ព័ត៌មានផ្សេងៗទៀត
លោកជំទាវ យ៉ើ អាស៊ីគីន អញ្ជេីញចុះពិនិត្យ តាមដាន វាយតម្លៃការប្រមូលផលស្រូវ និងសម្របសម្រួលទប់ស្កាត់ការធ្លាក់ចុះតម្លៃស្រូវ នៅខេត្តបន្ទាយមានជ័យ
ចេញផ្សាយ ២៣ សីហា ២០២៥ 656
នៅថ្ងៃទី២២-២៣ ខែសីហា ឆ្នាំ២០២៥ លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងក្រុមការងារនៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ព្រមទាំងមន្រ្តីកសិកម្មឃុំ បានចុះពិនិត្យស្ថានភាពប្រមូលផលស្រូវ នៅឃុំរហាល ឃុំភ្នំលៀប ឃុំទានកាំ និងឃុំព្រះនេត្រព្រះ ស្រុកព្រះនេត្រព្រះ និងឃុំពន្លៃ ស្រុកភ្នំស្រុក ខេត្តបន្ទាយមានជ័យ។
ជាលទ្ធផលក្នុងថ្ងៃទី២២ នៅឃុំរហាល ខាងក្រុមហ៊ុនបៃតង បានប្រមូលទិញស្រូវសែនក្រអូបក្នុងតម្លៃល្អសមរម្យ ប្រភេទលេខ១ បរិមាណចំនួន ៤០តោន។ រីឯនៅឃុំភ្នំលៀប ក្រុមហ៊ុនអេមរុរ៉ាយស៍ បានប្រមូលទិញស្រូវស្រង៉ែក្នុងបរិមាណចំនួន ៣៥តោន។
សម្រាប់ថ្ងៃទី២៣ នៅឃុំទានកាំ ឃុំព្រះនេត្រព្រះ ឃុំរហាល និងឃុំភ្នំលៀប ក្រុមហ៊ុនអេមរុរ៉ាយស៍ បន្តប្រមូលទិញស្រូវស្រង៉ែចំនួន ១០ឡានបន្ថែមទៀត។ ដោយឡែក ក្រុមហ៊ុនបៃតង បានប្រមូលទិញស្រូវសែនក្រអូប ជាស្រូវប្រភេទលេខ១ ចំនួន ២ឡាន។
ក្រុមការងារក៏បានចុះពិភាក្សា ពិនិត្យតាមដានការប្រមូលផលស្រូវរបស់សហគមន៍ពោធិ៍រាំបុណ្យចម្រើនផល ក្នុងឃុំពន្លៃ ស្រុកភ្នំស្រុក ដែលបានចុះហត្ថលេខាលើកិច្ចសន្យាផលិតកម្មកសិកម្ម ស្ដីពីការផ្គត់ផ្គង់ស្រូវ SRP អ៊ីអ៊ែរ ៥៥៥ លើផ្ទៃដី ១៤៣ហិកតា ជាមួយក្រុមហ៊ុន ស៊ីកនេតឆ័រ រាយស៍ ឯ.ក រហូតមកដល់ពេលនេះ សហគមន៍បានប្រមូលលក់អោយក្រុមបានចំនួន៥០ភាគរយហើយ។
ក្នុងដំណេីរបេសកកម្មនេះ លោកជំទាវ និងក្រុមការងារមន្ទីរកសិកម្មខេត្ត ក៏បានជជែកពិភាក្សាលេីកទឹកចិត្ត និងពន្យល់ណែនាំដល់សហគមន៍ និងកសិករអំពីការចងក្រងបង្កើតជាសហគមន៍កសិកម្មទំនើបផងដែរ ដែលផ្តល់អត្ថប្រយោជន៍ជាច្រេីន និងមានកិច្ចសន្យាផលិតកម្មច្បាស់លាស់៕
