុប្បន្នភាពទិន្នន័យក្រោមក្របខណ្ឌជលផល និងសហការជាមួយក្រសួងពាក់ព័ន្ធ ព្រមទាំងបង្កើនការគាំទ្រដល់អាជីវកម្មជលផលសមុទ្រ តាមរយៈការពង្រឹងសមត្ថភាពផលិតកម្ម ការបង្កើនតម្លៃបន្ថែម និងឱកាសទីផ្សារ។
អង្គប្រជុំបានសម្តែងនូវការពេញចិត្តនូវប្រសាសន៍ណែនាំរបស់ ឯកឧត្តមរដ្ឋលេខាធិការ សំដៅជំរុញការអនុវត្តគម្រោងប្រកបដោយប្រសិទ្ធភាព និងប្រសិទ្ធផល ដើម្បីសម្រេចបានទៅតាមសូចនាករដែលបានដាក់ចេញ សំដៅធានានិរន្តភាពធនធានជលផលសមុទ្រ បង្កើនផលប្រយោជន៍សេដ្ឋកិច្ចជូនដល់សហគមន៍និងប្រជាពលរដ្ឋនៅតាមមូលដ្ឋាន និងរួមចំណែកកាន់តែប្រសើរក្នុងការអភិវឌ្ឍសេដ្ឋកិច្ចជាតិ៕