ព័ត៌មានផ្សេងៗទៀត
លោកជំទាវរដ្ឋលេខាធិការ ហោ ម៉ាលីន អញ្ជើញជាអធិបតីភាព ក្នុងកម្មវិធីកិច្ចសន្ទនាតុកាហ្វេ ស្តីពី «សក្តានុពលយេនឌ័រក្នុងវិស័យកសិកម្ម»
ចេញផ្សាយ ២៤ កុម្ភៈ ២០២៦ 677
នៅថ្ងៃទី២៤ ខែកុម្ភៈ ឆ្នាំ២០២៦ លោកជំទាវ ហោ ម៉ាលីន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីភាព ក្នុងកម្មវិធីកិច្ចសន្ទនាតុកាហ្វេ ស្តីពី «សក្តានុពលយេនឌ័រក្នុងវិស័យកសិកម្ម» ដែលជាវេទិកាធ្វើឡើងក្នុងគោលបំណងចែករំលែកចំណេះដឹង និងបទពិសោធ អំពីការរួមបញ្ចូលយេនឌ័រ និងពង្រឹងទំនាក់ទំនងក្រុមការងារក្នុងវិស័យកសិកម្ម។
កម្មវិធីមានការចូលរួមពីថ្នាក់ដឹកនាំ ឯកឧត្តម លោកជំទាវ អនុរដ្ឋ លេខាធិការ រួមជាមួយក្រុមការងារយេនឌ័រ និងកុមារ នៃក្រសួង កសិកម្ម តំណាងក្រសួងកិច្ចការនារី លោកស្រី 𝗥𝗲𝗯𝗲𝗸𝗮𝗵 𝗕𝗲𝗹𝗹 ប្រធានអង្គការស្បៀង និងកសិកម្ម នៃអង្គការសហប្រជាជាតិ (FAO) និងសហការី សរុបអ្នកចូលរួមប្រមាណ៤០រូប ធ្វើឡើងនៅសណ្ឋាគារ កាព្រី បាយហ្វេហ្សី រាជធានីភ្នំពេញ។
ថ្លែងក្នុងឱកាសនៃពិធីបើក លោកជំទាវ ហោ ម៉ាលីន បានសម្តែងនូវការវាយតម្លៃខ្ពស់ចំពោះកិច្ចសហការ រវាងក្រុមការងារយេនឌ័រ និងកុមារ ជាមួយអង្គការ(FAO) ប្រចាំកម្ពុជា ដែលបានឧបត្ថម្ភគាំទ្ររៀបចំវេទិកានេះឡើង។ វេទិកា «កិច្ចសន្ទនាតុកាហ្វេ» គឺជាវិធីសាស្រ្តប្រកបដោយភាពច្នៃប្រឌិត និងស្និទ្ធស្នាល ក្នុងការផ្លាស់ប្តូរបទពិសោធ ដើម្បីជំរុញការបញ្ជ្រាបយេនឌ័រ ក្នុងវិស័យកសិកម្មឱ្យកាន់តែស៊ីជម្រៅ និងមានប្រសិទ្ធភាព។
លោកជំទាវបានគូសបញ្ជាក់ទៀតថា ស្ត្រី គឺជាកម្លាំងចលករ និងជាឆ្អឹងខ្នងដ៏រឹងមាំ ក្នុងប្រព័ន្ធផលិតកម្ម និងសេវាកម្មកសិកម្ម។ ប៉ុន្តែគម្លាតយេនឌ័រក្នុងការទទួលបានធនធាន ព័ត៌មាន និងសេវាកម្មបច្ចេកទេសនៅតែជាបញ្ហាប្រឈម។ លោកជំទាវលើកទឹកចិត្តដល់បណ្តាអង្គភាពពាក់ព័ន្ធទាំងអស់ ចំណុះឱ្យក្រសួងកសិកម្ម ចាត់ទុកវេទិកានេះ ជាឱកាសមាសក្នុងការពង្រីកបណ្តាញទំនាក់ទំនង ដើម្បីប្រមូលនូវរាល់ធាតុចូល បញ្ហាប្រឈម និងរកដំណោះស្រាយជាក់ស្តែងពីគ្រប់ទិដ្ឋភាព។
ជាចុងបញ្ចប់ លោកជំទាវ ហោ ម៉ាលីន បានបញ្ជាក់បន្ថែមថា រាល់មតិយោបល់ និងបទពិសោធដែលចេញពីការសន្ទនានេះ នឹងក្លាយជាពុទ្ធិដ៏មានតម្លៃបំផុត ក្នុងការជួយរៀបចំឡើងនូវ «ផែនការសកម្មភាពបញ្ជ្រាបយេនឌ័រ ២០២៦-២០៣០» ឱ្យកាន់តែមានភាពរស់រវើក សុក្រិតភាព និងបរិយាបន្នពិតប្រាកដ សម្រាប់ទាំងបុរស និងស្ត្រី គឺធ្វើយ៉ាងណាឱ្យស្របគោលនយោបាយក្រសួងកសិកម្មគឺ «មានហូប មានប្រើ មានបាន និងមានរហូត » ៕
