ព័ត៌មានផ្សេងៗទៀត
ឯកឧត្តម ប៉ែន ផល្លីកា ដឹកនាំក្រុមការងារចុះល្បាត ត្រួតពិនិត្យ និងទប់ស្កាត់បទល្មើសជលផល នៅខេត្តតាកែវ
ចេញផ្សាយ ៣ កញ្ញា ២០២៦ 438
នៅថ្ងៃទី៣១ ខែសីហា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារចម្រុះ ចុះល្បាត ត្រួតពិនិត្យ និងទប់ស្កាត់បទល្មើសជលផល នៅដែននេសាទសហគមន៍គោកធ្លក និងសហគមន៍បូរីជលសារ ស្ថិតក្នុងស្រុកអង្គរបូរី និងស្រុកបូរីជលសារ ខេត្តតាកែវ។
បេសកកម្មនេះ មានការចូលរួមពីលោក ភួង ទីណា ប្រធាននាយកដ្ឋានអធិការកិច្ចជលផល នៃអគ្គនាយកដ្ឋានជលផល លោក ពីង ទិត នាយខណ្ឌរដ្ឋបាលជលផលតាកែវស្តីទី ព្រមទាំងមន្ត្រីផ្នែក និងសង្កាត់រដ្ឋបាលជលផលពាក់ព័ន្ធ និងសហគមន៍នេសាទ សរុបកម្លាំងចំនួន ១៧រូប និងទូកស្មាច់ ៣គ្រឿង។
ក្នុងប្រតិបត្តិការនេះ ក្រុមការងារបានធ្វើការត្រួតពិនិត្យស្ថានភាពនេសាទនៅតាមតំបន់គោលដៅ និងបានពិនិត្យឃើញរបាំងសាច់អួនក្រឡា ៤ផឹង នៅតាមតំបន់ជាប់ព្រំដែន ដែលជារបស់សហគមន៍នេសាទ និងមានមូលដ្ឋានស្របតាមអនុក្រឹត្យលេខ ០៣៥ ខណៈនៅតំបន់ខាងក្នុងពុំមានការដាក់របាំងសាច់អួនប្រភេទនេះឡើយ។
ក្នុងឱកាសនោះ ឯកឧត្តម ប៉ែន ផល្លីកា បានណែនាំដល់មន្ត្រីជំនាញ និងភាគីពាក់ព័ន្ធ ឱ្យបន្តពង្រឹងការសហការល្បាត ត្រួតពិនិត្យ និងទប់ស្កាត់បទល្មើសជលផលឱ្យបានជាប់ជាប្រចាំ ជាពិសេសត្រូវចាត់វិធានការទប់ស្កាត់ការចូលមកដាក់ស្បៃមុង ឬប្រព្រឹត្តសកម្មភាពនេសាទខុសច្បាប់ ដោយជនបរទេសក្នុងភូមិសាស្ត្រកម្ពុជា ដើម្បីធានាបាននូវការគ្រប់គ្រង និងការពារធនធានជលផលប្រកបដោយប្រសិទ្ធភាព។
ជាចុងក្រោយ ឯកឧត្តមអនុរដ្ឋលេខាធិការ បានថ្លែងអំណរគុណ និងកោតសរសើរដល់ក្រុមការងារចម្រុះទាំងអស់ ដែលបានខិតខំបំពេញភារកិច្ចដោយស្មារតីទទួលខុសត្រូវ និងចូលរួមយ៉ាងសកម្មក្នុងការទប់ស្កាត់បទល្មើសជលផល ដើម្បីការពារ អភិរក្ស និងធានានិរន្តរភាពធនធានជលផលសម្រាប់ប្រជាពលរដ្ឋ និងសហគមន៍នេសាទក្នុងមូលដ្ឋាន៕
