ព័ត៌មានផ្សេងៗទៀត
ក្រសួងកសិកម្ម រៀបចំសិក្ខាសាលាស្តីពី «ការប្រើប្រាស់ធ្យូងជីវៈ និងទឹកខ្មេះធ្យូងជីវៈ» ដើម្បីពង្រឹងសមត្ថភាពមន្ត្រីកសិកម្មឃុំ នៅខេត្តត្បូងឃ្មុំ
ចេញផ្សាយ ៥ សីហា ២០២៦ 3162
នៅថ្ងៃទី៤ ខែសីហា ឆ្នាំ២០២៦ នាយកដ្ឋានផ្សព្វផ្សាយកសិកម្ម សហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ និងអង្គការ GIZ បានរៀបចំសិក្ខាសាលាស្តីពី «ការប្រើប្រាស់ធ្យូងជីវៈ និងទឹកខ្មេះធ្យូងជីវៈក្នុងវិស័យកសិកម្ម» ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
សិក្ខាសាលានេះ ក៏មានការអញ្ជើញចូលរួមពី ឯកឧត្ដម ខាត់ សុធី អនុរដ្ឋលេខាធិការ តំណាងមន្ទីរកសិកម្មខេត្ត ព្រមទាំងថ្នាក់ដឹកនាំនាយកដ្ឋានផ្សព្វផ្សាយ និងនាយកដ្ឋានធនធានដី នៃអគ្គនាយកដ្ឋានក្សេត្រសាស្ត្រផងដែរ។
សិក្ខាសាលានេះរៀបចំឡើង ក្នុងគោលបំណងពង្រឹងសមត្ថភាពមន្ត្រីបច្ចេកទេស ជាពិសេស មន្ត្រីកសិកម្មឃុំ ឱ្យទទួលបានចំណេះដឹង និងជំនាញច្បាស់លាស់ ក្នុងការចុះផ្សព្វផ្សាយ បង្ហាញសាកល្បង និងគាំទ្រកសិករឱ្យអនុវត្តការប្រើប្រាស់ធ្យូងជីវៈ និងទឹកខ្មេះធ្យូងជីវៈ។ ការអនុវត្តបច្ចេកវិទ្យានេះ នឹងជួយកាត់បន្ថយការប្រើប្រាស់ធាតុចូលគីមី កាត់បន្ថយថ្លៃដើមផលិតកម្ម កែលម្អសុខភាពដី និងលើកកម្ពស់សុវត្ថិភាពចំណីអាហារ។
ថ្លែងក្នុងឱកាសនោះ ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា មន្ត្រីកសិកម្មឃុំមានតួនាទីយ៉ាងសំខាន់ក្នុងការផ្សព្វផ្សាយបច្ចេកវិទ្យាកសិកម្មដល់កសិករ ដោយផ្តោតលើការអនុវត្តវិធីសាស្ត្រផ្អែកលើទិន្នន័យជាក់ស្តែង ការធ្វើបង្ហាញសាកល្បង ការចងក្រងឯកសារ និងការផ្សព្វផ្សាយបន្ត ដើម្បីជំរុញការអនុវត្តបច្ចេកវិទ្យាកសិកម្មដែលមានប្រសិទ្ធភាព និងសុវត្ថិភាព។ ដោយឡែកសម្រាប់ខេត្តត្បូងឃ្មុំ ការផ្សព្វផ្សាយនេះគឺផ្តោតសំខាន់លើដំណាំគោលដៅដូចជា ម្រេច ទុរេន ស្វាយចន្ទី និងបន្លែ។
សូមបញ្ជាក់ផងដែរថា នៅក្នុងអង្គសិក្ខាសាលា សិក្ខាកាមទាំងអស់បានចូលរួមចែករំលែកបទពិសោធន៍ វាយតម្លៃលើលទ្ធផលនៃការអនុវត្តជាក់ស្តែង និងបានរួមគ្នារៀបចំផែនការពង្រីកការផ្សព្វផ្សាយការប្រើប្រាស់ធ្យូងជីវៈ និងទឹកខ្មេះធ្យូងជីវៈតាមរយៈបណ្តាញមន្ត្រីកសិកម្មឃុំ ដើម្បីរួមចំណែកដល់ការអភិវឌ្ឍវិស័យកសិកម្មនៅកម្ពុជាឱ្យកាន់តែមានប្រសិទ្ធភាព ចីរភាព និងមិត្តភាពជាមួយបរិស្ថាន៕
