ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំកម្លាំងចម្រុះ ចុះបង្ក្រាបបទល្មើសជលផល នៅស្រុកជើងព្រៃ ខេត្តកំពង់ចាម

ចេញ​ផ្សាយ​ ១០ កញ្ញា ២០២៥ 336

នៅថ្ងៃទី១០ ខែកញ្ញា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពី ឯកឧត្តមរដ្ឋលេខាធិការ ហាស់ សារ៉េត បានអញ្ជើញដឹកនាំកម្លាំងអធិការដ្ឋានរដ្ឋបាលជលផលមេគង្គ ខណ្ឌរដ្ឋបាលបាលជលផលកំពង់ចាម សហការជាមួយអាជ្ញាធរស្រុកជើងព្រៃ ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ដោយបានចុះបង្ក្រាបបទល្មើសជលផល រុះរើ និងបំផ្លាញចោលឧបករណ៍ល្មើសច្បាប់បានចំនួន០២ករណី។

ឧបករណ៍ល្មើសច្បាប់ដែលក្រុមការងាររឹបអូសបាននៅចំណុចបឹងជ្រោយ ឃុំសូទិព្វ ស្រុកជើងព្រៃ ខេត្តកំពង់ចាម រួមមាន ឧបករណ៍លូស្បៃមុងចំនួន ០៨មាត់  របាំងស្បៃមុងប្រវែង ២៤០ម៉ែត្រ បង្គោលចម្រឹងចំនួន ១២៥ដើម ចាក់លែងកូនត្រីចម្រុះចូលបឹងធម្មជាតិវិញ។

ចំណែក នៅចំណុចទំនប់តំបន់ ឃុំព្រៃចារ ស្រុកជើងព្រៃ ខេត្តកំពង់ចាម ក្រុមការងារបានរឹបអូស ឧបករណ៍លូស្បៃមុងចំនួន១២មាត់  របាំងស្បៃមុងប្រវែង ៣៦០ម៉ែត្រ បង្គោលចម្រឹងចំនួន ១៨០ដើម និងចាក់លែងកូនត្រីចម្រុះចូលបឹងធម្មជាតិវិញ។

ឯកឧត្តមអនុរដ្ឋលេខាធិការ បានគូសបញ្ជាក់ថា  ក្រុមការងារនឹងបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តារស្រុកក្នុងខេត្តកំពង់ចាម និងផ្សព្វផ្សាយដល់ប្រជានេសាទឈប់នេសាទដោយប្រើប្រាស់ឧបករណ៍ល្មើសច្បាប់៕